Аҧсны Аҳәынҭқарра Ахада

 

Иорданиатәи аҧсуа диаспора ахаҭарнакцәа рҧылара

03.10.2016

Жьҭаарамза 3 рзы Аҧсны Ахада Рауль Ҳаџьымба Иорданиатәи аделегациа даҧылеит.

Р. Ҳаџьымба Иорданиатәи аделегациа бзиала шәаабеит ҳәа раҳәо, иазгәеиҭеит аҳәаанырцә иҟоу ҳдиаспореи Аҧсны инхо аҧсуааи жәларык шракәу.

«Аҧсны шәбара сара сзы гәахәароуп. Шәара иахьа шәыҧсадгьыл аҟны шәыҟоуп. Ҳара ҳдиаспорагьы Аҧсны инхо аҧсуаагьы ҳаӡәыкны ҳаҟазароуп, », - иҳәеит Аҧсны Ахада. Ҳаџьымба иаҵшьны иҳәеит уажәы Аҧсны ихьыҧшым ҳәынҭқаррак аҳасабала ашьақәгылара амҩа ишану.

«Ҳара ҳекономика, ҳсоциалтә ҟәша арҿиара ҳаҿуп, ҳҳәынҭқарраҿы имҩаҧысуеит аҳәынҭқарратә усбарҭақәа русура аиҕьтәра. Аҧсуа диаспора ахьыҟазаалак абри аус иалхәдамзароуп», - иҳәеит аҳәынҭқарра Ахада.

Ахада иазгәеиҭеит Урыстәылатәи Афедерациа ареспублика аҿиараҟны ацхыраара ду шыҟанаҵо, аха уи игәаанагарала, аҳәынҭқарра ахала аҿиаразы иалшо зегьы ҟанаҵалароуп.

«Урыстәылеи ҳареи аиҩызаратә еизыҟазаашьақәа ҳабжьоуп. Иара раҧхьа ҳхьыҧшымра азхазҵаз тәылоуп. Уи ҳара акырӡа ацхыраара ҳнаҭоит, аха ҳџьабаала ахныҟәгашьа ҳҵароуп. Ҳара ихьыҧшым аҳәынҭқарра аргылара ҳалшаӡом, есқьынгьы ҳҩызцәа ҳрықәгәыҕлар», - иҳәеит Рауль Ҳаџьымба.

Аиҧылараҟны ирылацәажәан Иорданиа инхо аҧсуаа рҭоурыхтә Ҧсадгьыл ахь рыхынҳәра азҵаара иадҳәалоу азҵаарақәа.

Ҳџьынџьуаа рхаҭарнакцәа Рауль Ҳаџьымба асасдкыларазы иҭабуп ҳәа иаҳәаны агәалашәаратә ҳамҭақәа ирҭеит.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org