Аҧсны Аҳәынҭқарра Ахада

 

Зхатәгәаҧхарала еибашьуаз рбаҟа Черқьеск ақ. аҟны аартра иазкыз аусмҩаҧгатә аҟны Аҧсны Ахада Рауль Ҳаџьымба иажәахә

31.08.2016

Нанҳәамза 31 рзы Аҧсны Ахада Рауль Ҳаџьымба Черқьеск ақ. Аиааира апарк аҿы Ҟарачы-Черқьесынтәи Зхатәгәаҧхарала еибашьуаз, Аҧсны ахақәиҭреи ахьыҧшымреи зхы ақәызҵаз рбаҟа аартра иазкыз аусмҩаҧгатә далахәын.

Уи иқәгылараҟны, лымкаала, иҳәоуп:

Акыр иаҧсоу ҳашьцәа! Ҳаҭыр зқәу аҩызцәа! Иахьа ҳара ҳала иабартә иҟалеит акыраамҭа ҳаззыҧшыз–– ҳҭоурых аҿы акыр иуадаҩыз аамҭазы, аҧсуа жәлар риаӡаара ахықә аҟны иангылаз ацхыраара ҳарҭарц азы, иҳадгыларц азы инеиз зхатәгәаҧхарала еибашьуаз ҳашьцәа рбаҟа аартра ахҭыс.

1992-1993 шш. Аҧсны Жәлар рџьынџьтәылатә еибашьра ҳара ҳаҧсҭазаара ҩыџьараны еиҩнашеит – аибашьра ҟалаанӡеи аибашьра ашьҭахьи ҳәа. Аибашьра аҧхьатәи амшқәа инадыркны, ашьха ихыҵны инеиз Нхыҵ Кавказынтәи ҳашьцәа аҧсуа жәлар иарҕьажәҩаны инарывагылеит.

Зхатәгәаҧхарала еибашьуаз аӡәгьы изымҵааӡакәа, рыгәқәа еиҭамсӡакәа аҧсуа жәлар инарывагылеит, усҟан урҭ зықәныҟәоз хықәкы заҵәык акәын – уи ҳажәлар аҧсҭазааразы, рхатә ҳәынҭқарразы ирымаз азин азықәҧара иазкын.

Иуадаҩуп аиҭаҳәара нанҳәамза 1992 шықәсазы Нхыҵ Кавказынтә ҳашьцәа ацхыраара ҳаҭаразы иаараны ишыҟаз азы аинформациа анҳаларҳәа дасу игәалаҟазаара атәы. Ҳара ҳхала ҳшыҟам, ҳашьцәа шҳадгылоу анеилаҳкаа, ари акырӡа ҳгәы шьҭнахит, ҳамчқәа ирыцнаҵеит. Аҧсны жәлар раҧхьагыла, Аҧсуа ҳәынҭқарра ашьаҭаркҩы Владислав Арӡынба изныкымкәа иазгәеиҭахьан «иҧшьаз ари аибашьраҟны Нхыҵ Кавказынтә ҳашьцәа иҳарҭаз ацхыраара ада аиааира ҳазгаӡомызт» ҳәа.

Аҧсны аибашьра иалахәын ҩ-нызқь инареиҳаны зхатәгәаҧхарала еибашьуаз, урҭ рахьтә 51-ҩык “Аҧсны Афырхаҵа” ҳәа ахьӡ иаҧсахеит. 260 –ҩык инареиҳаны, урҭ рыҩныҵҟа иҟоуп ҞЧ зхатәгәаҧхарала еибашьуаз 11-ҩык, Аҧсны ахақәиҭреи ахьыҧшымреи рхы ақәырҵеит.

Зхатәгәаҧхарала еибашьуаз реиҿкаара Аҧсныи Нхыҵ Кавкази рыжәларқәа иҧшьоу, ҧгара зқәым уасхыр ҕәҕәаны иазышьҭалеит. Аҧсны ахааназы ирхашҭраны иҟаӡам Зхатәгәаҧхарала еибашьуаз ргәымшәареи рфырхаҵареи. Ҳхырхәоит урҭ ргәалашәара аҿаҧхьа, иҭабуп ҳәа раҳҳәоит абас еиҧш аҵеицәа зааӡаз анацәа рҿаҧхьа.

Аҧсны, Гәдоуҭа ақалақь аҟны аибашьра ашықәсқәа раан Кавказ ашьхарыуа жәларқәа р-Конфедерациа аштаб ахьыҟаз ахыбра азааигәара ишьақәыргылоуп зхатәгәаҧхарала еибашьуаз ирызку агәалашәаратә ҭӡы. Иахьа Черқьеск ақ. аҟны ишьықәыргылоуп зхатәгәаҧхарала еибашьуаз рыхьӡала абаҟа, ари азы иҭабуп ҳәа раҳҳәоит Ҟарачы-Черқьестәи Ареспублика анапхгара.

Агәра ганы сыҟоуп, зхатәгәаҧхарала еибашьуаз рфырхаҵара, иҭахаз афырхацәа ргәалашәара, аветеранцәа раҳаҭырбара иара убас аҵакы аманы ишыҟало ҿыц игыло абиҧарақәа рызгьы.

Ҟарачы-Черқьестәи Ареспублика ажәлар, Нхыҵ Кавказ ажәларқәа зегьы гәык-ҧсыкала ирзеиҕьасшьоит аҭынчра, анасыҧ, аизҳазыҕьара, раҧхьа иргыланы – акзаара. Ҳара ҳанеидгылоу ауп ҳаныҕәҕәоу!


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org