Аҧсны Аҳәынҭқарра Ахада

 

Ахада Аҧсны иҟоу аурыс еицтәылауаа реиҿкаара Акоординациатә еидгыла алахәцәа рахь адныҳәаларатә нашьҭымҭа дәықәиҵеит

07.10.2021

Аԥсны Аҳәынҭқарра Ахада Аслан Бжьаниа Аҧсны иҟоу аурыс еицтәылауаа реиҿкаара Акоординациатә еидгыла алахәцәа рышҟа адныҳәаларатә нашьҭымҭа дәықәиҵеит.

Анашьҭымҭаҟны иҳәоуп:

«Ҳаҭыр зқәу аҩызцәа, II –тәи Атәылатә конференциа алахәцәа!
Абзиара шәымаз ҳәа шәасҳәоит Аԥсны иҟоу аурыс еицтәылауаа реиҿкаара Акоординациатә еидгыла аусура есышықәсатәи аихшьала амҩаԥгараҟны. Ари аидгыла еиднакылоит 19 еиҿкаара, ареспублика аицтәылауаа реидкылараҟны алагаламҭагьы дууп.  Иҭабуп ҳәа шәасҳәарц сҭахуп ари аусмҩаԥгатә шәҽахьалашәырхәыз, имҩаԥыжәго аусуразы.  

Аԥсны иҟоу аурыс уаажәларра ҳара ҳуаажәларра иузаҟәымҭхо иалоуп, ҳара зеиԥш уснагӡатәны ҳҿаԥхьа иагьықәгылоуп – амилаҭтә гәыԥқәа зегьы рыбжьара еинааланы, ҳәоуеиқәшәарыла иҿио аизыҟазаашьақәа раԥҵара.
Ҳара ҳуаажәларра егьырҭ изларылукаауа ҷыдараны иамоуп амультикультуризм. Уи иалҵшәаны ишьақәгылеит аурыс, аԥсуа, иара убас егьырҭ еицырдыруа акультура аусзуҩцәа адзыԥхьалаз иуникалтәу ауаажәларра.  
Ари аныԥшит Чехов, Паустовски, Горки, Искандер, Евтушенко, Симонов, Казаков, Толстои уҳәа реиԥш иҟоу адунеитә литература аклассикцәа раԥҵамҭақәа рыҟны.

Аҩажәатәи ашықәсқәа инадыркны аурыс интеллигенциеи абизнесуааи ҳтәыла аҿиараҟны алагала ду ҟарҵеит. Усҟантәи аамҭазы иаҧҵаз архитектуратә баҟақәа иахьагьы Аҧсны ақалақьқәа дырҧшӡоит. Ҳара ҳҿаҧхьа уснагӡатәны иқәгылоу - урҭ мырӡкәа реиқәырхара, аԥхьаҟа рырҿиароуп. Уи ҳара ҳкультуратә мал ауп.
Ҳтәыла анапхгара рҿаҧхьа зҵаараны иқәгылоуп Аҧсны аетносқәа зегьы рыбжьара аимадара бзиа абжьаҵара. Аҧсны атәылауаа зегьы, милаҭеилых ҟамҵакәа, конфессиас изҵазкуазаалак, иара убас даҽакала еиԥшымзаарақәас ирымазаалак, Аҧсны Аҳәынҭқарра атәылауаҩра агәадура рнаҭалароуп.

Ҳарҭ зегьы ҳаидгылара иабзоураны Аҧсны Аџьынџьтәылатә еибашьраан ахақәиҭра ҳгеит, ахьыҧшымра аиура ҳалҳаршеит, иара убас ҳаидгыланы ҳтәыла уаднаҧхьало, еизҳазыӷьо, иҿио иҟаҳҵароуп. Уи азы ҳара иҳамоуп зеиӷьыҟам алшарақәа – ҳауаажәлар, ҳаҧсабара, ҳгеографиатә ҭагылазаашьа, насгьы, ҷыдала аҵак ду змоу – Урыстәыла дуӡӡеи ҳареи иҳабжьоу астратегиатә еиҩызара.

Ҳҳәынҭқарраҿы аҭынчреи аҭышәынтәалареи рышьақәыргылараҿы Владимир Владимир-иҧа Путин хаҭала илагаламҭа ашәарҭадаразы агәыӷра ҳанаҭоит.
Агәра згоит, Аԥсны иҟоу аурыс еицтәылауаа реиҿкаара Акоординациатә еидгыла аус ацура ҳаиҩызара арӷәӷәара ишацхраауазы. Сгәы иаанагоит аицтәылауааи ҳареи ҳусеицура аҧхьаҟа алҵшәа аманы имҩаԥыслоит ҳәа.

Ишәзеиӷьасшьоит аихьӡарақәа апроект ҿыцқәа рынагӡараҟны».


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org