Аҧсны Аҳәынҭқарра Ахада

Аҧсны Аҳәынҭқарра Ахада Аслан Бжьаниеи Арегионбжьаратәи акультуратәи еимадаракәа рыла аҳәаанырцәтәи атәылақәа рымадаразы УА Ахада Иусбарҭа аиҳабы Игор Маслови Владислав Арӡынба ихьӡ зху жәларбжьаратәи аҳаиртә баӷәаза иаҭааит.

Аҳәынҭқарра Ахадеи Арегионбжьаратәи акультуратәи еимадаракәа рыла аҳәаанырцәтәи атәылақәа рымадаразы УА Ахада Иусбарҭа аиҳаби ирԥылеит аԥыза-министр ихаҭыԥуаҩ, аекономика аминистр Кристина Озгани аҳаиртә баӷәаза адиректор  Виачеслав Ешбеи.

Кристина Озган иазгәалҭеит УА Атранспорт аминистрреи Аҳаиртә транспорт Афедералтә усбарҭеи (Урысавиациа) русеицурала иалкаау аусура шымҩаԥгоу.
Имҩаԥысуеит аԥыррақәа реиҿкааран аԥҟарақәа рықәныҟәара алзыршо анормативтә-зинтә база аус адулара, имҩаԥгоуп аҳаиртә баӷәаза адгьылҵакыра зегьы хәҭа-хәҭала аҭҵаара иҟазар зуа артҟәацгақәа мамзаргьы атҟәацра ашәарҭа зцу аобиектқәа инарымаданы.
Ари акомплекс ахьгылоу адгьыл ҭыԥи еиҭамҵуа амазареи рҳәаақәа разгәаҭаразы имҩаԥысуеит ашәҟәҭаҩразы аусура. Иара убас УА Атранспорт аминистрреи Аҳаиртә транспорт Афедералтә усбарҭеи (Урысавиациа) русеицурала иазырхиоуп аԥырра алыршареи аԥырҩцәа разыҟаҵареи мҩаԥызго аспециалистцәа разыҟаҵаразы аусмҩаԥгатәқәа рыплан.  
Аиҳабырахь инагахоит аҳаиртә еиҭаҵра алыршаразы апроект, ишьақәыргылоуп иара убас апроектҟаҵаразы аԥҟарақәеи атехникатә дҵеи. Ашықәс аҩныҵҟала адокументқәа зегьы рхиазароуп аекспертизахь ашьҭразы.
Аҳаиртә баӷәаза адиректор Виачеслав Ешба аҳәынҭқарра Ахада изеиҭеиҳәеит ари аобиект ҭагылазаашьас иамоу атәы, ҳазҭагылоу аамҭазы апроектҟаҵаҩцәа аҭҵааратә усурақәа шымҩаԥырго, ишҭырҵаауаа шьаҭанкылатәи арҽеирақәа мҩаԥгамкәа ацәаҳәа ажәытә хҟьақәа рхархәара алшозар. Ашьҭԥрааратә цәаҳәа аура иартәоит 3640 метра.
Аҳаиртә баӷәаза адиректор иаҵшьны иҳәеит 2008 ш. аҳаиртә баӷәаза ишаднакылаз аидара зқәыз шәкыла аҳаирпланқәа ИЛ-76, усҟан ацәаҳәа ахҟьақәа ҽыԥныҳәа руҭартә ишыҟамыз. Аха уи аахижьҭеи аамҭа рацәаны ицахьеит. Иара убас Виачеслав Ешба Ахада адырра ииҭеит аҳаиртә вокзал аинфраструктура аҭагылазаашьазы.
Ахада иаҵшьны иазгәеиҭеит аусурақәа зегьы ишьақәырӷәӷәоу аамҭеихшара еиламгакәа ишымҩаԥгатәу.
«Мышкгьы аҵахара ҟамлароуп. Иахьа аамҭа иаӡбо рацәоуп. Аинвестор ихыдҵақәа ианаамҭоу инаигӡалароуп. Аплан аилагара ҟалозар, ианаамҭоу ақәҿыҭразы заа иаҳдыруазароуп»,- аихшьала ҟаиҵеит аҳәынҭқарра Ахада.