Аҧсны Аҳәынҭқарра Ахада

 

Ахада ихаҭыҧуаҩ Ачечентә Республикаҟны иҟазаара аихшьала ҟаиҵеит

14.10.2016

Жьҭаара 14 Ахада ихаҭыҧуаҩ Витали Габниа апресс-конференциа мҩаҧигеит Ачечентә Республикаҟны иҟазаара аихшьала иазкны.

Виталиа Габниа иазгәеиҭеит Ачечентә Республикахь ицара мзызс ишамаз Ахада Рамзан Кадыров имаҵура аанкылара иазкыз аусмҩаҧгатә.

«Ари ахҭыси егьырҭ аныҳәақәеи аусмҩаҧгатәқәеи, иаҳҳәап, Ақалақь Амши, Аҿар рымши, Арҵаҩ имши, иара убас иара Рамзан Кадыров ҩынҩажәа шықәса ихыҵра иазкыз аиубилеии еиқәшәеит », - иҳәеит Ахада ихаҭыҧуаҩ.

Витали Габниа иацҵаны иҳәеит хаҭала Ачечентә Республика Ахада Рамзан Кадырови, иара убас Ачечентә Республика Аиҳабыреи, Агәубернатори, Афедерациа Ахеилак иалоу Чечентәыла Ахаҭарнакцәеи иареи еицәажәартә еиҧш аҭагылазаашьа шиоуыз.

Ахада ихаҭыҧуаҩ иажәақәа рыла, Чечентәыла араионқәа рхадацәеи иареи официалла реиҧылара мҩаҧымсӡеит, Аҧсны Аҳәынҭқарра аделегациа егьырҭ аҳәынҭқаррақәеи ареспубликақәеи рделегациақәа реиҧш, аныҳәатә усмҩаҧгатә ахь ааҧхьара ирымаз аамҭа алагӡара алымшаӡеит.

Витали Габниа иаҵшьны иҳәеит Грозныи ақалақь Урыстәылатәи Афедерациаҟны зегь раасҭа иҧшӡоу, ишәарҭадоу ақалақьқәа ишыруаку.

«Грозныи қалақь ҧшӡоуп. Жәашықәса, ҩажәа шықәса раҧхьа еилаҧыхха ишьҭаз, иахьа ҿыц иргылоу, аҭоурыхгьы еиқәырханы измоу қалақьуп. Аха зегьы раасҭа ихадароу, ара ашәарҭадара ахьуныруа ауп», - иҳәеит Витали Габниа.

Ахада ихаҭыҧуаҩ иҳәеит ареспубликаҟны иҟоу аихьӡарақәа злалыршахаз адиаспора иҟанаҵаз ацхыраареи, излашьақәгылоу аидеологиеи, амчхара ҳаҭырқәҵарала азыҟазаашьеи рыла шакәу.

«Сара ари, еиҳарак, Афедералтә биуџьет аҟнытә иаиуыз ацхыраара ауп ҳәа сгәы иаанагон. Аха уи ареспублика абиуџьет абжагьы ыҟаӡам. Иреиҳау ахәҭа адиаспора аҟнытә ироууеит. Арҭ ахыҧхьаӡаларақәа ареспублика афинанстә лшара дуқәа рнаҭоит. Нас, аҿар арадикалтә ҟазшьа змоу анцәахаҵарақәа ирыцәганы , аваххабимзгьы уахь иналаҵаны, изықәныҟәо рдин амч даара иҕәҕәоуп», - иҳәеит Витали Габниа.

Аҧсни Ачечентә Республикеи реизыҟазаашьа атәы далацәажәо, иаҵшьны иҳәеит, Чечентәылан ҳаимадара арҿиареи арҕәҕәареи зҿлымҳара шарҭо.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org