Аҧсны Аҳәынҭқарра Ахада

 

Аслан Бжьаниа Уфа Башкорҭосҭан амшқәа ирызкыз аныҳәатә усмҩаԥгатәқәа дрылахәын

11.10.2023

Аслан Бжьаниа Уфа Башкорҭосҭан амшқәа ирызкыз аныҳәатә усмҩаԥгатәқәа дрылахәын

Иахьа, жьҭаарамза 11 рзы, Ареспублика Амш азы Аԥсны Ахада Аслан Бжьаниеи Башкорҭосҭан Ахада Ради Хабирови ашәҭқәа шьҭарҵеит башкириатәи апоет, ауаажәларратә усзуҩы Шаихзаде Бабичи амилаҭтә фырхаҵа Салаваҭ Иулаеви рбаҟа амҵан.

Анаҩс Аслан Бжьаниеи Ради Хабирови ашәҭқәа шьҭарҵеит аинрал Минигали Шаимуратови рбаҟа амҵан, иара убас «шаимуратоврахь» ирыдыркылаз 905 –ҩык ашколхәыҷқәа акрызҵазкуа арыцхә рыдырныҳәалеит.
Аслан Бжьаниа ари аусмҩаԥгатә азы игәаанагара иҳәеит. «Схәыҷра сгәаланаршәеит, санпионерыз, санкомҿарыз ашықәсқәа. Арҭ атрадициақәа еиҭа иахьышьҭышәхыз сгәы иахәеит. Избан акәзар ара, уажәы ирызҳауеит Урыстәыла ду, милаҭрацәала еилоу Башкорҭосҭан ажәлар рыхьчара иазхиоу абиԥара», - иҳәеит иара.
Анаҩс аӡиас аԥшаҳәаҟны Аиҩызара абаҟаҟаны Аԥсны Ахада Аслан Бжьаниеи Башкорҭосҭан Ахада Ради Хабирови Аҟәа Амҳаџьырқәа рымҩаҟнеиԥш аколоннада ашьапы акразы ахаҳә ашьҭаҵара иалахәын.
«Асимволтә ҵакы амоуп хыхь игылоу аурыси абашкир жәлари риашьаратә еиҩызара иазку Абаҟа. Уи ргылан Башкириа Урыстәылатәи аҳәынҭқарра хатәгәаԥхарала алалара аныҟалаз аахыс 400 шықәса аҵра инамаданы.
Аиҩызара ҳабжьазароуп есқьынгьы, ҳаицхыраалароуп, аихьӡарақәа ҳреигәырӷьалароуп. Абас ҳарзыҟоуп ҳара акыр иаҳзаԥсоу ҳашьцәа-аԥсуаа. Аколоннада ԥгара зқәым аиҩызара иадырганы иҟалоит. Иҳаҩсыз ашәышықәса  20-тәи ашықәсқәа рзы Поволжие амлакра аныҟаз, Аԥсны фатәыла ацхыраара ҳзыруит. Аџьынџьтәылатә еибашьра ду анцоз ҳаибашьцәа аӡәырҩы Аԥсны ахәышәтәырҭақәа рыҟны ирхәышәтәуан, 90-тәи ашықәсқәа рзы ҳаргьы, абашкирцәа, аԥсуаа агуманитартә цхыраара раҳҭон. Ҳазгәдуны ҳзыхцәажәаша ҳамоуп. Ҳаҭыр ду ақәаҳҵоит Ареспублика амш азы шәахьаҳҭааз. Аколоннада шықәсык ашьҭахь, жьҭаарамза 11 рзы иааҳартуеит», -иҳәеи Ради Хабиров.
Аԥсны Ахада Аслан Бжьаниа иазгәеиҭеит иахьа аҩ-республикак реизааигәахаразы даҽа шьаҿак шыҟарҵаз.
   «Гәахәара дула шәреспублика шьахә саҭааит. Уфа даҽа символтә ҭыԥк ҟалоит. Ареспублика амш шәыдысныҳәалар сҭахуп. Даҽа зныкгьы Башкорҭосҭан ажәлар иҭабуп расҳәоит, ҳаргьы есқьынгьы уи ацкы ҟаҳҵалар ҳҭахуп. Анасыԥ, аҭынчра шәзеиӷьасшьоит», - абас ихиркәшеит Ахада иажәа.
Аусмҩаԥгатәқәа ирылахәын Апарламентбжьаратә еимадарақзәеи аџьынџьуаа рымадареи рзы Аԥсны Жәлар Реизара- Апарламент аилак ахантәаҩы Алхас Барцыц, Аҟәа ақ. Администрациа ахада Беслан Ешба.



Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org