Аслан Бжьаниа Дмитри Медведев Иирамш идиныҳәалеит

Аԥсны Аҳәынҭқарра Ахада Аслан Бжьаниа Дмитри Медведев Иирамш идиныҳәалеит.

«Аԥсны жәлари Аԥсны Аҳәынҭқарра ахадареи рыхьӡала гәык-ԥсыкала ишәыдысныҳәалоит Шәирамш.  
Хьӡи-ԥшеи згым, аԥышәа змоу аполитик иаҳасабала иреиҳаӡоу аҳәынҭқарратә маҵзурақәа рыҟны шәыҟазаараан хамеигӡарада Урыстәылатәи Афедерациа аинтересқәа рыхьчара иазышәкит Шәара шәыԥсҭазаара.
Шәара Урыстәылеиԥш уи анҭыҵгьы миллионҩыла ауаа раҳаҭыр, рыбзиабара шәаԥсахеит.  
Милаҭрацәала еилоу Аԥсны жәлар хашҭра рзақәым хаҭала Шәара шәлагаламҭа ҳтәылақәа рыбжьара аиҩызаратәи агәылеимабзиаратәи еизыҟазаашьақәа рырӷәӷәареи рырҿиареи рус аҟны.  
Шәара шәыхьӡ иадҳәалоуп ҳтәыла аҭоурых аҟны ахҭыс хадақәа ируаку ¬ - зхы иақәиҭу, ихьыԥшым Аԥсны Аҳәынҭқарра  Урыстәылатәи Афедерациа аганахьала азхаҵара амш.  
Ҳаҭыр зқәу Дмитри Анатоли-иԥа,  абри амш аҽны ишәзеиӷьасшьар сҭахуп аҭынчра, аизҳазыӷьара, агәабзиара, агәамч».


Возврат к списку