Аҧсны Аҳәынҭқарра Ахада

 

Аԥсны Аҳәынҭқарра Ахада Аслан Бжьаниа Аԥснытәи аҳәынҭқарратә университет аушьҭымҭацәа рышҟа иҟаиҵаз Ааԥхьара

29.06.2022

Аԥсны Аҳәынҭқарра Ахада Аслан Бжьаниа Аԥснытәи аҳәынҭқарратә университет аушьҭымҭацәа рышҟа иҟаиҵаз Ааԥхьара

Аԥсны Аҳәынҭқарра Ахада Аслан Бжьаниа Аԥснытәи аҳәынҭқарратә университет аушьҭымҭацәа рышҟа Ааԥхьара ҟаиҵеит.

Акыр иаԥсоу аушьҭымҭацәа, акыр иаԥсоу аҩызцәа!

Иахьатәи амш шәара шәзы акрызҵазкуа мшуп – ауниверситет аҟны қәҿиарала шәҵара хыркәшаны, аҵара ахьышәҵоз шәҵараиурҭа гәакьа ааншәыжьуеит, иҿыцу аҧсҭазаарахь шәшьапы еихыжәгоит. Раԥхьа иргыланы, гәык-ԥсык ала ишәыдысныҳәаларц сҭахуп аҵак дуӡӡа змоу ари ахҭыс.

Ара иҟоуп адиплом ҟаҧшь занашьоу аушьҭымҭацәа. Шәдипломқәа идырҵабыргуеит аҵара ашықәсқәа зегьы шәырҵаҩцәа ишәдырҵоз амаҭәарқәа инарҵауланы рдырра шәшашьҭаз, ҭакҧыхқәрала шәхы шәшазнеиуаз, шәхықәкы аҵакы ибзианы ишеилышәкаауаз.

Ҳәарада, астудентра наунагӡа ҳгәы иҭымҵәо, даҽакы иаламҩашьо аамҭоуп, ҳаҭырла есқьынгьы ҳгәалашәараҿы иҟазаауеит зааԥсара ҳаду ҳарҵаҩцәа, ара иҳарҳауеит аҩызцәа.
Аҧсҭазаараҿы дасу иара ихатәы мҩа имоуп, аԥхьаҟа, хымҧада, ишәзыԥшуп аиааирақәа, аихьӡарақәа. Сара агәра згоит Аԥснытәи аҳәынҭқарратә университет аҟны ишәоуз адыррақәа шәзанааҭтә усура уасхыр ӷәӷәаны ишазыҟало.  
Иҭабуп ҳәа расҳәарц сҭахуп ААУ аректор Алеко Алеқсеи-иԥа Гәарамиа аԥхьа днаргыланы,  апрофессортә-рҵаҩратә еилазаара ишәыдырҵаз аџьабаазы, уи аҵакы ахә ашьара уадаҩуп.
Ҳара зегьы ибзианы иаҳдыруеит зхаҭабзиара ҳараку аҵараиура ада аҳәынҭқарра аҿиара шзалымшо.
Аҳәынҭқарра аҿаҧхьагьы уснагӡатә хаданы иқәгылоуп аҿар рҟыбаҩ, иалырхуа рзанааҭ аҟны рылшарақәа раарԥшразы аҭагылазаашьақәа рзаԥҵара.

Акыр иаԥсоу аушьҭымҭацәа, шәгәы иҭакқәоу шәрыцәхьамҵын, шәаанымгылан, есааира аиааирақәа ҿыцқәа шәрызнеила.

Мҩамш!


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org