Ахада усуратә визитла Гал араион даҭааит

Ахада усуратә визитла Гал араион даҭааит

Аԥсны Аҳәынҭқарра Ахада Аслан Бжьаниа усуратә визитла Гал араион даҭааит

Аҳәынҭқарра Ахада ицын Администрациа Анапхгаҩы ихаҭыԥуаҩ Зураб Қаџьаиа, аԥыза-министр актәи ихаҭыԥуаҩ, ақыҭанхамҩа аминистр Беслан Џьопуа.
Гал ақ. аҟны араионтә хәышәтәырҭа хада ахәаԥшраан аҳақьым хада Асҭамыр Гамгьиа Ахада адырра ииҭеит амедусҳәарҭа аныргылаз аахыс ара шьаҭанкылатәи арҽеиратә усурақәа шымҩаԥгам азы.

АҳәынҭқарраАахада авакциналаҵара ахьымҩаԥысуа, адкыларатә ҟәша, апалатақәа дрыҩнаԥшны ибеит.
Гамгиа иҳәеит иҳаҩсыз амчыбжь азы Агәабзиарахьчара аминистрраҟнытә ахәшәтәырҭа арентгентә мыруга шаиуз. Уи атест режим ала аусура иаларгоуп, ачымазараҭҵаарақәак мҩаԥгоуп. Иара убас амедусҳәарҭа еиқәдыршәеит архьшәашәага камерақәа рыла агриппи коронавирустә ҿки рзы авакцианқәа рыҵәахразы. Гал араион ахәшәтәырҭа хадаҟны иҟаӡам ковиддтә ҟәша, аха иаартуп ҽынлатәи астационар.
Аслан Бжьаниа даҭан Аконтроль аужьратә пункт «Егры», ибеит аԥыԥшырҭаҟны амедицина-санитартә контроль шынарыгӡо. Ахада иара убас дахәаԥшит араион аҟны амашьына-технологиатә станциа аус шауа.

Аԥыза-министр актәи ихаҭыԥуаҩ, ақыҭанхамҩа аминистр Беслан Џьопуа иҳәеит ари астанциала амармалташьтә бжы ацәыхьчаразы ишыхәышәтәу 2 нызқь гектар зҵазкуа арасаҭра. Иҷыдоу атехника аныҟәцаҩцәеи абылтәи рзы уадаҩра шыҟам. Астанциаҟны иҟоуп 18цыра атехника.
Аслан Бжьаниа аилацәажәара мҩаԥигеит Гал араион актив алархәны.

Аҳәынҭқарра Ахада иҳәеит араион абиуџьет ишартәо 231 млн мааҭ, урҭ рахьтә 180 млн мааҭ ареспубликатә биуџьет аҟнытә ишааиуа.
«Ари атәыла анапхгара иалшо ала Гал араион ауааԥсыра адгылара шрырҭо атәы аҳәоит. Арҭ аԥарақәа арҵаҩцәа, аҳақьымцәа, азинхьчаратә еилазаарақәа, асоциалтәи акультуратә зҵаарақәеи рыӡбарахь идәықәырҵоит. Аха шәара шәҭахрақәа акырӡа еиҳауп: араион аҟны алшара дуқәа ыҟоуп, раԥхьа иргыланы, аекономикатә, аха ари алшара иахьынӡауа ахархәара амоуӡац. Ацифрақәа изларҳәо ала, араион аҟны аус рур рылшоит 14 814 –ҩыуаак, аха иҟоу арбагақәа рыла усурҭа ҭыԥла еиқәыршәоу 2-нызқьҩык роуп», – иҳәеит Аслан Бжьаниа.

Уи араион анапхгаҩцәа ирабжьигеит арҭ ацифрақәа гәныркыларц, есышықәса еиҵахартә ишыҟаҵатәу. Избан акәзар иҟоу ауадаҩрақәа уантә ишаауа – ауаа аусурҭақәа шрымам.

Аҳәынҭқарра Ахада иҳәеит аинвестициатә мышхәаԥштә ала аинформациа нҭырҳәыцааны адырра шаҭаху, раԥхьатәи ашьаҿа аныҟаҵаз, аинвестициа азеиԥш еицҵалыҵ аҟнытә имҩаԥгаз аусурақәа ртәы.

«Шәара арҭ аобиектқәа рыҟны шәнеироуп, ганрацәала ацхыраара рышәҭароуп аусурақәа рынагӡаразы, аусуцәа руалафахәқәа рызшәаразы. Аекономика ашьҭыхразы аинвестициақәа радԥхьалареи ахатәы инвестициақәа рхархәареи рыда даҽа лшарақәак ыҟаӡам», – ҳәа иԥхьаӡоит Аслан Бжьаниа.
Уи иҳәеит асоветтә аамҭазы Гал араион аҟны 58 нызқь гектар адгьыл ишықәаарыхуаз, аибашьра ашьҭахь - 30 нызқь гектар. Иахьа 10 гектарк маҷк иреиҳауп.
Аслан Бжьаниа иаҵшьны иҳәеит атәыла аҩныҵҟа еикәшо акапитал ыҟамзар, ҳара ареспублика анҭыҵынтә иаартә еиԥш аҭагылазаашьақәа шаԥҵатәу. Иазгәеиҭеит, ҳара ҳазхазҵаз атәылақәа рыҟнытә Аԥсны аекономика аганахьала ацхыраара аҟаҵара ишазхиоу, даҽакала ҳҿаԥхьа иқәгылоу апроблемақәа рыӡбара шҳалымшо.
Аҳәынҭқарра Ахада иазгәеиҭеит агәабзиарахьчараҟны иахьа ӷәӷәала иқәгылоу апроблемақәа ртәы

