Аҧсны Аҳәынҭқарра Ахада

 

Ахада Гәылрыԥшь араион усуратә визитла даҭааит

21.07.2022

Ахада Гәылрыԥшь араион усуратә визитла даҭааит

Ԥхынгәымза 21 рзы аҳәынҭқарра Ахада араионқәа рышҟа иусуратә ныҟәарақәа ирыциҵеит. Анҭыҵтәи аилацәажәара мҩаԥысит Гәылрыԥшьтәи Акультура ахан аҟны.

Аиԥылара иалахәын Ахада ихаҭыҧуаҩ Бадра Гәынба, Ахада Иусбарҭа анапхгаҩы ихаҭыҧуаҩ Зураб Қаџьаиа, аҧыза-министр актәи ихаҭыҧуаҩ Беслан Џьапуа, адәныҟатәи аусқәа рминистр Инал Арӡынба, атәылахьчара аминистр ихаҭыҧуаҩ  Нодар Аҩӡба, Ахада иабжьгаҩцәа, ауаажәларра рхаҭарнакцәа.

2022 ш. актәи ашықәсбжазы имҩаҧгаз аусура алҵшәа дазааҭгылеит Араион Администрациа ахада Аслан Бараҭелиа. Уи иҳәеит араион абиуџьет ахашәалатә хәҭа шынагӡоу 106,4% рыла. Аплан аҟны иарбаз 96 млн 454 нызқь мааҭ раан абиуџьет ахь иааит 102 млн 580 нызқь мааҭ.

«Ашәахтәтәи ишәахтәтәыми ааимҭақәа ихадароу хыҵхырҭақәаны ирымоуп ахашәалатә шәахтә, уи иартәоит 61,7%», – иазгәеиҭеит Аслан Бараҭелиа.

Абиуџьет аныхтә хәҭа нагӡоуп 98,8% аплан аҟны иарбаз 106,468 млн мааҭ раан.

Араион анапхгаҩы иаҵшьны иҳәеит абиуџьет аныхтә хәҭаҷ хаданы ишыҟоу «аҵараиура» аҟәша, уи иартәоит – 47,1% ахарџьқәа рзеиԥш еицҵалыҵ аҟнытә.
Ахада ирезервтә фонд аҟынтә 2021ш. рашәарамза 1 азы  араион абиуџьет ахь иааит  2 млн 398 нызқь мааҭ, урҭ аҧсабаратә рыцҳара иахҟьаны аԥхасҭа зауз Гәылрыԥшь араион ауааԥсыра ацхыраара рыҭарахь ишьҭын.
Араион аҟны 12 ҭаацәара асертификатқәа роуит, «Анхарҭа ҩны» апрограммала анхарҭа ҩнқәа роуит . Араион анапхгаҩы иажәақәа рыла, ари апрограмма аусура аанкылаӡам.
  
Араион аҟны зынӡа усурҭа ҭыԥла еиқәшәоуп 5 нызқьҩык, бжьаратәла руалафахәы иартәоит 10 830 мааҭ. 4 нызқьҩык инареиҳаны усураҭада иҟоуп. Араион 30 910 гектар адгьыл амоуп. Ҳазҭагылоу ашықәс азы Аԥсны Аџьынџьтәылатә еибашьраан иҭахаз рҭаацәарақәеи аинвалидцәеи рзы ицәаӷәоуп  55 гектар адгьыл.

Ақыҭанхамҩа аминистрраҟны шықәсыки бжаки рыла инагоуп  2021- 2022 шш. рзы ақыҭанхамҩа аҿиаразы Хықәкылатәи апрограммала 54 проект. 2021 шықәсазы урҭ рахьтә инагӡоуп ҳәа иԥхьаӡоуп 10, 9 млн 125 нызқь мааҭ рыхә.  2022 шықәсазы ирыдыркылеит 15 проект 6 млн 718 нызқь мааҭ рыхә.

Араион ауааԥсыра еиҳарак рнапы алакуп аҵиааӡара, аԥсаатәааӡара, арахәааӡара, ашьхааӡара, амеханизациа.
2020-2022 шш. Аинвестпрограммала Гәылрыԥшь араион аҟны иазԥхьагәаҭоуп 25 обиект рырҽеиреи рыргылареи 395 млн 645 нызқь мааҭ рыхә. Аусура иаларгоуп 24 обиект урҭ рыхәԥса азеиԥшеицҵалыҵ иартәоит  282 млн 825 нызқь мааҭ.

Ахыркәшарахь инеит Кациқыҭ абзазаратә црыҵ кьакьақәа рышьҭаҵаразы ажра аргылара. Ашықәс нҵәаанӡа ари аобиект хыркәшахароуп.
Араион аҟны афымцамч ахархәаразы ахәԥса аизгара иҵегьы еиӷьзар ауан, иҳәеит иаҵшьны Аслан Бараҭелиа. Ҳазҭагылоу аамҭазы уи иартәоит 33%.

Араион иахьаҵанакуа аҳасабырбатә аамҭахҵәахала ишьақәыргылоуп ацәгьоурақәа 23, урҭ зегьы аартуп.

Ахада иазгәеиҭеит араион ахада иааигаз арбагақәа иҟоу аҭагылазаашьа ишақәшәо. Убри аан аҳәынҭқарра Ахада иҳәеит араион иацҵаны аинвестициақәа шаҭаху.
Аслан Бжьаниа иҳәеит аусура шымҩаԥысуа Владислав Арӡынба ихьӡ зху Аҟәатәи аҳаиртә баӷәаза аусура аларгаразы.
«Аҭҵааратә усурақәа хыркәшахоит шьҭа, апроект иаҵаҩуп. Ҳгәы иаанагоит 2024 ш. Аҳаиртә баӷәазара аусура иаларгахоит ҳәа», – иазгәеиҭеит аҳәынҭқарра Ахада.
Ахада иҳәеит иара убас араион аҟны зыргылара мҩаԥысуа абзазаратә црыҵ кьакьақәа реизакырҭа ажра  иамоу аҵак ду атәы.
«Ари аобиект иахьатәи аҭахрақәа ирықәшәоит, уа сыҟан, избеит, аобиект аҿҳәара иақәыршәаны аусура иалагоит», – иаҵшьны иҳәеит Аслан Бжьаниа.

Аҳәынҭқарра Ахада изҵааит Агәуӡера аҳаблаҟны иҟоу Смецкои ипарк алахьынҵазы.
Ахада иҳәеит уи знапы иану аусбарҭақәа шаҿу. «Апрокурортә гәаҭара цоит. Уи анхыркәшахалак ашьҭахь азыӡба ҳадаҳкылоит, уи закәанла ишыҟало», – атәы иҳәеит Аслан Бжьаниа.  


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org