Аҧсны Аҳәынҭқарра Ахада

 

Витали Амаршьан идныҳәалара

20.09.2016

Ахада Рауль Ҳаџьымба Аҧсны жәлар Рпоет Витали Амаршьан Имшира идиныҳәалеит.


Ҳаҭыр зқәу Витали Џьота-иҧа!

Гәык-ҧсыкала ишәыдысныҳәалоит шәиижьҭеи 75 шықәса аҵра. Ишәзеиҕьасшьоит агәамч-ҕәҕәа, шәыҧсҭазаареи шәбаҩхатәреи зызку шәырҿиараҿы– аихьӡара ҿыцқәа!

Шәара шәпоезиеи шәыпрозеи иналукааша аҭыҧ ааныркылахьеит аҧсуа литература аҿиара аҭоурыхаҿы. Шәлирика, шәпоемақәа инарҵауланы ирныҧшит ауаҩытәыҩса иҩныҵҟатәи идунеи, ауаҩи, аамҭеи, аҧсабареи реизыҟазаашьа, ҳажәлар рлахьынҵа. Хашҭра зқәым ҩымҭақәоуп, Аҧсны жәлар Рџьынџьтәылатә еибашьраан фырхаҵарыла иҭахаз, Леон иорден занашьоу шәҧа Беслан Амаршьан ихьӡынҩылоу шәажәеинраалақәа, егьырҭ шәаҧҵамҭақәа.

Амилаҭтә проза аҿиарамҩаҿы анырреи амҽхак дуи рыманы ицәырҵит шәара шәроманқәа, шәпоемақәа “Аҧсҳа ”, “Амш ахәлара иааҳамнахаанӡа”, Уашхәа макьаҧсыс” уҳәа егьырҭгьы шәепикатә ҧҵамҭа хатәрақәа.

Акыршықәса инеиҧынкыланы лыҵшәа бзиала аус жәыухьеит ажурнал “Алашара” аҭакзыҧхықәу амаӡаныҟәгаҩс, аредактор хада ихаҭыҧуаҩс. Ишәанашьоуп Д.И. Гәлиа ихьӡ зхыу Аҳәынҭқарратә премиа.

Аҧхьаҩцәа инарҭбааны ирылаҵәахьеит шәпублицистика, шәеиҭагамҭақәа. Шәара шәырҿиамҭақәа ахәшьара ҳаракы рызҭахьоу иреиуоуп Баграт Шьынқәба,Фазиль Искандер, Шьалуа Инал-иҧа, Владимир Аҵнариа, Сергеи Зыхәба, Руслан Қапба, Виачеслав Бигуаа уҳәа аӡәырҩы ашәҟәыҩҩцәа, акритикцәа.

Иреиҕьу шәырҿиамҭақәа иаҧсоу аҭыҧ ааныркылоит “Аҧсуа поезиа антологиаҿы”.

Даҽазныкгьы ишәыдысныҳәалоит шәымшира, ишәзеиҕьасшоит агәызҩыдара, ақәҿиара ҿыцқәа шәлитературатә ҧсҭазаараҿы!


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org