Аҧсны Аҳәынҭқарра Ахада

Аԥсны Аҳәынҭқарра Ахада Аслан Бжьаниа І-тәи Аԥснытәи амедицинатә форум алахәцәа дрыдныҳәалеит.

Афорум иалахәуп Ахада Ихаҭыԥуаҩ Бадра Гәынбеи Аԥсны Ахада Иадминистрациа  Анапхгаҩы Џьансыхә Нанбеи.

Афорум иалахәыз рзы Ахада ихьӡала адныҳәалара даԥхьеит Аԥсны Ахада Иадминистрациа Анапхгаҩы Џьансыхә Нанба.

«І-тәи Аԥснытәи амедицинатә форум еиднакылаз зегьы ишәыдысныҳәалоит уи алахәцәеи аусура амшхәаԥш рылеи ҳҳәынҭқарразы аҵак ду змоу ахҭыс.
Ҳазҭагылоу аамҭазы Аԥсны аԥсҭазааразы, аԥсшьаразы, агәабзиара аиҭашьақәыргыларазы иреиӷьу аҭыԥқәа иреиуоуп. Ари азы ара имҩаԥган ақәранҵыра ду афеномен аҭҵаара, иалыршан аҭыԥ афизико-географиатә ҭагылазаашьа, аргылареи акурорт-гәабзиарачаԥарҭатә инфраструктура рыҿиара. Акырџьара ари аҭынха ду аиқәырхарагьы ҳалҳаршеит.

Иахьа имҩаԥысуа І-тәи Аԥснытәи амедицинатә форум апрограммаҟны иақәнагоу аҭыԥ ааныркылоит агәабзиара аиҭашьақәыргылара, асанаториатә-курорттә ҿиара, ауааԥсыра ргәабзиара аиҷаҳара – абри зегьы, Аԥсны иаҭахны иҟоу, зырҿиара алшо иналукааша урыстәылатәи аҭҵаарадырратәи амедицианатәи усбарҭақәеи аколлектиқәеи ралахәрала.  

Афорум иалахәу реилазаара иаҳәоит аҭҵаарадырратәи амаҵзуратәи медицина иамоу аҿиара аԥеиԥш, Аԥсны иамоу акурорттә-гәабзиарачаԥарҭатә лшара ду атәы аҭыԥантәи еиԥш, жәларбжьаратәи аҩаӡараҟынгьы.
Иҭабуп ҳәа расҳәоит аиҿкааҩцәеи алахәцәеи иаадырԥшыз азҿлымҳареи рзы.
Сара агәра згоит ари афорум аус дуқәа ирылагамҭаны ишыҟало, иреиӷьу аҭҵаарадырратәи амедицинатәи коллективқәа рылшарақәа еибыҭаны, аҭҵаарадырреи, атехнологиақәеи, апрактикеи, насгьы, раԥхьа инаргыланы, ари  аусура алҵшәақәа зызку ауаа рзи хәарҭа ду аманы иҟалоит.