Аҧсны Аҳәынҭқарра Ахада

 

Имҩаԥысит Аԥсны Аҳәынҭқарра Ахада Аслан Бжьаниеи Беларус Ареспублика Ахада Александр Лукашенкои реиԥылара

28.09.2022

Имҩаԥысит Аԥсны Аҳәынҭқарра Ахада Аслан Бжьаниеи Беларус Ареспублика Ахада Александр Лукашенкои реиԥылара

Имҩаԥысит Аԥсны Аҳәынҭқарра Ахада Аслан Бжьаниеи Беларус Ареспублика Ахада Александр Лукашенкои реиԥылара.

Аиԥылара мҩаԥысит Пицунда аҳәынҭқарратә дачаҟны.

Беларус Ахада аԥсшәа иаҳәо, Аслан Бжьаниа иҳәеит: «Бзиала уаабеит, Александр Григори-иԥа! Шәара Аԥсны есқьынгьы иззыԥшу ҳасасцәа шәыруаӡәкуп».

Аԥсны Ахада игәаларшәаны иҳәеит 1996 шықәса ажьырныҳәамзазы ИАР алахәцәа - аҳәынҭқаррақәа рхадацәа Рхеилак аҟны Александр Лукашенко Аԥсны аибашьрашьҭахьтәи аекономикатә блокада даҿагыланы дшықәгылаз.
«Аԥсны аҟәыҭхара, аекономикатә блокада аҭакразы азыӡба иашаӡам шәҳәеит. Аԥсны ари атәы рдыруеит, ҳаҭыргьы ақәырҵоит. Ҳара ауаатәҩсатә еизыҟазаашьа бзиақәа ҳабжьоуп. Шәаара гәахәара дула иҳадаҳкылеит», - иазгәеиҭеит А. Бжьаниа.

Аԥсны Ахада иҳәеит Беларус Ахада Аԥсныҟа иаара ҩ-жәларык реизыҟазаашьа аҿиара ишацхраауа. «Ҳаизыҟазаашьақәа, хымԥада, асоветтә аамҭазы ишыҟаз еиԥш ишьақәҳаргылоит. Бзиала шәаабеит ҳәа шәаҳҳәоит Аԥсны!"

Александр Лукашенко иҭабуп рхиҳәааит Аԥсны Ахада иажәа ԥхақәа.

«Агәхьаагара есқьынгьы иҳамазаауеит. Акыр ҵуеит уи аахыс, 25-27 шықәса схыҵуазар ҟаларын усҟан, иԥшьоу ари адгьыл аҟны саахьан. Иуҳәар ауазар, баша уаҩык, Апарламент адепутат иаҳасабала.
Иацы Аԥсны апроблемақәа ҳрылацәажәон ҳашьеиҳаб Владимир Владимир-иԥа Путини сареи. Акыраамҭа, иаахәлаанӡа арҭ азҵаарақәа ҳрылацәажәон, лкаак ҳагьазааит, Аԥсны ҳазкажьӡом. Иацхраалатәуп ишәҭыкакаҷуа ари атәыла, уи иқәынхо ауааԥсыра аԥсҭазаара бзиа рымазарц азы», - иҳәеит Александр Лукашенко.  

Беларус Ахада иажәақәа рыла, Аԥсныҟа иаара ҭагылазаашьа ҷыдак иадҳәаланы иҟаӡам.  

«Ҳара ҳаҟны аҭагалызаашьа цәгьаӡам. Агеополитика ҳаргәамҵуа ҳаҟаӡам. Ҳаргьы шәара шәеиԥш, ҭынч анхара, анҵыра зҭаху жәларуп, ҳәоуеиқәшәарала ҳаҟазар ҳҭахуп. Аекономика атәы ҳҳәозар, ахәаахәҭра-економикатә еимадарақәа ҳаизыҟазаашьақәа уасхырс ироуроуп. Даҽакала ҟалашьа амаӡам», - иазгәеиҭеит Лукашенко.

Беларус Ахада Аслан Бжьаниа идигалеит аԥхьаҟа реизыҟазаашьақәа шышьақәыргылатәу, урҭ рырӷәӷәаразы иҟаҵатәу уҳәа иалацәажәарц.
  
«Сара аԥышәа ду змоу уаҩуп, аполитикаҟны сыҟоуижьҭеи шьҭа акыр шықәса ҵуеит. Ҳаицәажәап, аԥхьаҟа ҳаԥсҭазаара аиҿкаашьа ҳазхәыцып. Ара ихадароу, ажәлар ирықәнагоу аԥсҭазаара рымазароуп, избан акәзар ари иԥшьоу дгьылуп, иқәынхо ауаагьы уаа цқьақәоуп. Уи сара исгәалашәоит асоветтә аамҭазы ара саныҟаз инаркны. Убри аҟнытә аиҩызара ацҳақәа ҳабжьаҵара мацара адагьы, аҵак ду змоу аизыҟазаашьақәа ҳабжьаҳҵар ҳҭахуп», - иаҵшьны иҳәеит Лукашенко. Уи иазгәеиҭеит Беларуси Урыстәылеи еизҵааны, еиқәшаҳаҭрала ргәаанагарақәа шышьақәдыргыло.  

«Урыстәыла иахьа ажәҩахыр аҭара иазхиоуп. Аамҭа ааизар ҟалап. Иахьа даҽа аамҭанык еиԥшымкәа, иаҳбартә иҟалеит адунеи зеиԥшрахаз. Ҭынч анхара ҳарҭараны иҟаӡам. Убри аҟнытә аиҩызара ҳзызуа рыҟны ҳаизыҟазаашьақәа рырӷәӷәара ҳалагароуп», - иҳәеит иара.

Аԥсны Ахада Аслан Бжьаниа дақәшаҳаҭхеит адунеи аҟны аҭагылазаашьа акыр ишыуадаҩу. «Ҳара ицо ахҭысқәа азҿлымҳара ду раҳҭоит. Аԥсны иқәынхо дарбанзаалак ари игәы арҭынчуам. Шәара ижәдыруазар ҟалап, ҳтәылауаа иахьа Донбасс ишеибашьуа. Рыцҳарас иҟалаз, иҭахазгьы ыҟоуп», - иҳәеит А. Бжьаниа.  

Анаҩс, Ахадацәа реиԥылара мҩаԥысит хазы, ашәқәа раркрала.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org