Аҧсны Аҳәынҭқарра Ахада

Аҟәа, 13.00

Ашьаҧылампыл асразы адунеи Ачемпионат ConIFA аартра аламҭалазы Аҧсны Ахада Рауль Ҳаџьымба ашьапылампыл асразы акоманда ахәмарыҩцәеи азыҟаҵаҩцәеи реилазаара дырҧылеит.

Ахада ачемпионат аҽазыҟаҵара иаҿу аспортсменцәа адгылара шриҭо атәы иҳәеит. «Аҧсны раҧхьаӡакәны ас еиҧш аусмҩаҧгатә мҩаҧысуеит. Ари ахҭыс ҳара ҳзы даара акрызҵазкуа акоуп», - иазгәеиҭеит Рауль Ҳаџьымба.

Рауль Ҳаџьымба иаҵшьны иҳәеит аҧсуа шьапылампыл аҭоурых ду шамоу, иахьатәи абиҧара уи иреиҕьу атрадициақәа анагӡара рылшап ҳәагьы игәы ишаанаго. «Агәра ганы сыҟоуп, шәара ишәылшо зегьы шыҟашәҵо иреиҕьу алҵшәақәа риуразы. Аҧснытәи ахәаҧшҩцәа шәеихьӡарақәа ирзыҧшуп. Ҳшәықәгәыҕуеит, шәыгәрагьы ҳгоит», - иациҵеит Ахада.

Аҳәынҭқарра ахада ашьапылампыл асыҩцәа ирзеиҕьаишьеит иҟалараны иҟоу ачемпионат аҟны аихьӡарақәа.

Аиҧылара иара убас далахәын Аҧсны Ашьапылампыл асразы афедерациа апрезидент Руслан Аџьынџьал.