Аҧсны Аҳәынҭқарра Ахада

 

Ахада Иу. Н. Воронов 80 ш. ихыҵра иазку Жәларбжьаратәи аҭҵаарадырратә конференциа далахәын

19.10.2021

Аҧсны Аҳәынҭқарра Ахада Аслан Бжьаниа Иу. Н. Воронов 80 ш. ихыҵра иазку  "Археологиеи аҭоурыхи ирызку адырра ҿыцқәа инарымаданы Кавкази Амшынеиқәаҿықәи ажәытәӡатәии аамҭақәа инадыркны ихьшәоу абжьаратә шәышықәсеи рҟынӡа” захьӡу Жәларбжьаратәи аҭҵаарадырратә конференциа далахәын.

"Ҳаҭыр зқәу ҳасасцәа!
Ҳаҭыр зқәу ҳҵарауаа!
Наунагӡа ҳаҭыр рықәзаауеит зыжәлар рзинқәа рыхьчараҿы аиаша иадгыло, зҳәынҭқарра аргылараҿы, ашьақәырӷәӷәараҿы зымч-зылша иамеигӡо, амаҵ азызуа аҵеицәа. Убарҭ рыгәҭа дгылоуп иахьа зиубилеи азгәаҳҭо Иури Николаи-иҧа Воронов.

Ҳтәылаҿы иилааит, ирызҳалааит уи иеиҧш иҟоу аҵарауаа, аполитикцәа, ауаа нагақәа!

Ҳаҭыр зқәу аҩызцәа! Азин сышәҭозар, абзиара шәымаз ҳәа шәасҳәарц сҭахуп иналукааша аҵарауаҩ-кавказҭҵааҩы, аҭоурых ҭҵаарадыррақәа рдоктор, апрофессор, инагоу аҳәынҭқарратәи ауаажәларратәи усзуҩ, аҧсуа жәлар рмилаҭ-хақәиҭратә қәҧара аҧхьагылаҩцәа ируаӡәкыз Иури Николаи-иҧа Воронов 80ш.ихыҵра иазку “Археологиеи аҭоурыхи ирхызку адырра ҿыцқәа инарымаданы Кавкази Амшынеиқәаҿықәи ажәытәӡатәии аамҭақәа инадыркны ихьшәоу абжьаратә шәышықәсеи рҟынӡа” Жәларбжьаратәи аҭҵаарадырратә конференциаҟны.

Иури Николаи-иҧа Аҧсни Кавказ зегьи ржәытәра аҭоурых ҭызҵаауаз ааҧсара зқәымыз ҵарауаҩын, ламыс уаҩын, иҧсҭазаара Аҧсни Урыстәылеи рымаҵ аура иазкын, доуҳалеи шьалеи-далеи дызмадаз.
Апатриот ду, аиашара  азықәҧаҩ, Иури Николаи-иҧа иҧсҭазаара кьаҿын, аха илашан. 26 ш.ҵит трагедиала дҭахеижьҭеи. Иара ихаҭара амҽхак, уи ироль ду Аҧсны иҿыцу аҭоурых аҟны, аҭҵаарадырра, акультура, ауаажәларратә хәыцрақәа аҿиараҟны , амилаҭ хақәиҭратә ҵысреи ихьыҧшым аҳәынҭқарреи рыргылараҟны уажәы еиҳагьы иубарҭоуп.
Дырмит  Гәлиа ихьӡ зху Аҧсуаҭҵааратә институт аҧшьгара ҟанаҵеит иахьа ихацыркхаз Жәларбжьаратәи аконференциа амҩаҧгаразы.

Аҧсны Аҳәынҭқарра анапхгара иадуп ҳәа иаҧхьаӡоит аҭҵаарадырра арҿиара, аҵарауаа рыбжьара аимадара рыбжьаҵара иацхраауа аусмҩаҧгатәқәа адгылара рыҭара.
Аконференциа алахәцәа зегьы ишәзеиӷьасшьоит лыҵшәабзиалатәи аусура.

Агәабзиара, аихьӡарақәа, аҭҵаара ҿыцқәа!"


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org