Аҧсны Аҳәынҭқарра Ахада

Аԥсны Аҳәынҭқарра Ахада Аслан Бжьаниа Аԥсны Аҳәынҭқарратә хьчара амаҵзура 30 шықәса ахыҵра иазкыз аиубилеитә ныҳәа далахәын.

Аҳәынҭқарра Ахада АА Аҳәынҭқарратә хьчара амаҵзура анапхгареи, хаҭалатәи аилазаареи, аветеранцәеи дрыдныҳәалеит.

«Аҳәынҭқарратә хьчара амаҵзура аҿиара аҭоурых ҳҳәынҭқарра аҿиара иузаҟәымҭхо иадҳәалоуп. Шәара шәусураҟны лымкаала аҵак ду рымоуп ҳәоуеиқәшәарала аусеицура, иааиԥмырҟьаӡакәа азанааҭдырра аизырҳара, аҭакԥхықәра, аҩыза идгылара реиԥш иҟоу аҟазшьақәа, апринципқәа» - иазгәеиҭеит Ахада.  

Аслан Бжьаниа Аҳәынҭқарратә хьчара амаҵзура анапхгареи хаҭалатәи аилазаареи иҭабуп ҳәа реиҳәеит русуразы.
«Сара агәра згоит есқьынгьы ламысцқьала, хаҭабзиарала шәмаҵзуратә уал анагӡара шәшзхиоу, ҷыдала ишәыду аҭакԥхықәра аҵакы еилкааны шәнапы иану аус шынашәыгӡало» - иҳәеит иара. – «Иара убас иҭабуп ҳәа расҳәоит иахьа қәҿиарала аусура амҩаԥгаразы атрадициа бзиақәа аԥызҵаз Амаҵзура аветеранцәа.

Ҳаҭыр зқәу Дмитри Сергеи-иԥа, Амаҵзура аусзуҩцәа зегьы, аветеранцәа нашәыдкыланы абри аныҳәамш азы ишәзеиӷьасшьоит агәабзиара, аихьӡарақәа».