Аҧсны Аҳәынҭқарра Ахада

 

Ашәахтә усбарҭақәа рыдныҳәалара

14.04.2017

Мшаҧымза 14 рзы Аҧсны Ахада Рауль Ҳаџьымба ашәахтә усбарҭақәа русзуҩцәа рзанааҭтә ныҳәа рыдиныҳәалеит.

Адныҳәаларҟны, лымкаала, иҳәоуп:

Ҳаҭыр зқәу Аҧсны Аҳәынҭқарра ашәахтә усбарҭақәа русзуҩцәа!

Гәык-ҧсыкала ишәыдысныҳәалоит шәзанааҭтә ныҳәа.

Ашәахтәқәеи аизгақәеи рзы Аҧсны Аҳәынҭқарра аминистрра аҳәынҭқарратә шьақәгылашьаҟны акрызҵазкуа аусбарҭақәа ируакуп. Иара қәҿиарала иеиҿнакаауа аусура иахьыҧшуп ҳтәыла абиуџьеттә система аусура.

Аҵыхәтәантәи ашықәсқәа рзы, хымҧада, иубартә иҟоуп ҳбиуџьет ахь иааиуа ашәахтәтә лагаламҭақәа ирызҳауа ишалагаз. Лымкаала шәара шәусура иабзоураны, ҳаҭыр зқәу ашәахтә усзуҩцәа, ҳҳәынҭқарра атәылауаа рҿаҧхьа асоциалтә хыдҵақәа рынагӡаразы алшара амоуп.

Аҧсны аиҳабыра ҳтәыла ашәахтә система аиҕьтәразы аусура мҩаҧнагоит. Сгәы иаанагоит ари апроцесс шәусура алҵшәақәа реиҕьтәра иацхраауеит ҳәа. Агәра згоит шәҿаҧхьа иқәгылоу ауснагӡатәқәа аҧхьаҟагьы қәҿиарала анагӡара шшәылшо азы.

Ҷыдала иҭабуп ҳәа расҳәарц сҭахуп ашәахтә маҵзура ашьақәгылараҿы злагаламҭа дуу аветеранцәа.

Иахьатәи аныҳәа аҽны зегьы хаҭа-хаҭала ишәзеиҕьасшьоит агәабзиара, агәамч, шәнапы злаку аус аҿы аихьӡарақәа.  


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org