«Ачымазаҩ игәабзиаратә ҭагылазаашьа раԥхьатәи ацхыраара ҟазҵо аҳақьым имацара изеиӷьтәӡом, уи ачымазаҩ иныҟәгара, хәышәла еиқәыршәара ала ахылаԥшра имазароуп. Иахьа абри аҩыза аҭагылазаашьа ҳамоуп – ҳхәышәтәырҭақәеи ҳинфраструктура аобиектқәеи хеит, иажәит», – иҳәеит иаҵшьны Ахада.
Аслан Бжьаниа иргәалаиршәеит Гал араион аҟны традициала аџьа збоз, акрызуаз ауаа шынхоз, убри аҟнытә аҭыԥантәи анаплакҩцәа русура иаԥырхагоу апроблемақәа аус шрыдулалатәу. Убри аан агәаҭаратә усбарҭақәа рганахьала инамыцхәны ақәыӷәӷәара ҟамлароуп иҳәеит.

«Ари аартны иаҳҳәалароуп. Ацитрустә культурақәа раарыхра знапы алаку ирыцхраалатәуп. Гал араион аҟны аибашьра аԥхьа 1 800 тонн амандарин еизыргон», – иҳәеит Ахада.
Уи иҳәеит аҳәынҭқарра альготатә кредитқәа рыҭара ахы ишаднаҵо, аха уи аан ӷәӷәала хылаԥшрагьы шыҟанаҵало ақыҭанхамҩаҟны ихадароу аусурақәа рынагӡара шымҩаԥысуазы. Аҳәынҭқарра Ахада ирабжьигеит аусураҟны аԥышәа змоу аспециалистцәа радԥхьалара.

Афымцамч далацәажәо, Аслан Бжьаниа даҽазныкгьы иаҵшьны иҳәеит ари аусхк аҟны угәы каҳартә аҭагылазаашьа шыҟоу. Акаҭатә нхамҩа ажәит 80% рҟынӡа, убасҵәҟьа иҟоуп атрансформатортә нхамҩа, 40 инареиҳаны иҟоу аиҵастанциақәа рахьтә анорма иақәшәо 8-9 роуп.
«Ари аусхк акырӡа акапиталтә лагаламҭақәа аҭахуп, аха уи аҟара Аԥсны иалшаӡом. Ари апроблема аруадаҩуеит изакәанымкәа акриптовалиута арҳара. Ари азҵаара аӡбара ҳаҿуп, атехнопарк аԥҵаразы аусурақәа цоит амаинерцәа уахь риагаразы. Ари азҵаара урыстәылатәи ҳпартниорцәеи ҳареи аӡбара ҳаҿуп», – иҳәеит аҳәынҭқарра Ахада.

Ахада иара убас иҳәеит абарҭ асааҭқәа рзы аԥыза-министр ихаҭыԥуаҩ, аекономика аминистри Администрациа Анапхгаҩы ихаҭыԥуаҩи афымцамч азҵаарақәа рыӡбаразы Москва иҟоуп.

«Аха ҳаргьы дасу иҳалшо ҟаҳҵалароуп – алашара ахәԥса шәатәуп. Шәара шәҿы уи аганахьала аҭагылазаашьа цәгьаӡам, аха урҭ ацифрақәагьы ирыцҵалатәуп. Ақыҭақәа рнапхгаҩцәа ари апроблема аӡбара напы адыркыроуп», – ҳәа иԥхьаӡоит Аслан Бжьаниа.

Ахада иҳәеит амаининг-фермақәа ахьаарԥшхо ақыҭақәа рнапхгаҩцәа рхы ишақәиҭтәхо. «Ақалақәқәа рыҟны ауаа алашара рымаӡам. Уи моу, амаининг-аппаратқәа рӷьычрақәа рзы ауаҩшьрақәагьы ҟалеит. Ақыҭа администрациак ахада иқыҭаҟны аферма шыҟоу изымдыруа иҟаӡам. Ақыҭауаа рҭагылазаашьа бааԥсуп ҳәа иҟоу ацәажәарақәа, аҭагылазаашьа иаҳагьы идыруадаҩуеит», – иазгәеиҭеит Ахада.

Гал араион ахада ихы иқәкны Аслан Бжьаниа иазгәеиҭеит атәылаҟны иҟоу апроблемақәа Гал араион аҟнытә ишымаауа. «Ҳара ҳапроблемақәа зыдҳәалоу ишақәнагоу ала анапхгара ахьҳалымшо ауп. Убас иҟоуп ақыҭақәа рыҟны, аусбарҭақәа рыҟны, аминистррақәа рыҟны. Араионтә администрациақәагьы аҭакԥхықәрақәа рыдҵахоит», – иҳәеит Ахада, аилацәажәара хыркәшо.




Возврат к списку