Ахада Қырҭтәыла иҟоу ЕАР еснагьтәи Акоординатор Сабина Махльи Ахҵәацәа рус азы ЕАР Иреиҳаӡоу акомиссар иусбарҭа адәныҟатәи азҵаарақәа рзы абжьгаҩ Мариа Волошкевичи идикылеит

Аԥсны Аҳәынҭқарра Ахада Аслан Бжьаниа Қырҭтәыла иҟоу ЕАР еснагьтәи Акоординатор Сабина Махльи Ахҵәацәа рус азы ЕАР Иреиҳаӡоу акомиссар иусбарҭа адәныҟатәи азҵаарақәа рзы абжьгаҩ Мариа Волошкевичи идикылеит.

Сабина Махль Ахада иҭабуп ҳәа иалҳәеит аиԥыларазы, иагьазгәалҭеит: «Ҳалацәажәар ҳҭахын ҳусура аиҿкааразы аусеицураҿы хырхарҭақәас еиӷьуп ҳәа иԥхьаӡоу. Ҳара уснагӡатәны ҳҿаԥхьа иқәҳаргылоит ауаа ацхыраара рыҭара», - лҳәеит лара.
Аиԥылараан ЕАР ахаҭарнакцәа аҳәынҭқарра Ахада изеиҭарҳәеит аиҿкаареи жәларбжьаратәи иҳәынҭқарратәым аиҿкаарақәеи Аԥснытәи астратегиатә усеицура аҳәаа иҭагӡаны имҩаԥырго аусура атәы.

Аслан Бжьаниа иҳәеит ареспублика иацхраауа жәларбжьаратәи аиҿкаарақәа аус рыцура дшазхиоу. «Ишьақәгылаз аҭагылазаашьа аҩныҵҟа шәара иҟашәҵо акраҵанакуеит, ҳара уи ахә ҳаракны иаҳшьоит. Иҭабуп ҳәа шәасҳәоит уаа жәпакы ирышәҭо ацхырааразы», - иҳәеит Бжьаниа
Ахада иара убас иазгәеиҭеит атәылаҟны коронавирустә ҿкы аҿагылара иамоу аҵакы. «Ҳара иҭабуп ҳәа ахҳәааны иҳадаҳкылоит жәларбжьаратәи аиҿкаарақәа ахәшәқәеи амедицинатә мыругақәеи рганахьала иҟаҵахо ацхыраара. Жәларбжьаратәи ауаажәларрақәеи аиҿкаарақәеи аус рыцура иацаҳҵар ҳҭахуп. Ҳара адунеи аҟны Аԥсны аӡбахә раҳалароуп ҳәа иҳаԥхьаӡоит», - иҳәеит иара.  

Аиԥылараан Ахада асасцәа иреиҳәеит Аԥсны иҟоу ижәытәӡатәиу аиашахаҵаратә ԥшьаҭыԥ  - Бедиатәи аныхабаа аиҭашьақәыргылараҟны ацхыраара шрыдыркылараз.  
Аҳәынҭқарра Ахада далацәажәеит иара убас Аԥсни Қырҭтәылеи реизыҟазаашьа атемагьы. Иаҵшьны иҳәеит Аԥсны еигәылацәоу аҩ-тәылак рыбжьара ацивилизациа ҟазшьа змоу аизыҟазаашьақәа ишрыдгыло, аха уи шалыршахо Қырҭтәыла Аԥсны ахьыԥшымреи аҳәынҭқарратә суверенитети аназханаҵа. "Ари азҵаара есқьынгьы аԥхьа игылоуп",- иҳәеит Ахада.

Аиԥылара иалахәын Ашәарҭадара ахеилак Амаӡаныҟәгаҩ Сергеи Шамба, адәныҟатәи аусқәа рминистр ихаҭыԥуаҩ Иракли Ҭыжәба.


Возврат к списку