Ахада Афон ҿыц аҟны аусуратә ныҟәара мҩаҧигеит

Ахада Афон ҿыц аҟны аусуратә ныҟәара мҩаҧигеит

Аԥсны Аҳәынҭқарра Ахада Аслан Бжьаниа Афон ҿыц аҟны аусуратә ныҟәара мҩаҧигеит.

Аҳәынҭқарра Ахада даҭааит еиуеиҧшым аҭагылазаашьақәа ирыхҟьаны  2021ш. лаҵарамза инаркны аус зымуа ахәыҷбаҳча "Алашара" .
Ари ахәыҷбаҳча ргылан Аҧсны Аҳәынҭқарра асоциалтә-економикатә ҿиара ацхрааразы Аинвестициатә прграмма аҳәаақәа ирҭагӡаны. Аргылара иақәхарџьын 136 млн. мааҭ.
Шьаҭанкылатәи аргылара аусбарҭа аиҳабы Ҭемыр Агрба Ахада изеиҭеиҳәеит ари аобиект аҟны ицәырҵыз ауадаҩрақәа шаҧыхххо.

Аҳәынҭқарра Ахада игәеиҭеит Анхәа ақыҭаҿы  аҳаблабжьаларҭаҿы адгьылҳәазара иахҟьаны автомашьынамҩа ахьҿабгаз аҭыԥ. "Уи аҭыҧ рӷәӷәахоит аҭӡы ҵаргәақәа ҩба рыла. Аусурақәа мҩаҧысуеит аамҭа аҿҳәара иақәыршәаны", - иҳәеит Ҭемыр Агрба.

Ҳазҭагылоу аамҭазы аусурақәа ирыхшәаауп 5 млн. 689 нызқь мааҭ. Иааидкыланы, арӷәӷәара иазку аусурақәа ирықәхарџьхоит 20 млн.мааҭ.

Аслан  Бжьаниа даҭааит ақалақь аҟны аӡымҩахгагатә цәаҳәақәа шьаҭанкыла рырҽеира ахьымҩаԥысуа аҭыԥгьы. Ахада имҩаҧысуа аусурақәа "хар амам" ҳәа рыхә ишьеит.
Аусуратә ныҟәарақәа реихшьала ҟаҵо, аҳәынҭқарра Ахада Афон Ҿыц ақалақь администрациаҿы аусуратә еилатәара мҩаҧигеит.

Афона ҿыц ахада Ҭемыр Оҭырба  Ахада адырра ииҭеит аҳасабырбатә аамҭа иалагӡаны имҩаԥгаз аусуразы.

Уи иажәақәа рыла, короновирустә ҿкы алаҵәара аамҭа аҩныҵҟа ақалақьи уи акәша-мыкәша иҟоу ақыҭақәеи рыҟны иаарԥшуп  ачымазара зыхьыз 747 -ҩык. «Урҭ рахьтә 734 хәышәтәуп, астационартә хәышәтәра иахысит 75-ҩык. Иааизакны, аепидимеологиатә ҭагылазаашьа ҭышәынтәалоуп», - иҳәеит  Оҭырба. Убри аан уи иазгәеиҭеит ақалақь аҟны авакцина злазҵаз рхыԥхьаӡара шырацәам.

Администрациа ахада далацәажәеит ақалақь абиуџьетгьы. «Ҳазҭоу ашықәс азы иазԥхьагәаҭан 58 млн 240 нызқь мааҭ. Аплан инацҵаны анагӡареи 2020 шықәсаҟнытә ииасыз ацәынхеи еицыланы Афон ҿыц абиуџьет иартәеит 65 млн. мааҭ», - иҳәеит иара. Ашәахтәқәа рзы аплан нагӡоуп 130%. «Ԥхынҷкәынмза 12 рзы Афонҿыцтәи аҳаԥы иаҭааит 427 нызқьҩык ауаа, ари 213 млн мааҭ артәеит. Арҭ ахархәагақәа рыҟнытә ақалақь иаиуит 50 млн мааҭ», - ҳәа азгәеиҭеит иара.

Акриминогентә ҭагылазаашьа ақалақь аҟны иҭышәынтәалоуп. «Ауадаҩрақәа ыҟоуп афымцалашаразы. Аидара аԥхын еиԥш аӡынгьы иазҳауеит. Афымцакаҭақәа хеит, ҭыԥқәак рыҟны  атрансформаторқәа ԥсахтәуп, аха иааизакны, афымцамч еиԥҟьарада иҟоуп», - иҳәеит Оҭырба, уи  ахәԥса ашәара атәы ҳҳәозар арбагақәа 22 - 25% рҟынӡа иҟоуп .

Ахада агәынамӡара ааирԥшит ахәԥса ашәаразы иҟоу аҭагылазаашьазы, иагьрыдиҵеит 2022 шықәса ажьырныҳәамза анҵәамҭанӡа апроцентқәа рырбагақәа 50 рҟынӡа рышьҭыхра.


Возврат к списку