Аҧсны Аҳәынҭқарра Ахада

 

Имҩаԥысит Аԥсны Ахадеи ШЬАР аҳәаанырцә иҟоу аџьынџьуаа русқәа рзы аминистр Феисал Микдади реиԥылара

25.08.2022

Имҩаԥысит  Аԥсны Ахадеи ШЬАР аҳәаанырцә иҟоу аџьынџьуаа русқәа рзы аминистр Феисал Микдади реиԥылара

Аҧсны Аҳәынҭқарра Ахада Аслан Бжьаниа Аҧсны официалтә визитла иаҭааз Шьамтәылатәи Арабтә Республика аҳәаанырцә иҟоу аџьынџьуаа русқәа рзы аминистр Феисал Микдад дидикылеит.

  Аҳәынҭқарра Ахада асасцәа аҧсшәа раҳәо, иазгәеиҭеит:

"Ҳаҭыр зқәу аминистр, ҳаҭыр зқәу асасцәа, бзиала шәаабеит ҳәа шәаҳҳәоит Аҧсны Аҳәынҭқарраҟны. Агәра згоит, шәара шәаара ҳаизыҟазаашьақәа рыҿиара даҽа мчык шрырҭо. Аҧсуа делегациа иалахәызгьы саргьы 2021ш. рзы Дамаск ҳаҟазаара агәалашәара ҧхақәа ҳзынрыжьит.
Ҳара аҵак ду аҳҭоит Шьамтәылатәи Арабтә Республика аҟынтә ас еиҧш иҟоу аделегациа раҧхьаӡа акәны раара, иара убас иаҳҳәар ҳҭахуп Шьамтәыла анапхгареи аиҳабыреи егьырҭ  ахаҭарнакцәагьы иаарласны рыдкыларазы агәаҳәара шҳамоугьы.
Аҳәара ҟасҵоит, Иаҳаракыра,  Шьамтәылатәи Ахада, сҩыза Башар Асад Аҧсны аҭааразы ааҧхьара шиаҳҭо ҳазиашәҳәарц.
Аҧсни Шьамтәылеи ирыбжьоу адипломатиатә еизыҟазаашьақәа шықәсқәак ракәзар ирхыҵуа, ҳажәларқәа ирыбжьоу аизыҟазаашьақәа аҭоурых ду рымоуп. Убас, ҳажәларқәа реимадара алзыршаз дыруаӡәкуп зыхьӡ нагоу  аинрал Уалид Маршьан. Агәра згоит, ҳаимадара аԥхьаҟа есааира ишыӷәӷәахо.
Ҳтәылақәа ирыбжьарҵеит "Аиҩызареи аусеицуреи рзы аиқәшаҳаҭра", иара убас жәларбжьаратәи аиқәшаҳаҭрақәа фба, ҳзакәанҧҵаратә усбарҭақәеи ҳтәылахьчаратә усҳәарҭақәеи уахь иналаҵаны.
Аусура мҩаԥысуеит Аекономикатә, ахәаахәҭратә, аҭҵаарадырратә, атехникатә, акультуратә усеицуразы еицаҳзеиҧшу аҧсны-шьамтәылатәи аилак. Азеиҧш еилакы аҳәаақәа ирҭагӡаны активла аусура мҩаҧысуеит, анапаҵаҩра азырхиара иаҿуп  акультуреи, ақыҭанхамҩеи, аҵараиуреи, аҳазалхратә уси, ахәаахәҭреи, аспорти рзы аиқәшаҳаҭрақәа фба, аԥкаанҵақәа, амеморандумқәа.
Ҳара аҵак ду аҳҭоит аинвестициатә еимдарақәа рхырхарҭала аусура, иара убас атранзиттәи аексперттә хәаахәҭратә лшара рхархәара.
Ҳаҭыр зқәу аминистр, аколлегацәа, иахьа иаҵаҩуп "Аҧсны Аҳәынҭқарра адәныҟатәи аусқәа рминистрреи Шьамтәылатәи Арабтә Республика адәныҟатәи аусқәеи аҳәанырцә иҟоу аџьынџьуаа русқәеи рзы аминистрреи рыбжьара аполитикатә еилацәажәарақәа русхк аҟны аилибакааразы Амеморандум". Аҧсны азхиоуп жәларбжьаратәи аҭыҧқәа зегьы рҟны Шьамтәыла аус ацура, иара убас агәыӷрагьы аанарҧшуеит Шьамтәыла ҩызара азызуа Ааигәа Мрагыларатәи атәылақәа рганахьала аимадарақәа рырҭбаараҟны Шьамтәыла адгылара шыҟанаҵо азы.
Урыстәыла иҟоу Шьамтәылатәи ацҳаражәҳәаҩ Риад Ҳаддад Аҧсны даҭаахьеит, ҩаҧхьа ҳтәылаҿы ибара ҳаигәырӷьоит.   Шәара, ҳаҭыр зқәу аминистр, аделегациа иалахәу зегьы, ҳгәы иаанагоит Аҧсны аҭаара агәахәара шәнаҭап ҳәа.  
Бзиала шәаабеит!”

