Аҧсны Аҳәынҭқарра Ахада

Аҧсны  - изинтәу, идемократиатәу ҳәынҭқарроуп аҟнытә атәыла анапхгара  изҩыдоу аполитикатә еиндаҭлара иазыразуп, убрахь иналаҵаны аоппозициа аусурагьы. Ахада иеиуеиҧшым аполитикатә партиақәеи егьырҭ ауаажәларратә еидгыларақәеи алархәны инарҭбааны аконструктивтә ҟазшьа змоу адиалог дазыхиоуп, иара убри азоуп   изаҧшьигазгьы Аполитикатә абжьгаратә хеилак аҧҵара аидеиа.  

Аха убри аан азинтә ҳәынҭқарра иахәҭакны   иацуп   азакәан аҧыжәара. 2015 шықәса ҧхынгәы 16 рзы Ахада инапы аҵаиҩит Лавренти Амқәаб Аҧсны Атәылахьчара аминистр ихаҭыҧуаҩ имаҵураҟнытә ихы иақәиҭтәразы адҵа. Ари адҵа Л. Амқәаб иганахьала аполитикатә усура аҽалархәра иақәиҭызымтәуа аррамаҵзуҩцәа рыстатус азы Азакәан  аҧҟара аилагара иадҳәалоуп.  Убри адагьы, Л. Амқәаб хырҩа аимҭаӡеит Аҧсны Арбџьар Мчқәа Ркомандаҟаҵаҩхада хаҭала иҟаиҵаз адҵа, ари арратә ҧҟаҧҵәа ҕәҕәала аилагароуп ҳәа иҧхьаӡоуп. Иара убас иазгәаҭатәуп, Л. Амқәаб Атәылахьчара аминистр ихаҭыҧуаҩ имаҵура данаиҭоз Ахада уи иполитикатә гәазыҳәарақәа шгәааимыгӡаз, аха   Л. Амқәаб  иқәнаган азакәани арратә ҧҟаҧҵәақәеи еиламгакәа рықәныҟәара. Абасала, Ахада иӡбамҭа аруаа аполитика раламлареи алеишәа аиламгареи, ар рыҟны аӡәы иеиҳабра азхаҵаны ақәныҟәареи апринцип арҕәҕәара иазкуп.

Аҧсны Ахада ипресс-маӡаныҟәгаҩ