Аҧсны Аҳәынҭқарра Ахада

 

Аԥсны Ахада УА Афедералтә Еизара Аҳәынҭқарратә Дума Ахантәаҩы Виачеслав Володин дидикылеит

01.12.2022

Аԥсны Ахада УА Афедералтә Еизара Аҳәынҭқарратә Дума Ахантәаҩы Виачеслав Володин дидикылеит

Имҩаԥысит Аԥсны Аҳәынҭқарра Ахада Аслан Бжьаниеи Виачеслав Володин напхгара ззиуа УА Афедералтә Еизара Аҳәынҭқарратә Дума аделегациеи реиԥылара.
Аҳәынҭқарра Ахада асасцәа аҧсшәа раҳәо, иазгәеиҭеит аҩ-ҳәынҭқаррак рыбжьара аимадара арҿиара, иара убас апарламентбжьаратә усеицура аԥхьаҟа аиҳахара иамоу аҵакы.
"Ҳара ҳзы гәахәароуп ҳаиашьаратә Урыстәыла ахаҭарнак, Урыстәыла зегь реиҳа зыҩаӡара ҳараку анапхгаҩы дсасны дахьаҳҭоу. Агәра згоит Шәара шәаара ҳаимадара даҽакала арҿыхара шалшо, ишәымоу аҧышәа ду, хымҧада, уажәраанӡа иаҳзымыӡбац азҵаарақәа рыӡбара ишацхраауа. Убри аҟынтә, Шәара шәаара, Урыстәылеи Аҧсни рыжәларқәа ринтересқәа ишрызкхо, ҳгәаанагарақәа реизааигәатәра ишацхраауа, алҵшәақәа рыманы ишыҟанаҵо. Бзиала шәаабеит, Аҧсны. Иҭабуп, Шәара шәахьаҳҭааз", - иҳәеит А. Бжьаниа.  
Аҳәынҭқарра Ахада Урыстәыла анапхгара иҭабуп ҳәа реиҳәеит иааиԥмырҟьаӡакәа иҟарҵо ацхырааразы.

"Аҵыхәтәантәи амчыбжьқәа рзы афымцамч инамаданы ауадаҩрақәа ҳаман, аха Урыстәыла анапхгара иабзоураны ари ауадаҩра аҧыхын",-иҳәеит Ахада.

Аҳәынҭқарратә Дума Ахантәаҩы Аҧсны Ахада иҭабуп ҳәа еиҳәеит аиҧыларазы. «Ҳара ҳтәылақәа ҳанрылацәажәо, ҳаизыҟазаашьақәа аиҩызаратәи, астратегатәи ҟазшьа шрымоу ҳасаб азаҳаулароуп. Аизыҟазаашьақәа реизырҳара амҩақәҵара зылшо   аҳәынҭқарра Ахадацәа. Ҳара хықәкыс иҳамоу - иҳадаҳкыло азыӡбақәа  закәанла реиқәыршәароуп. Арҭ азҵаарақәа лыҵшәа рыманы иҳаӡбароуп", - иҳәеит Виачеслав Володин.
Иара иажәақәа рыла, ахархәара рзутәуп "иҿыцу аформатқәа апарламенттә шәага-загақәа рҳәаа иҭагӡаны, ҳтәылауаа ринтересқәа ирықәыршәаны азҵаарақәа рыӡбаразы, ҳҳәынҭқаррақәа рыбжьара аизыҟазаашьа аҿиара рымазарц азы".

Аиԥылара иалахәын: аԥсуа ган аҟнытә – Аԥсны Жәлар Реизара – Апарламент Аиҳабы Лаша Ашәбеи, Аԥсны Ахада Иадминистрациа Анапхгаҩы
Џьансыхә Нанба; урыстәылатәи аган аҟнытә  – Аҳәынҭқарратә Дума Ахантәаҩы ихаҭыԥуаҩ Сергеи Неверов, Ихьыԥшым Аҳәынҭқаррақәа Реиҩызара аусқәеи, евразиатәи аинтеграциеи, аџьынџьуаа рымадареи рзы Аҳәынҭқарратә Дума аилак ахантәаҩы Леонид Калашников, Аԥсны Аҳәынҭқарраҟны иҟоу УА Аҷыдалкаатәи Азинмчи змоу Ацҳаражәҳәаҩ Михаил Шургалин.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org