ШЬАР аҳәаанырцә иҟоу аџьынџьуаа русқәа рзы аминистр Феисал Микдад аҳәынҭқарра Ахада иҭабуп ҳәа еиҳәеит иҟаиҵаз адкыларазы.
«Ахадацәа ҩыџьа ирыбжьоу аиҩызара аҩ-тәылак ирыбжьоу аизыҟазаашьақәа аԥеиԥш бзиа шрымоу азы ҵаҵӷә дуны иҟоуп.
Ишыҟоу иаартны исҳәарц сҭахуп иахьа, аԥсуа гани ҳареи ҳаиҿцәажәара анымҩаԥысуаз еиуеиԥшым аҭыԥқәа ҳахьырҭаауаз Дамаск иҟоу аҭыԥқәа шугәаладыршәо.
Ааигәа Шьамтәыла шәшыҟазгьы, иаарласны Дамаск шәнеира иазыԥшуп. Шьамтәыла Ахада ҳаҭырла изышәыцҳауа ааԥхьара исҭаанӡа, иҟашәҵо ааԥхьара гәахәарыла ишидикыло атәы шәасҳәарц сҭахуп.  Ахада шәхацкы, ишазгәашәҭаз еиԥш, ҳаизыҟазаашьақәа аҭоурыхтә ҵакы рымоуп, хымԥада.  Шьамтәыла ашьа азказҭәаз афырхацәа сгәалашәацыԥхьаӡа – урҭ хылҵшьҭрала Аԥснытәиқәуп, ҳара хаз-хазы иҟоу жәларуп ҳәа исыԥхьаӡом, шәаргьы ҳаргьы жәларык ҳауп.
Иахьа исыцу аделегациа зегьы ахьӡала иҭабуп ҳәа шәасҳәарц сҭахуп иҟашәҵаз асасдкыларазы, Аԥсны адгьылҵакыраҟны имҩаԥыжәгаз аиԥыларақәа рзы, иахьа инаҳагӡо апрограммазы. Аминистр Инал Арӡынбеи сареи ҳаиҿцәажәараан избеит зегьы рыла ҳгәаанагарақәа шеиқәшәо.
Аҭакԥхықәра зегьы ҳацҳаражәҳәаҩцәа ирыдҳамҵап, ҳаиԥыларақәа раан ҳаззааиз апунктқәа зегьы рынагӡаразы зегь рыла ҳрыцхраалоит.
Аԥсны ахьыԥшымра иахҭынҵоу даара ирацәоуп. Уи ахьчараҟны ҳаицхыраалоит.
Сара агәра згоит ҩ-ганктәи ҳаизыҟазаашьақәа аҿиара шроуа, сгәы иаанагоит ҳҳәынҭқаррақәа рхадацәа урҭ рынагӡара хылаԥшра арҭалоит ҳәа. Сколлегацәагьы саргьы иҳалшо зегьы ҟаҳҵалоит ҳара ҳганахьала иҳаду зегьы анагӡаразы».
Анаҩс аиԥылара мҩаԥысит ажурналистцәа ралархәрада.

Аофициалтә еиԥылара ашьҭахь Аслан Бжьаниеи Фаисал Микдади агәаларшәагатә ҳамҭақәа еимырдеит.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org