Аҧсны Аҳәынҭқарра Ахада

 

Аԥсны Аҳәынҭқарра Ахада Аслан Бжьаниа 1992-1993 шш. Аԥсны аџьынџьтәылатә еибашьра иалагеижьҭеи 30 шықәса аҵра арыцхә инамаданы Ааԥхьара ҟаиҵеит

14.08.2022

Аԥсны Аҳәынҭқарра Ахада Аслан Бжьаниа 1992-1993 шш. Аԥсны аџьынџьтәылатә еибашьра иалагеижьҭеи 30 шықәса аҵра арыцхә инамаданы Ааԥхьара ҟаиҵеит

Аԥсны Аҳәынҭқарра Ахада Аслан Бжьаниа 1992-1993 шш. Аԥсны Аџьынџьтәылатә еибашьра иалагеижьҭеи 30 шықәса аҵра арыцхә инамаданы Аԥсны жәлар Ааԥхьара ҟаиҵеит.

Иахьа алахьеиқәҵаратә мшуп – 30 шықәса раԥхьа аӷа хәымга, бџьарла деиқәных Аԥсны дақәлеит. Иалагеит 413 мшы ицоз Аԥсны аџьынџьтәылатә еибашьра. Ҳԥыза Ду Владислав иааԥхьара бираҟҵас ишьҭыхны ҳажәлар зегьы аӡәк еиԥш Аԥсны ахьчаразы игылеит.

Нхыҵ Кавказ иқәынхо ҳаиашьаратә жәларқәа, амҳаџьыраа рхылҵшьҭра, Урыстәылеиԥш егьырҭ аҳәынҭқаррақәеи ажәларқәеи рҟынтәи иҳадгылт. Ҳаԥсадгьыл ахақәиҭтәразы ақәԥараҟны урҭ рлагаламҭа ахааназы хашҭра ақәым.

Имӷьаӡо ахәра ҳзыннажьит аибашьра. Уи ахәра зырӷьо ҳәа ҟалараны иҟам.

Қырҭтәылатәи аҳәынҭқарра ҳбызшәа иацәнымхошәа, ҳажәлар ирыцәнымхошәа иҟарҵо зегьы ҵакыс иамоу акоуп – мчыла ианаму, хаала рнапахьы ҳнагара иашьҭоуп. Урҭ ргәы иҭоу еилкаауп - ҩныҵҟала ҳаинҟьара рҽазыршәоит, ҳара-ҳара ҳаиҿадыргылоит. Иахьагьы рнапы аҵарымҩыц аибашьра алызмыршо ашәҟәы.   Иазыԥшуп ҳтәылахьчара азҵаара аныԥсыҽхо ҳәа, усҟан ҩаԥхьа ирыхшәап ирхарԥоу асыс мҟаа ацәа, ицәырыргашт ргыгшәыгра. Аха ҳара агәра ҳгоит ргәыхәтәы иахьӡарым ҳәа.

Аибашьраҿы уаҩ илымшо зылшаз, аҭынч ԥсҭазаараҿгьы ҳанеидгыла, ҳаззымиааиуа ус ҟалом. Ҩныҵҟала аилибамкаара ҳәа акыр ҳамазар, амчра зку иаҳхароугьы ыҟоуп.
Имариаӡам аԥсҭазаара, ҳара ишаҳҭаху иҟам зегьы. Иҭахаз ҳаибашьцәа хьӡырҳәагақәа рҭаацәа, аветеранцәа, шәара аԥхьа шәнаргыланы, зуал аҳәынҭқарра иақәу, ишәыхәҭоу адгылара шәоурц азы макьана уи аҟара ҳаӷәӷәам.
Хықәкы хаданы иҳамоу – ҳауаажәлар шәымаҵ ауроуп, Аԥсны инхо ауааԥсыра рыԥсҭазаара аиӷьтәроуп. Ашәышықәсақәа иргәылгоуп ҳбызшәа, ҳмилаҭ, ҳаԥсуара. Иахьа ихьыԥшым ҳхатәы ҳәынҭқарра ҳамоуп. Ҳаҿиароуп, ԥхьаҟа ҳцароуп!

30 шықәса раԥхьа иҟалаз уаҳа иҟамлароуп Аԥсны. Уаҳа аибашьра амбароуп ари адгьыл. Иахьа иаԥсыуа ҳәынҭқарраны ишыҟоу Аԥсынра, убас ашәышықәсақәа иргәылсны, зқьышықәсала инеилароуп. Иҟазароуп Аԥсынра, иҟанаҵ Аԥсҭазаара.

Хашҭра рықәым Аԥсны зхы ақәызҵаз!


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org