Аҧсны Аҳәынҭқарра Ахада

 

Аԥсны Ахада Жәлар Реизара актәи аилатәараҿы иқәгылара

12.04.2017

Аԥсны Ахада Жәлар Реизара актәи аилатәараҿы иқәгылара

Мшапымза 12 рзы Аԥсны Ахада Рауль Ҳаџьымба Жәлар Реизара актәи аилатәараҿы дықәгылеит.

Ҳаҭыр зқәу Жәлар Реизара-Апарламент адепутатцәа! Ҳаҭыр зқәу ҳауаажәлар!

Иахьа Аԥсны Жәлар Реизараҿы имҩаԥысуа ахҭыс – зҵакы ӷәӷәоу хҭысуп. Русура хацдыркуеит ҿыц, демократиатә ҟазшьала иалху Аԥсны Апарламент адепутатцәа. Урҭ раԥхьа иқәгылоуп аҭакԥхықәра ду зцу азакәанԥҵаратә уснагӡатәқәа. Раԥхьаӡа иргыланы, уи азкхароуп ҳазлагаз ареформақәа рымҽхак арҭбаара.

Аамҭакала иазгәаҭатәуп, хәышықәса рыҩныҵҟа знапынҵақәа назыгӡоз адепутатцәа рџьабаа, урҭ ирыдыркылаз азакәанқәа рҵакы, ауаажәларрат-политикатә еиҿагылара арԥсыҽразы дара иааныркылоз абжьаҟазаратә роль. Иҭабуп ҳәа расҳәоит иахьа знапынҵақәа шьҭазҵо апарламентарицәа урҭ раԥшьгарақәеи рылшамҭақәеи рзы!

Иара убас ишәыдысныҳәалар сҭахуп ҿыц Апарламент ахь иааиз адепутатцәа иахьатәи амш! Ишәзеиӷьасшьарц сҭахуп ԥхьаҟатәи шәусураҿы аихьӡара дуқәа, агәалаҟара бзиа, аизыразра! Уаҩы игәы иахәаратә иҟоуп шәарҭ шәеилазаараҿы иахьыҟоу аԥышәа маҷымкәа измоу адепутатцәа, апарламенттә усура иацу ауадаҩрақәа дырны, зшьаҿа еихызгаз аҿари!

Шәара шәҿаԥхьа иқәгылоу азҵаара хадақәа иреиуоуп ҳтәыла ахьыԥшымреи, асуверенитети, ашәарҭадареи зырӷәӷәо, аԥсуа бызшәа аҳәынҭқарратә астатус шьҭызхуа, ҳажәлар рсоциалтә-економикатә ҭахрақәеи рзинқәеи зыхьчо азакәанԥҵаратә шьагәыҭ арҿиара, аизырҳара. Имҩаԥысыз алхрақәа лабҿаба иаҳдырбеит акырӡа ишырҿыцтәу, ауааԥсыра зегьы рҭахрақәа, ринтересқәа ирықәшәо ишыҟаҵатәу иара алхратә закәанԥҵарагьы. Сгәы иаанагоит, иҵегь ишьҭыхтәуп ҳәа Апарламент ароль, амчхара ҳажәлар реидкылара, ракзаара аус аҿы. Ҳасаб азутәуп ҳакәша-мыкәша иҟоу агеополитикатә ҭагылазаашьа шымариам, ҳаҩныҵҟа ишалыршатәу апринципра ҵакы змоу аҳәынҭқарратә зҵаарақәа рзы апартиақәеи егьырҭ ауаажәларратә еиҿкаарақәеи рдиалог. Иҵегь ирыӷәӷәатәуп Аԥсны Ахадеи, Апарламенти, Аминистрцәа Реилазаареи реимадара, лыҵшәа бзиала русеицура. Даҽазныкгьы ишәзеиӷьасшьоит аманшәалара, агәамч ӷәӷәа, ҳазегь ҳусеицураҿы – аихьӡара ҿыцқәа!

IMG_6745.JPG

 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org