Аҧсны Аҳәынҭқарра Ахада

 

Аслан Бжьаниа Хатәгәаԥхаралатәи аибашьҩы имш аҽны Ааԥхьара ҟаиҵеит

15.08.2022

Аслан Бжьаниа Хатәгәаԥхаралатәи аибашьҩы имш аҽны Ааԥхьара ҟаиҵеит

Аԥсны Аҳәынҭқарра Ахада Аслан Бжьаниа Хатәгәаԥхаралатәи аибашьҩы имш аҽны Ааԥхьара ҟаиҵеит.

Ҳаҭыр зқәу ҳауаажәлар,

Акыр иаҳзаԥсоу хатәгәаԥхаралатәи аибашьцәа,

Сынтәа, нанҳәамза 14 рзы 30 шықәса ҵит 1992-1993 шш. Аԥсны Аԥсны Аџьынџьтәылатә еибашьра иалагеижьҭеи. Аибашьра ианалага аҩбатәи амш инаркны ҳхала ҳаанырмыжьит,  аиашьа ижәҩахыр ҳныныртә иҟарҵеит Аҩадатәи Кавказнтәи ацхыраарзы иаҳзааз аҟабарда жәлар рҵеи иаша Султан Асланбек-иԥа Сосналиев ԥызара ззиуаз раԥхьаӡатәи хатәгәаԥхаралатәи аибашьцәа.


Аҩада Кавказынтә, мшын нырцәынтәи ҳашьцәа, Алада Урыстәылантә, Алада Уаԥстәыла Ареспубликеи Приднестровиатәи Молдавиатәи Ареспубликеи рыҟнытә иааит аимҵәаҩ иҿагыларазы ақәԥараҟны иҳадгыларц . Аҭынчреи аиашеи иазықәԥоз иаадырԥшыз агәымшәареи афырхаҵареи ирыбзоураны иҳалшеит Аԥсны ахы иақәиҭтәны ахьыԥшымра ашьақәыргылара.
Аԥсны Аџьынџьтәылатә еибашьра иалахәын 2000 инареиҳаны хатәгәаԥхаралатәи аибашьцәа. 250-ҩык иреиҳауп ҳаԥсадгьыл ахақәиҭтәра зхы ақәызҵаз. Хашҭра рықәӡам Аԥсни аԥсуа жәлари зхы рықәызҵаз арҭ аибашьцәа, ҳхырхәоит урҭ иаадырԥшыз афырхаҵара аҿаԥхьа.
Хатәгәаԥхаралатәи аибашьцәа реидгыла иаанарԥшит аиашьа ижәҩахыр, ицхыраара закәу. Уи ҳажәлар ргәы шьҭнахит, Аиааира агәрагара рнаҭеит. Ари аԥхьаҟатәи абиԥарақәа рзы Аԥсадгьыл ахьӡала агәымшәареи ахамеигӡареи рзы иҿырԥшыганы иҟалеит. Иҭабуп ҳәа раҳҳәоит Афырхацәа иашақәа зхылҵыз, изааӡаз аҭаацәа.

Акыр иаҳзаԥсоу хатәгәаԥхаралатәи аибашьцәа, Аԥсны жәлар ахаангьы ирхашҭраны иҟаӡам аиашьара ижәуыз атәы, ахә ҳаракны иршьоит ҳаидгылара. Ҳәарада, иаҳа ианыуадаҩыз аамҭазы иааны иҳадгылаз ажәларқәа ҳареи ҳаизыҟазаашьақәа еиқәҳархароуп, аԥхьаҟагьы еихаҳҳалароуп.

Рыцҳарас иҟалаз,иҳалаҵәаз аҿкычымазара ари аԥхьа рымҩаԥгара ҳалнамыршеит аиԥыларақәа.
Цәыббрамза алагамҭазы иазԥхьагәаҭоуп Аҩада Кавказ ареспубликақәа рахь сныҟәара, ҳаибабара сара сзы гәахәароуп.

Акыр иаԥсоу аибашьцәа, даҽазныкгьы ишәзеиӷьасшьарц сҭахуп агәабзиара, агәамч, ахирра.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org