Аҧсны Аҳәынҭқарра Ахада

Аԥсны Аҳәынҭқарра Ахада Аслан Бжьаниа Урыстәыла Афырхаҵа, аҧырҩы - акосмонавт, Москватәи ақалақьтә дума аабатәи ааҧхьара адепутат Олег  Артемьев дидикылеит.

Аслан Бжьаниа Олег Артемьев аҧсшәа иаҳәо, иҭабуп ҳәа еиҳәеит 2022 ш.рзы акосмостә ҧыррақәа раан Жәларбжьаратәи акосмостә станциа ачарҭган аҟны Аҧсны  Аҳәынҭқарратә бираҟ анагара ахьилшаз азы.

«Сара издыруеит ҳауаажәлар рхаҭарнакцәеи Шәареи аиҩызара шшәыбжьоу, Аҧсны шәбара гәахәарала исыдыскылеит»,- иҳәеит  Бжьаниа.

Аҧырҩы - акосмонавт Артемьев Ахада иҭабуп ҳәа еиҳәеит иҟаиҵаз адкыларазы. "Сара ус разҟыс исыман, шәҳәынҭқарра ахаҭарнакцәеи сареи Аҳәынҭқарратә маҵзуразы Урыстәылатәи акадамеиаҟны аҵара рыцысҵон. Даара иҷкәынцәа бзиақәоуп, дареи сареи аиҩызара ҳабжьоуп",- иҳәеит Артемьев.

Аҧырҩы - акосмонавт иазгәеиҭеит абри аиҩызара иадырганы Аҧсны абираҟ акосмос ахь ахагалара шиӡбаз. «Сара акосмос ахь хынтә сҧырхьеит, иара убас шәтәыла сахыҧраахьеит, имҩаҧызгоз аҧыррақәа зегь раан, Аҧсны абираҟ згон, уажәы  урҭ Шәара ишәысҭоит»,- иҳәеит Артемьев.
Аҧсны абираҟқәа аҧырҩы - акосмонавт  акосмос аҟны иҟазаараан иҭихуан, бираҟцыҧхьаӡа Жәларбжьаратәи акосмостә маҵзура ачарҭган иануп ианцази ианаази зырҵабыргуа амҳәыр. «Абираҟ  акосмос аҟны иҟан 2022 ш.  хәажәкырамза 18 инаркны цәыббрамза 22-нӡа. 195 мши ҵхи рыла абираҟ Адгьыл 131млн.км. 16-нтә иакәшеит»,- иҳәеит Артемьев.


Аслан Бжьаниа акосмонавт иҭабуп ҳәа еиҳәеит Аԥсны жәлар рзы инаигӡо амиссиа иамоу аҵакы азгәаҭаны, изеиӷьеишьеит аихьӡарақәа, иҳәеит Аԥсны ҳаҭыр зқәу сасык иаҳасабала есқьынгьы иаара ишазыҧшу.

Акосмонавт иара убас Ахада адырра ииҭеит ҳазҭоу ашықәс азы акосмонавтцәа ротриад иалаларц зҭаху рыдкылара ишалагаз, урҭ рыҩныҵҟа Аԥсны ахаҭарнакцәагьы ибар шиҭаху. Уи Ахада диҳәеит Аԥснынтә Жәларбжьаратәи акосмостә станциаҟны аофициалтә хаҭарнак дҟаларц азы абри аус аҟны ацхыраара ҟаиҵарц, .

Ахада аԥсуа авиаторцәа игәалаиршәеит, урҭ рзанааҭтә зыҟаҵарала акосмос ахь аԥырразы хархәара роургьы шыҟало азгәаҭаны, ажәагьы ииҭеит ари аидеиа анагӡаразы.  

Олег Артемьев иҳәеит Аԥснынтә амаамынқәа 12 акосмос ахь идәықәызҵаз Аԥышәаратә патологиеи атерапиеи ринститут ишаҭааз.
  
Аиԥылара ахыркәшамҭаз аганқәа агәаларшәагатә ҳамҭақәа еимырдеит.

Аԥырҩы-акосмонавт иԥылараан ицын Аҳәынҭкорпорациа "Урыскосмос" Административтә департамент Аспециалист хада Алексеи Чувильскии И.Папасқьыр ихьӡ зху Аԥснытәи амилаҭтә библиотека адиректор  Борис Ҷолариеи.