Аҧсны Аҳәынҭқарра Ахада

 

Ахада Ауаажәларратә палата алахәцәеи ауаажәларратә еиҿкаарақәа рхаҭарнакцәеи алархәны аиԥылара мҩаԥигеит

05.09.2022

Ахада Ауаажәларратә палата алахәцәеи ауаажәларратә еиҿкаарақәа рхаҭарнакцәеи алархәны аиԥылара мҩаԥигеит

Аҧсны Аҳәынҭқарра Ахада Аслан Бжьаниа аиҧылара мҩаҧигеит Ауаажәларратә палата алахәцәеи ауаажәларратә еиҿкаарақәа рхаҭарнакцәеи алархәны.
Аиҧылара иалахәын Ахада Ихаҭыҧуаҩ Бадра Гәынба, аҧыза-министр Алеқсандр Анқәаб, Ахада Иадминистрациа Анапхгаҩы Џьансыхә Нанба, Ашәарҭадара ахеилак амаӡаныҟәгаҩ Сергеи Шамба, Ахада Иадминистрациа анапхгаҩы ихаҭыҧуаҩ Зураб Қаџьаиа, Сократ Џьынџьал, Руслан Ҳашыг, Витали Смыр, Михаил Сангәлиа, Абессалом Кәарҷиа, Леуан Миқаа, Вианор Ашба, Геннади Ҵәыџьба, Руслан Ладариа, Мураҭ Аџьба.
Иалацәажәеит Аҧсны Аҳәынҭқарра адгьылҵакыраҿы иҟоу аобиект Урыстәылатәи Афедерациа ахатәтәразы аҭареи уи ахархәаразы аԥҟарақәеи рзы Аҧсны Аҳәынҭқарра Аиҳабыреи Урыстәылатәи Афедерациа Аиҳабыреи ирыбжьоу Аиқәшаҳаҭра азҵаара.

Аҳәынҭқарратәи аполитикатәи усзуҩы, Ауаажәларратә палата алахәҩы Сократ Џьынџьал аҳәынҭқарра Ахада иҭабуп ҳәа иеиҳәеит абас еиҧш иҟоу аформат ала аиҧылара амҩаҧгаразы Ауаажәларратә палата иҟанаҵаз ажәалагала иаарласны иахьақәҿиҭыз азы.

"Ҳара ауаажәларра рҳәоуеиқәшәара алҳаршароуп.  Ҳара ҳтәы, шәара шәтәы, ипатриоту, ипатриотым, амчра  иатәу, аопозициа иадгылоу ҳәа ҳҽеиҩҳамшароуп, аха иҟоуп еиуеиҧшым аформақәа. Убри аҟынтә ас еиԥш аиҧыларақәа аҵак ду рымоуп, избан акәзар абас еиҧш иҟоу аформат ала иалшоит иҵару иактуалтәу апроблемақәа рыӡбара", - иҳәеит С.Џьынџьал.

Аиҿцәажәара иалахәыз агәҭынчымра шрымоу рҳәеит Аиқәшаҳаҭраҟны аҧсуа ган аинтересқәа нагӡаны иарбам ҳәа, насгьы дара ргәаанагарала, адгьылқәа рыцәтәымтәреи рыҭиреи ҟалашьа шрымам.
Аҳәынҭқарра Ахада ишьақәирӷәӷәеит адгьыл ҭыҧқәа рыҭира мамзаргьы рыцәтәымтәра шыҟам, урҭ Урыстәылатәи Афедерациа аганахьала изинмкәа рхархәара атәы алацәажәара шҵаҵӷәыдоу.

Аиҧылара мҩаҧысуан ҩ-сааҭк инацны. Ахада ажәалагала ҟаиҵеит Ахада Иадминистрациа аҟынтә азиндырҩцәеи ауаажәларратә усзуҩцәа ирыдыргало акандидатурақәеи алархәны адокумент хәҭаҷцыԥхьаӡа аекспертиза иахзыжьуа аусуратә гәыҧ аҧҵаразы.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org