Аҧсны Аҳәынҭқарра Ахада

 

Аҧсны Ахада Ҟабарда-Балкариатәи Ареспублика даҭааит

01.09.2016

Цәыббра 1 азы Аԥсны Аҳәынҭқарра Ахада Рауль Ҳаџьымба зхадараҟны дыҟоу Аԥснытәи аделегациа Ҟабарда-Балкариатәи Ареспублика (Урыстәылатәи Афедерациа) иаҭааит ҞБА аҳәынҭқарра 95-шықәсахыҵра иазку аусмҩаҧгатәқәа рыҽрыладырхәырц азы.

Аԥсны Аҳәынҭқарра аҟнытә инеиз аделегациа Нальчик ақалақь аҟны Аҧсны ахьӡ зху ашҭаҿы ишьақәыргылоу Аԥсны ахақәиҭреи ахьыԥшымреи зхы ақәызҵаз рбаҟа амҵан ашәҭқәа шьҭарҵеит. Ацеремониа иара убас иалахәын Ҟабарда-Балкариа аиҳабыра Ахантәаҩы ихаҭыԥуаҩ Владимир Битоков, Аԥсны Жәлар рџьынџьтәылатә еибашьраан хатәгәаԥхарала иеибашьуаз.

Аусуратә визит аҳәаақәа ирҭагӡаны имҩаԥысит Аԥсны Ахада Рауль Ҳаџьымбеи Ҟабарда-Балкариа Ахада Иури Кокови ҩ-ганктәи реиԥылара.

Аиԥылараан ирылацәажәан атәылақәа рыбжьара ҩ-ганктәи реизыҟазаашьақәа еиуеиԥшым аганқәа: аекономикатә, акультуратә, агуманитартә, аҵарадырратә усеицурақәа. Иазгәаҭан Ҟабарда-Балкариеи Аҧсны Аҳәынҭқарреи ирыбжьоу аамҭа иҧнашәаз, аҧхьаҟа хымҧада иҿиараны иҟоу ҷыдалатәи аиашьаратә еизыҟазаашьақәа.

Рауль Ҳаџьымба Иури Коков иҭабуп ҳәа иеиҳәеит иҟаиҵаз ааҧхьаразы, даҽазныкгьы иазгәеиҭеит Аҧсны Аҳәынҭқарра анапхгара Нхыҵ Кавказ ареспубликақәеи Аҧсни реимадара арҕәҕәара иазку аполитика шымҩаҧнаго.

Ҟабарда-Балкариа Ахада иҟаиҵаз ааҧхьарала, Аԥсны Аҳәынҭқарра аделегациа ҞБА 95-шықәсахыҵра иазку аныҳәатә усмҩаҧгатәқәа ирылахәхоит.

Аҳәынҭқарра Ахада иусуратә визит иаан ицуп Ахада Иусбарҭа Анапхгаҩы инапынҵақәа назыгӡо Дмитри Шамба, Ашәарҭадара Ахеилак Амаӡаныҟәгаҩ Муҳамед Кьылба, Агәабзиарахьчара аминистр Андзор Гоов.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org