Аҧсны Аҳәынҭқарра Ахада

Аԥсны Аҳәынҭқарра Ахада Аслан Бжьаниа Урыстәылатәи Афедерациа Афедералтә Еизара Аҳәынҭқарратә Дума Ахантәаҩы ихаҭыҧуаҩ Сергеи Неверов дызлахәыз аиҧылара мҩаҧигеит.

Аиҧылара аҳәаақәа ирҭагӡаны ирылацәажәеит Аҧсни Урыстәылеи рыбжьара ҩ-ганктәи аусеицура иадҳәалаз азҵаатәқәа.

Аизыҟазаашьақәа рыҩаӡара ҳаракы азгәаҭаны, аҳәынҭқарра Ахада иаҵшьны иҳәеит, астратегиатә еидгылара арӷәӷәара иамоу аҵакы. "Ҳара аҵак ду аҳҭоит Аҧсны Апарламенти Аҳәынҭқарратә Думеи русеицура. Гәахәара дуа ҳацклаҧшуан Аҧсны аделегациа Урыстәыла Аҳәынҭқарратә Дума аҭаара. Жәаҳәарада, ари ҳаиашьареи ҳаиҩызареи ртәы аҳәоит",- иҳәеит Ахада.

Сергеи Неверов иганахьала аҳәынҭқарра Ахада иҭабуп ҳәа еиҳәеит иҟаиҵаз адкыларазы. Иара иазгәеиҭеит ҩ-ҳәынҭқаррак рыбжьара аиқәшаҳаҭра алыршара иазку еиуеиҧшым ахырхарҭақәа рыла Аҧсны Апарламент аус ацура аҧхьаҟагьы ишазхиоу.

Аиҧылара иалахәын Аҧсны Жәлар Реизара Аиҳабы Лаша Ашәба, Аиҳабы ихаҭыԥуаҩ Асҭамыр Аршба, Ахада Иадминистрациа Анапхгаҩы Џьансыхә Нанба, Аҧсны иҟоу Урыстәыла Ацҳаражәҳәаҩ Михаил Шургалин.