Аҧсны Аҳәынҭқарра Ахада

 

Ахада Урыстәыла Амш азгәаҭара иазкыз аусмҩаҧгатә далахәын

10.06.2022

Ахада Урыстәыла Амш азгәаҭара иазкыз аусмҩаҧгатә далахәын

Аҧсны Аҳәынҭқарра Ахада Аслан Бжьаниа Урыстәыла Амш азгәаҭара иазкыз  аусмҩаҧгатә далахәын.  Ари аусмҩаԥгатә мҩаҧысит Аҧсны иҟоу Урыстәыла Ацҳаражәҳәарҭаҟны.

Аиԥылара аартуа, Аҧсны Аҳәынҭқарраҟны иҟоу Урыстәылатәи Афедерациа аусқәа рзы аамҭалатәи агәрага Мақсим Литвинов иазгәеиҭеит, адунеи аҟны иҟоу аҭагылазаашьа ҳасаб азуны, иҳәеит иахьатәи аныҳәа Урыстәыла амш мацара ишазкым, ари Урыстәыла адгыларагьы иамшуп иҳәеит. Аҧсны анапхгареи атәылауааи иҭабуп ҳәа реиҳәеит Урыстәыла Украина имҩаҧнаго иҷыдоу арратә операциазы иҟарҵо адгыларазы, иара убас Лугансктәии Донецктәии Жәлар р-Республикақәа рхьыҧшымра азхаҵаразы. Уи иаҵшьны иҳәеит Аҧсны аиҳабыра Донбасстәи ахҵәацәа ахьрыдыркылаз, иара убас иҟарҵаз агәыҳалалратә цхыраара ахә ҳаракны ишишьо.
«Шәара шәеиҧш, ҳаргьы ҳрызгәдууп Аҧснынтәи хатәгәаҧхарала еибашьуа, Украина имҩаԥысуа иҷыдоу арратә операциа иалахәу. Мраҭашәара зегьы Урыстәыла ианаҿагыла, Аҧсны аҩыза иаша ихы шымҩаԥиго ахы мҩаԥнагоит», - ҳәа азгәеиҭеит Аҧсны иҟоу Урыстәыла аусқәа рзы аамҭалатәи агәрага.

Ахада иқәгылараҟны иазгәеиҭеит аныҳәа иамоу аҵак ду, Аҧсны атәылауаа реиҳараҩык атәылауаҩшәҟәы шрымоу, Урыстәыла стратегиатә ҩыза мацараны ишыҟам. «Ари атәылеи ҳареи ҳабжьара акультуратәи зқьышықәсала аигәыларатәи еизыҟазаашьақәа ҳабжьоуп", - иҳәеит Ахада.

Аҳәынҭқарра Ахада иазгәеиҭеит, Урыстәыла иахьа аҭагылазаашьа шымариам. "Еилкаау усуп, Украина адгьылҵакыраҿы имҩаҧысуа иҷыдоу аоперациа мҩаҧырымгар ада ҧсыхәа ҟамлеит. Сара тәылауаҩык иаҳасабала, Аҧсны Ахада иаҳасабала, зынӡа гәыҩбаракгьы сымам аоперациа шхыркәшахо азы. Аамҭа ҿыц шааиуа - Урыстәылатәи Афедерациа аҿиара аамҭа, Аҧсны Аҳәынҭқарра аҿиара аамҭа, ҳаиҩызаратә еизыҟазаашьақәа гәацԥыҳәарала рыҿиара аамҭа", - ҳәа азгәеиҭеит Аслан Бжьаниа.

Ахада Урыстәыла атәылауаа ирзеиӷьеишьеит ахачҳара, иахьа Донбасс имҩаҧысуа иҷыдоу аоперациа иалахәу зегьы иаарласны рыҩныҟақәа рахь рыхынҳәра.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org