Аҧсны Аҳәынҭқарра Ахада

Аҧсны Аҳәынҭқарра Ахада Аслан Бжьаниа Александр Лукашенко Беларусиа Ареспублика Ахьыҧшымра амш идиныҳәалеит.

Адныҳәалараҿы, ҷыдала, иҳәоуп:

«Ҳаҭыр зқәу Александр Григори-иҧа!
Гәык-ҧсык ала ишәыдысныҳәалоит Беларусиа Ареспублика Ахьыҧшымра амш. Ари аныҳәа атәыла аиҭаира иасимволуп, уи Аџьынџьтәылатә еибашьра дуӡӡа аан асолдаҭцәа рфырхаҵарала аҭоурых наунагӡа ианылаз абеларус жәлар еицакра зқәым рдоуҳамч шаҳаҭра азнауеит.
Абри амш аҽны, 79 ш.раҧхьа, Беларусиа аҳҭнықалақь ахы иақәиҭтәын, анемец - фашисттә мпыҵахалаҩцәа ҧыххааса иқәҵан. Минсктәи аоперациа зыҩаӡара ҳараку арратә ҟазаразы иҿырҧшы ӷәӷәаны иҟоуп.
Тәылак иахәҭакны иҟаз Аҧсни Беларусиеи еидгыланы иаҳзеиԥшыз ӷа иҿагылеит, еидгыланы аҭынч ҧсҭазаарагьы аиҭашьақәыргылара иаҿын. Аҧсны жәлари абеларус жәлари ирыбжьоу аҭоурыхтә еимадара ҩ-ганктәи аизыҟазаашьақәа рыҿиара уасхыр дуны иазышьҭоуп. Агәра згоит, имҩаԥысуа аҿиара хымԥада Аҧсни Беларусиеи рыжәларқәа рыгәҭакқәа шырныԥшуа.
Аҭагылазаашьа схы иархәаны, Александр Григори-иҧа, абеларус жәларгьы Шәаргьы ишәзеиӷьасшьоит аҭынчра, аизҳазыӷьара, аихьӡарақәа».