Аҧсны Аҳәынҭқарра Ахада

 

Ахада Амассатә информациа ахархәагақәа русзуҩцәа рзанааҭтә ныҳәа рыдиныҳәалеит

27.02.2022

Ахада Амассатә информациа ахархәагақәа русзуҩцәа рзанааҭтә ныҳәа рыдиныҳәалеит

Аҧсны Аҳәынҭқарра Ахада Аслан Бжьаниа Амассатә информациа ахархәагақәа русзуҩцәа рахь адныҳәалара ҟаиҵеит.

"Ҳаҭыр зқәу Аҧсны Аҳәынҭқарра амассатә информациа ахархәагақәа русзуҩцәа!

Ишәыдысныҳәалоит шәзанааҭтә ныҳәа.

Жәабранмза 27 - ҳтәыла аҧсҭазаараҿы иҷыдоу рыцхәуп. Абри амш аҽны, 1919 ш. иҭыҵит аҧсуа газеҭ "Аҧсны" раҧхьатәи  аномер.
Ҳазҭагылоу аамҭазы амассатә информациа ахархәагақәа инарыгӡо ароль даара идууп. Шәара акрызҵазкуа ауаажәларратә институтқәа шәреиуоуп, ҳтәылеи  уи анҭыҵи имҩаҧысуа хра злоу ахҭысқәа ганрацәала, оперативла иаашәырԥшуеит.

Абри амш аҽны ҷыдала иазгәасҭарц сҭахуп 1992-1993ш.ш. Аҧсны Аџьынџьтәылатә еибашьра ашықәсқәа раан амассатә информациа ахархәагақәа русзуҩцәа рџьабаа, урҭ рыла иалыршахеит ҳ-Аҧсадгьыл аҟны имҩаҧысуаз ахҭысқәа реалла ишыҟаз адунеитә еилазаара азеиҭаҳәара, иара убас аӷа иганахьала иҟаз аинформациатә пропаганда аҿагылара. Ас еиҧш иҟаз афырхаҵаратә усура иабзоураны ҳара иҳамоуп хәы змаӡам авидеонҵамҭақәеи афотосахьақәеи рархив.
Аибашьра иаҳцәагаз ргәалашәара хашҭра ақәым!

Иахьатәи аҧсҭазаара иҷыдоу азнеишьа аҭахуп. Иҭабуп ҳәа шәасҳәарц сҭахуп абас иуадаҩу аепидемиологиатә ҭагылазаашьаҿгьы имҩаҧыжәго шәусуразы. Ҳтәыла ажурналисттә еилазаара ауаажәларра рҭахрақәа, ргәы иҵхо, ирымоу ауадаҩрақәа еилкаарыла разнеишьа мҩаԥысуеит профессионалла. Шәара ишәыбзоураны ауаажәларреи атәыла анапхгареи иааиҧмырҟьаӡакәа аимадара рыбжьоуп.

Ҳаҭыр зқәу амассатә информациа ахархәагақәа русзуцәа!

2022 ш. хәажәкырамза 12 рзы ҳтәылаҿы имҩаҧысуеит Аҧсны Аҳәынҭқарра Жәлар Реизара - Апарламент ахь адепутатцәа ралхра.
Ҳара ҳхықәкы хада – азакәанԥҵаратә мчрахьы алхрақәа иаартны, ламысцқьала  рымҩаҧгара ауп. Уи азы зегьы аҭакҧхықәра ҳадуп. Абри аганахьала шәара шәыпрофессионализм сақәгәыӷуеит. Ҳарҭ хықәкык  ауп иҳамоу- иӷәӷәоу еизҳазыӷьо аҳәынҭқарраҿы анхара. Агәра згоит, шәжурналисттә усурала шәара ауаажәларра реидкылара шәшацхраало, шәус иашарыла шәшазнеиуа.

Шәныҳәамш азы иҭабуп ҳәа шәасҳәоит активла имҩаҧыжәго шәусуразы, исҳәарц сҭахуп, аиҳабыра есқьынгьы ажурналисттә еилазаара аус ацура ишазхиоу.

Гәык-ҧсык ала амассатә информациатә хархәагақәа русзуцәа ирзеиӷьасшьоит арҿиаратә гәҭакқәа рынагӡара, агәацԥыҳәара, аихьӡарақәа".


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org