Аҧсны Аҳәынҭқарра Ахада

 

Аҧсны Аҳәынҭқарра Ахада Рауль Ҳаџьымба имҩаҧигеит Аҩныҵҟатәи аусқәа рминистрра, Апрокуратура хада, Аҳәынҭқарратә шәарҭадара Амаҵзура ахадацәа рҧылара

10.04.2017

Аҧсны Аҳәынҭқарра Ахада Рауль Ҳаџьымба имҩаҧигеит Аҩныҵҟатәи аусқәа рминистрра, Апрокуратура хада, Аҳәынҭқарратә шәарҭадара Амаҵзура ахадацәа рҧылара


















Мшаҧымза 10 рзы Аҧсны Аҳәынҭқарра Ахада Рауль Ҳаџьымба имҩаҧигеит Аҩныҵҟатәи аусқәа рминистрра, Апрокуратура хада, Аҳәынҭқарратә шәарҭадара Амаҵзура ахадацәа рҧылара.

Амчратә усбарҭа анапхгаҩцәа Аҳәынҭқарра Ахада иҟынӡа инаргеит абыргцәа хаҵеи ҧҳәыси рықәлареи урҭ руаӡәык Алашарбага аҳаблаҟны ишьреи, иара убас Гал араион аҟны иҟалаз ауаҩшьрақәа рыҭҵаара шымҩаҧысуа атәы.

«Гал араион аҟны ҳаҟан, ахҭыс ахьымҩаҧысыз аҭыҧ ҳбеит. Гәҩарас иҟоу ауаҩы иҧшаареи иаанкылареи рзы ауснагӡатәқәа мҩаҧысуеит. Алашарбага аҳаблаҟны иҟалаз ацәгьоуразы аус хацыркуп. Ацәгьоура иақәшәаз Шәачаҟа далганы дыргеит, лареи лашьцәеи ҳареи аимадара ҳабжьоуп. Иаҭаху аоперативтә-усҭҵааратә усмҩаҧгатәқәа рынагӡара ҳаҿуп, аха ари ацәгьоура иалахәу ауаа рышьақәыргылара макьана иалыршаӡам», - иҳәеит Апрокурор хада Зураб Ачба.

Аҩныҵҟатәи аусқәа рминистр актәи ихаҭыҧуаҩ, акриминалтә милициа аиҳабы Рауль Зыхәба Ахада иеиҳәеит Алашарбага аҳаблаҟны иҟалаз ацәгьоуразы имҩаҧысуа аусҭҵаара амҩаҧысшьа атәы.

«Иахьа амш аҧхьатәи азбжазы Аҟәа араион Аҩныҵҟатәи аусқәа русбарҭа, Аҟәа араион Апрокуратура аоперативтә усзуҩцәа алархәны аилацәажәара мҩаҧаҳгеит. Иазгәаҳҭеит иахьазы, амчыбжь зегьы азы аусмҩаҧгатәқәа. Алшара ҳауит аҭыҧ иацҵаны аҭҵаара амҩаҧгаразы. Гәҩарас иҳамоу ыҟоуп, аха иаартны урҭ зусҭцәоу ҳазҳәаӡом макьана. Ари ацәгьоура аартразы иаҳалшо зегьы аҟаҵара ҳаҿуп», - иҳәеит Рауль Зыхәба.

Аҳәынҭқарра ахада аусбарҭа адҵа аиҭеит аус аҵыхәанӡа анагаразы, ацәгьоуцәа рыҧшааразы.

«Ари ауаажәларра ирылаҵәаз цәгьоурақәоуп, урҭ аарттәуп», - иаҵшьны иҳәеит Ахада.

Гал араион аҟны иҟалаз ауаҩшьрақәа инарыдҳәаланы Аҳәынҭқарратә шәарҭадара амаҵзура аусура далацәажәо, Ахада иазгәеиҭит аҳәаа аркразы аусбарҭа зыда ҧсыхәа ыҟам ауснагӡатәқәа мҩаҧнагароуп ҳәа.

Аҳәынҭқарра ахада ишьҭихит иара убас Аҩныҵҟатәи аусқәа рминистрра ахатә шәарҭадара ҧасатәи аусбарҭа аусзуҩцәа инарымаданы аҭагылазаашьа азҵаара. Ахада Апрокурор инапы ианиҵеит ҧасатәи аусбарҭа аусзуҩцәа абрифинг аан ирыларҳәаз аинформациа нарҵауланы иҭиҵаарц.

«Ари ахҭыс ҭыҧ амазар, уи азы аҭакҧхықәра ААР анапхгара ирыдысҵоит, аха ус иҟамзар, ауаа ирҳәои рхымҩаҧгашьеи рзы аҭакҧхықәра рыдҵатәуп. Сара Апрокурор хада идысҵоит ари азҵаара нҭырҳәыцааны иҭҵааны, азакәан аҳәаа иҭымгакәа, уи инақәыршәаны аҩ-ганк рганахьала ҭакҧхықәрас ирыдҵатәу азҵаара ақәыргылара», - иҳәеит Ахада.

Рауль Ҳаџьымба ААР анапы ианиҵеит аусбарҭа акадртә усура азҵаарақәа хылаҧшра арҭарц, ҵаҵҕәыда арратә хьыӡқәеи амаҵзурақәа рыҟны реизҳареи алдмыршарц.

Ахада иара убас иазгәеиҭеит аусбарҭаҟны аилазааратә еиҭакрақәа Аминистрцәа реилазаара ақәыршаҳаҭны ишымҩаҧгатәу.

Аҩныҵҟатәи аусқәа рминистр Аслан Кобахиа иҳәеит аштатә еилазаара ҿыц ажьырныҳәамзазы ишазырхиаз, Ахада Иусбарҭеи Аминистрцәа реилазаареи рыҟны ишцәыргаз. Иара убас уи иазгәеиҭеит уаанӡа Аминистрраҟны аусбарҭақәа шаҧҵаз, ари - амчқәа арҧсаҟьон, аусура ахаҭабзиара аиҕьтәра алнаршаӡомызт. Аҩныҵҟатәи аусқәа рминистрра ҧасатәи аусбарҭа аусзуҩцәа ирыдҳәалоу апроблема, Аминистр имҩаҧгоу аусуразы рызҵаара даналага ашьҭахь ицәырҵит ҳәа иҧхьаӡоит.   


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org