Аҧсны Аҳәынҭқарра Ахада

 

Аԥсны Аҳәынҭқарра Ахада Аиааиреи Ахьыԥшымреи рымш азы Аԥсны жәлар ааԥхьара ҟаиҵеит

30.09.2022

Аԥсны Аҳәынҭқарра Ахада Аиааиреи Ахьыԥшымреи рымш азы Аԥсны жәлар ааԥхьара ҟаиҵеит

Аԥсны Аҳәынҭқарра Ахада Аслан Бжьаниа Аиааиреи Ахьыԥшымреи рымш азы Аԥсны жәлар ааԥхьара ҟаиҵеит.

Ҳаҭыр зқәу ҳауажәлар! Ҳаҭыр зқәу аветеранцәа! Акыр иаԥсоу аҩызцәа!

Ишәыдысныҳәалоит милаҭрацәала еилоу ҳажәлар зегьы рзы аныҳәақәа ирныҳәоу – Аиааиреи Ахьыԥшымреи рымш!
413 ҵхи-мши еихсыӷьрада ицон Аԥсны жәлар рџьынџьтәылатә еибашьра. Ари аибашьра иаҳцәалаӡит иреиӷьыз ҳҵеицәа, арԥарцәа, аҭыԥҳацәа. Еиҭаҳәашьа амам Аԥсны ахьчаҩцәа иаадырԥшыз афырхаҵара.  
Ҳфырхацәа, ҳаибашьцәа ирыбзоураны Аԥсны ақәӡаара иацәыхьчан, еиқәырхан.

Аԥсуа жәлар ирывагылан жәҩахыреибыҭарала егьырҭ ажәларқәа рхаҭарнакцәагьы, Аԥсадгьыл ахьчаразы игылеит ҳџьынџьуаа – амҳаџьырқәа рхылҵшьҭрақәа.

Хаз ҷыдала иалыскаар сҭахуп Аҩадатәи Кавказ аҟнытә иаҳзааз хатәгәаԥхаралатәи аибашьцәа. Аԥсуаа ахаан ирхашҭраны иҟаӡам ҳашьцәа адыгақәа, ачерқьесцәа, абазақәа, ауаԥсаа, аҟабардақәа, аингәышцәа, ачеченцәа, даӷьысҭанаа, уҳәа егьырҭ ажәларқәа рхаҭарнакцәа рфырхаҵара.

Ахә ашьара уадаҩуп ақырҭуа фашизм аҿагылараҟны, аиааира аагараҿы шәара шәгәымшәара, шәыгәаӷьра.
Аԥсуа архәҭақәа ирылагыланы фырхаҵарыла еибашьуан Алада Урыстәыла аказакцәа, Урыстәыла егьырҭ арегионқәа рыҟнытә хатәгәаԥхаралатәи аибашьцәа, хьӡи-ԥшеи згым Донбасси Приднестровиеи рҵеицәа.

Аиааира Амш – ахьааи агәырӷьареи зцу ныҳәоуп. Ари аҽны ҳара иаҳгәалаҳаршәоит ҿыц игыло абиԥарақәа рԥеиԥш лаша ахьӡала игылаз, уи зхы ақәызҵаз, фырхаҵарала иҭахаз зегьы. Урҭ рыхьӡ кашәара ақәым! Ахааназы ргәалашәара лаша ҳацзаауеит Аԥсны аизҳазыӷьаразы зхы иамеигӡаз зегьы хаҭа-хаҭала.

Иахьа даҽа аамҭанык еиԥшымкәа иаҭахуп аидгылара, ажәҩахыр еибыҭара Аԥсны аизҳазыӷьара ахьӡала. Ҳазегьы ҳаидгыларала хықәкы хадас иҳамоу – ҳажәлар аԥеиԥш, анасыԥ рыманы иҿио аҟаҵара ҳалшоит.

Акыр иаԥсоу ҳауаажәлар! Иԥшьоу абри аныҳәа аҽны ишәзеиӷьасшьоит аҭынчра, аизҳазыӷьара, ахирра.
Ҽаанбзиала шәнеиааит!
Шьардаамҭа Аԥсынра!


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org