Аҧсны Аҳәынҭқарра Ахада

 

Аԥсны Аҳәынҭқарра Ахада Урыстәылатәи Афедерациа адгылара иазкыз акциаҟны дықәгылеит

11.03.2022

Аԥсны Аҳәынҭқарра Ахада Аслан Бжьаниа Урыстәылатәи Афедерациа адгылара иазкыз акциаҟны дықәгылеит.
«Акыр иаԥсоу ҳауаажәлар,
иахьа ҳара ара ҳаизеит ҩызара ду ҳзызуа  Урыстәылатәи Афедерациа адгылара аҭаразы. Ибзианы еилаҳкаауеит Урыстәыла анапхгара, хаҭала Владимир Владимир-иԥа изы иҷыдоу арратә операциа амҩаԥгаразы азыӡба адкылара шымариамыз.  
Ара иҟоуп еиуеиԥшым аполитикатә партиақәеи ауаажәларратә еиҿкаарақәеи рхаҭарнакцәа. Ари иаҳәоит аԥсны-урыстәылатәи аизыҟазаашьаҿы ҳара ҳаӡәыкны ҳшыҟоу атәы.  

Жәларбжьаратәи ауаажәларра Урыстәыла аганахьала иаадырԥшуа азыҟазаашьа  гәаӷла иҭәуп. Сазҵаар сҭахуп, иабаҟаз иахьа аиашара иазықәԥо,  Донбасс ауааԥсыра агәаҟра ианҭагылаз, рықәхра ианаҿыз?  Ари еиҿагылоу астандартқәа рполитикоуп, раԥхьа иргыланы, уи шьақәзырӷәӷәо акәны иҟоуп НАТО мрагыларатәи ахырхарҭала изықәныҟәо ампыҵахаларатә политика. Аҩадатлантикатәи аидгыла арратә инфраструктура УА аҳәаақәа рзааигәахара адунеи аҟны ашәарҭадареи аҭышәынтәалареи реицаҟьара иазҳәоуп.  
Абри атәы иҳәахьан 15 шықәса раԥхьа 2007 шықәса жәабранмза 10 рзы ашәарҭадаразы Миунхентәи аконференциаҟны Владимир Владимир-иԥа Путин: «ЕАА-еи НАТО-и рымчқәа ҳара ҳҳәаақәа рахь рааскьагара иаҿуп. Ҳара азин ҳамоуп иаартны урҭ рызҵаара: ас аҽырҭбаара иаанагои, (урҭ амчқәа) зҿагылода?».
Абар еиҭа ииҳәахьаз: «Иаанагои полиусктәи адунеи? Ари атермин иага иурбашаргьы, аҵыхәтәан аԥрактикаҿы иаанаго акоуп: центрк змоу амчра, азыӡбақәа рыдкыларазы центрк. Аԥшәымак дызхагылоу адунеи ауп уи иаанаго. Ари адемократиа ааигәарагьы иҟам. Ас еиԥш иҟоу амодель ҟалашьа амаӡам иахьатәи ацивилизациа аморалтә-леишәатә шьаҭа ахьамам азгьы».

Рыцҳарас иҟалаз, Украина мраҭашәаратәи аилазаара аҵгәарала полиуск змоу адунеи ашьақәыргылара хықәкыс измоу аимпериализм аполитика анагӡара иаҿуп.  
Ҳара ҳажәлар 1992-1993 шш. аибашьра ирхыргеит. Жәларбжьаратәи ауаажәларра иахьагьы ираҳар рҭахӡам ҳ-Республика абжьы. Аҭагылазаашьа зҳамами ҳара Еиду Амилаҭқәа Реилазаараҟны ҳпозициа аҳәаразы? Аҭак еилкаауп: избанзар урҭ ираҳауа аиаша дара идемократиатәу ҳәа ирыԥхьаӡо мраҭашәара аиҳарак рзы хәарҭара алаӡам, ирзаԥсам акоуп.  
Араҟагьы еиҿагылоу астандартқәа цәырҵуеит. Ҳабжьы раҳар рҭахӡам. Мраҭашәаратәи ауаажәларра дара ирзеиӷьым, дара рзы феида злам раҳар рҭахӡам.  Урыстәылоуп ҳаиашьаратәи Алада Уаԥстәыла ахҭысқәа рзы иҟаз шыҟаз, аиаша рылазҳәоз 2008 шықәсазы.  
Хашҭра ақәӡам ҳара ҳзы Урыстәылатәи Афедерациа аганахьала иҟаҵаз Аԥсны Аҳәынҭқарра ахьыԥшымреи асуверенитети разхаҵаразы.

Акыр иаԥсоу ҳауаажәлар, аҭагылазаашьа схы иархәаны, иҭабуп ҳәа шәасҳәар сҭахуп Аԥсныҟа иааз ахҵәацәа иара убас ДЖӘР-еи ЛЖӘР-еи инхо ауааԥсыра ирышәҭо ацхыраареи адгылареи рзы.
Шәара ижәдыруеит сара Донецктәи Жәларр р-Республикеи Лугансктәи Жәлар р-Республикеи рхьыԥшымра азхаҵаразы Аусԥҟа снапы шаҵазҩыз.

Арҭ амшқәа рзы ҳара Урыстәыла ҳадгылоуп.
Урыстәыла анапхгара иҷыдоу арратә операциа аҳәаақәа ирҭагӡаны имҩаԥнаго ауснагӡатәқәа астратегиатә шәарҭара аԥыхра иазкуп иара Урыстәыла азеиԥш, уи иадгылоу аҩызцәа, ШӘАРГЬЫ ҲАРГЬЫ ҳазгьы!
Сара аҳәынҭқарра ахада иаҳасабала, Аԥсны Аҳәынҭқарра анапхгара зегьы, милаҭрацәала еилоу ҳажәлар зегьы Урыстәыла Ахада Владимир Владимир-иԥа Путин адгылара иаҳҭоит».


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org