Аҧсны Аҳәынҭқарра Ахада

 

Аҧсны Ахада Рауль Ҳаџьымба Аҧсны имҩаҧысуаз Урыстәыла амшқәа рҳәаа иҭагӡаны Ақьырсиан ҭыҧқәа рҭаареи адинхаҵаратә туризми рырҿиара иазку аконференциаҟны иқәгылара

26.08.2016

Акыр иаҧсоу аҩызцәа!

Асимволтә ҵакы амоуп аиҩызара зыбжьоу ҳҳәынҭқаррақәа ркультуратә еимадарақәа рырҕәҕәара иазку ахҭысқәеи Урыстәылатәи Афедерациа Аҧсны Аҳәынҭқарра ахьыҧшымра аназханаҵа амш азгәаҭареи ахьеиқәшәаз. 2008 ш. нанҳәамза 26 ҳҳәынҭқаррақәа рҭоурых даҟьа ҿыцны ианылеит. Ҳхьыҧшымра азхаҵара афакти уи инашьҭарххны иҟаҵаз ашьаҿақәеи ҳаиҩызаратә еизыҟазаашьақәа рыҿиара акыр иацхрааит аҩаӡарақәа зегьы рыҟнеиҧш аҵак ду змаз ахырхарҭақәа рҟынгьы.

Азхаҵара – аҧсуа жәлар жәашықәсала рполитикатә ҳәаақәҵаразы рықәҧара иалҵшәоуп. Иазгәауҭаша ак акәны иҟалеит ари афактор Урыстәыла анапхгаҩцәа рықәгыларақәа рыҟны иақәнагоу, иобиективтәу ахәшьара ахьаиуыз. Урыстәыла аганахьала иҟаз ацхыраара иабзоураны Аҧсны иахьа аекономика арҿиаразы, асоциалтә инфраструктура, ахатәы культура-ҵараиуратәи аҵарадырра-техникатә лшареи реиҭашьақәыргыларазы аҭагылазаашьа амоуп. Аидгыларатәи астратегиатә усеицуразы аиқәшаҳаҭра ҿыц Аҧсныи Урыстәылеи рминистррақәеи русбарҭақәеи лыҵшәабзиала русеицуразы амҩа ҿыцқәеи алшарақәеи аҧнаҵеит. Сгәы иаанагоит IV Жәларбжьаратәи акультуратә форум аҳәаақәа ирҭагӡаны 2015 шықәсазы Санкт-Петербург ҩ-тәылак ркультура аминистррақәа иаҵарҩыз аусмҩаҧгатәқәа еицазҧхьазгәарҭаз аусмҩаҧгатәқәа рыдкылареи рынагӡареи рыҟны еихьӡарала аусуеицура иаҿырҧшыгоуп ҳәа.

Ҳара иара убас аҵак ду аҳҭоит акультуратә ҭынха аобиектқәа реиқәырхара иазку аусеицуразы Аиқәшаҳаҭра.

Агәра ганы сыҟоуп иҳараку шәфорум амш азҵаараҟны иқәгылоу ақьырсиан ҭыҧқәа рҭаареи адинтә туризми рырҿиара азҵаара актуалра иазҳауеит ҳәа, аҳәынҭқарра аганахьала адгыларагьы аиууеит ҳәа.

Ҳгәы азҭанаҵоит акультуратә еимдара апроцесс иахьадҧхьалоу Аҧсныи Урыстәылеи милаҭрацәалатәи алитературеи аҟазареи знапы алаку иналукааша ауаа.

Аҧсны имҩаҧысуа Урыстәыла амшқәа ирылахәу зегьы гәык-ҧсыкала ишәыдысныҳәалоит акультура аныҳәа ду аартра! Ҳасасцәа дахьқәа, ишәзеиҕьасшьоит агәалаҟазаара бзиеи ҳтәылақәеи ҳажәларқәеи реизҳазыҕьара ахьӡала арҿиаратә еихьӡара ҿыцқәеи!


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org