Аҧсны Аҳәынҭқарра Ахада

 

Информациатә хархәагақәа русзуҩцәа рыдныҳәалара

27.02.2017

Ҳаҭыр зқәу Аҧсны амассатә информациатә хархәагақәа русзуҩцәа!

Гәык-ҧсыкала ишәыдысныҳәалоит шәзанааҭтә ныҳәамш– Аҧсны амилаҭтә кьыҧхьи амассатә информациатә хархәагақәеи рымшныҳәа!

Крызҵазкуа шәажәала, шәыпрофессионализм ҳаракы ала, ишьҭышәхуа актуалтә апроблемақәа инарҵауланы рдыррала, шәара иҵоуроу анырра ашәҭоит ауаажәларратә гәаанагара аҿиара, ихьыҧшым ҳҳәынҭқарра ашьақәгылара.

Раҧхьатәи аҧсуа газеҭ “Аҧсны” актәи аномер ала ихацыркхаз амилаҭтә кьыҧхьи, ателехәаҧшреи, арадиои қәҿиарала ирыӡбоит Аҧсны жәларбжьаратәи аҳаҭыр ашьҭыхреи, уи амилаҭтә интересқәа рыхьчареи ирызку ауснагӡатә.

Ҳмилаҭтә журналистика аҿиарамҩаҿы ирхысит иуадаҩу аетапқәа. Амилаҭтә-хақәиҭратә қәҧара аамҭазы амассатә информациатә хархәагақәа русзуҩцәа иаҿаҧырҽуан Аҧсны-жәлар ирҿагылаз, раҳаҭыр лазырҟәуаз апропаганда. Шәарҭарак хьаас имкыкәа, ажурналистцәеи, арратә корреспондентцәеи, ателеоператорцәеи рзанааҭтә уалҧшьа нарыгӡон 1992-1993 шш. рзтәи Аҧсны жәлар Рџьынџьтәылатә еибашьраан.

Ҳажәлар рконституциатә иааира хадақәа ируакыуп ауаҩы иажәа иақәиҭреи, инарҭбааны аинформациа аиуреи рзы имоу азинқәа. Убри аганахьала аинформациатә хархәагақәа ирылдыршахьоу маҷым. Агәахәара ҳнаҭоит, аҧышәа змоу ажурналистцәеи, апублицистцәеи, аредақциақәа русзуҩцәеи реилазаара ахьхаҭәаауа зыквалификациа бзиоу акадрқәа рыла.

Иазгәасҭарц сҭахыуп иаарту ацәажәарақәа рполитика сшадгылаҩу.

Аҳәынҭқарра аринахысгьы иаҧшаалоит алшарақәа аинформациатә хархәагақәа русура адгыларазын.

Гәык-ҧсыкала ишәзеиҕьасшьоит ҧхьаҟатәи ақәҿиарақәа, арҿиаратә гәеизҳара!


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org