Аҧсны Аҳәынҭқарра Ахада

 

Аслан Бжьаниа Аҧсны Аҩныҵҟатәи аусқәа рминистрра аусзуҩцәа рзанааҭтә ныҳәа рыдиныҳәалеит

10.11.2023

Аслан Бжьаниа Аҧсны Аҩныҵҟатәи аусқәа рминистрра аусзуҩцәа рзанааҭтә ныҳәа рыдиныҳәалеит


Аҧсны  Аҳәынҭқарра Ахада Аслан Бжьаниа Аҩныҵҟатәи Аусқәа рминистрра аусзуҩцәеи аветеранцәеи Амилициа амш рыдиныҳәалеит.

Адныҳәалараҿы, иҳәоуп:

"Ҳаҭыр зқәу аҩныҵҟатәи аусқәа русбарҭақәа русзуҩцәеи аветеранцәеи!

Гәык-ҧсык  ала ишәыдысныҳәалоит шәзанааҭтә ныҳәа.  Ауаажәларратә еиҿкаара ахьчареи, ҳтәылауаа ршәарҭадара ахылаҧшреи, ацәгьоура иаҿагыланы ақәҧареи рыҟны  шәусура хәы амам. Шәара азакәан шәықәныҟәоит, аҭынчра ахьчаразы есыҽны шәыҧсҭазаара ашәарҭара иҭагылоуп. Шәара шәусура ҭакҧхықәрала азнеиреи шәыгәаӷьреи рзы ҳаҭыр ду шәықәуп. Ҷыдала иҭабуп ҳәа расҳәоит аҩныҵҟатәи аусқәа рветеранцәа амилициа аҿиареи ашьақәгылареи рыҟны хәы змаӡам рлагалазы. Шәара шәҧышәеи шәдырреи акырӡа аҵанакуеит Аҩныҵҟатәи аусқәа рминистрра абиҧара ҿа рзы.

Ари амш аҽны ҳара иаҳгәалаҳаршәоит Аҧсны Аџьынџьтәылатә еибашьраҿы 1992-1993ш.ш. рзы Аҧсадгьыл ахьчара зхы ақәызҵаз амилициа аусзуцәа. Аҩныҵҟатәи аусқәа рминистрра 300-ҩык инарзынаҧшуа аусзуҩцәа аибашьра иалахәын, урҭ рахьтә иҭахеит 41-ҩык, Аҧсадгьыл ахьчаразы иаадырҧшыз афырхаҵареи,  агәаӷьреи, рмаҵзура ламыс цқьала анагӡареи рзы 132- ҩык амилициа аусзуцәа  иреиҳау аҳәынҭқарратә ҳамҭа иаҧсахеит, урҭ рахьтә 25-ҩык  - Аҧсны Афырхацәа ҳәа ахьӡ рыхҵоуп.

Агәра згоит аҧхьаҟагьы шәдырреи шәымч-шәылшеи ауаажәларратә еиҿкаара ишадышәҵо, ҳтәылауаа ринтересқәеи рҭынчреи рыхьчара ишырзышәкуа.

Иҭабуп ҳәа шәасҳәоит шәусуразы, шәгәымшәаразы, Аҧсны Аҳәынҭқарра амаҵ ахьазыжәуа.

Ишәзааигәоуи шәареи агәабзиареи, аҭынчреи, аихьӡарақәеи шәзеиӷьасшьоит.

Иара убас, 2023ш.абҵарамза 7 рзы Аҳәынҭқарра Ахада Аусҧҟақәа инапы рыҵаиҩит аҩныҵҟатәи аусқәа  русбарҭақәа русзуцәа "амилициа аполковник" ҳәа ахьӡ рыхҵаразы.

"Амилициа аполковник" ҳәа иҷыдоу ахьӡ рыхҵоуп:

Гагра араион аҩныҵҟатәи аусқәа русбарҭа аиҳабы Аиба Денис Сулҭан-иҧа;

Тҟәарчал араион аҩныҵҟатәи аусқәа рыҟәша аиҳабы Биџьев Арсен Хәсин-иҧа;

Аҧсны Аҳәынҭқарра Аҩныҵҟатәи Аусқәа рминистрра  Ашьаусҧшааратә усбарҭа аиҳабы ихаҭыҧуаҩ Ҷолариа Реналд Грант-иҧа.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org