Ахада Аминистрцәа реилазаара аилатәара далахәын

Аҧсны Аҳәынҭқарра Ахада Аслан Бжьаниа Аминистрцәа реилазаара аилатәара далахәын. Аиҳабыра алахәцәа азааҭгылеит иагьрыдыркылеит  амшхәаҧштә аҟны иарбаз 14 зҵаара.

Анаҩс, Аминистрцәа реилазаара ахаҭарнакцәа раҧхьа дықәгылеит Аҳәынҭқарра Ахада.

Иара иазгәеиҭеит амшхәаҧштә аҟны иарбоу 14 зҵаара рахьтә 6 абизнеси аекономикеи ишрызку. Иҳәеит абизнес-проектқәа шроуа, урҭ рынагӡара шаҭаху. "Аекономикатә ҿиара азҵаарақәа азнеишьа иаша рҭахуп", - ҳәа азгәеиҭеит аҳәынҭқарра Ахада, иара убас азҿлымҳара аиҭеит адгьыл азы ашәахтә ашәара иадҳәалоу апроблема.

Аслан  Бжьаниа адырра ҟаиҵеит, аиуристтәи ахатәы хаҿқәеи ари аусхк аганахьала ирықәу ауал ишартәо 150 млн.мааҭ инареиҳаны,  убри аан ашәахтә ахәҧса шдуумгьы. Иара иажәақәа рыла, уи аҵкыс еиҳау проблемоуп қьырала игоу адгьылқәа ишазгәаҭоу еиҧш ахархәара ахьрымам.
"Убас еиҧш иҟаҵатәуп, адгьыл ахархәара аекономика ахаҳара анаҭо, иааидкыланы иаҳҳәозар, ҳажәлар рзы ихәарҭахарц.  Инарҵауланы анализ азутәуп. Сара ашәахтә азыԥҵәа ақьыра зшәо ауаа ихымҧадатәиу ауснагӡатәқәа рынагӡара рыднаҵароуп ҳәа исыԥхьаӡоит. Аспекулиациатә ҟазшьа змоу афактор аанкылатәуп",-иҳәеит Ахада.
Аиҳабыра реилазаара алахәцәа адҵа риҭеит абри азҵаара ҷыдала иазнеирц, есымза инагӡоу аусқәа ирызкны Ахада Иадминистрациа адырра арҭаларц.

"Ҳара иаҳҳәаӡом адгьыл аус ҳацәхьаҵуеит, уи  аҭира азҵаара амшхәаҧштә аус ахь инаҳгаӡом ҳәа. Ҳара уи ииашаны ахархәара аҳҭароуп, алҵшәақәа ҳауаажәлари анаплакыҩцәеи рзы хаҳара аланы иҟаларц азы. Гәыла-ҧсыла зус назыгӡо абизнесуаа, аспекулиациа иаҿу ауаа ирҟәыҭхатәуп",-иҳәеит Ахада. Иара убас иазгәеиҭеит, ари ахырхарҭала аусура алҵшәа аныҟалаша аҿҳәара.
Аиҳабыра реилазаара алахәцәа адҵа риҭеит 2022 ш. хыркәшахаанӡа аус аҭыҧ иқәырҵарц. Ари аҩыза аусура раионцыҧхьаӡа иаҭахуп. Аиуристтә хаҿқәа ишахәҭоу еиҧш адгьыл рхы иадырхәоит, мамзаргьы аиҳабыра ирыӡбоит ҿыц қьырала зхы иазырхәо зусҭцәоу, - иҳәеит Аслан Бжьаниа. Убри аан инаҵшьны иазгәеиҭеит ииашаҵәҟьаны адгьыл аус адызуло, қьырала зхы иазырхәо зегьы иахәҭоу адгылара шрыҭатәу, альготақәа шырзаҧҵатәу. "Азҵаара системала иӡбатәуп, иҳадаҳкыло аӡбамҭа ауниверсалтә ҟазшьа амазароуп, хымҧада, 2022 ш. арҭ азҵаарақәа зегьы шьаҭанкыла рыӡбара иашықәсны иҟалароуп",-иҳәеит аҳәынҭқарра Ахада.

Анаҩс, Аслан Бжьаниа дазааҭгылеит Аҳазалхратә еилакы ашәахтәқәа реизгареи русуреи азҵаатәы. Ахада иазгәеиҭеит, адинамика бзиа шыҟоу, аха иҳәеит инагӡаны аус зыдуламгьы аҭыҧ шамоу. Ҷыдала, иара дазааҭгылеит обиектқәак рҟынтә ииашамкәа ишарбоу аусзуцәа руалафахәы. Ахада ицәыригеит имаз азгәаҭақәа, урҭ излашьақәдырӷәӷәо ала, асасааирҭақәеи аотельқәеи рҟны аус зуа бжьаратәла руалафахәы иартәоит 15-16 нызқь мааҭ, убри аан ауалафахәы 30 нызқь мааҭ артәоит ҳәа алаҳәара аныҟарҵо, шамахамзар, аӡәгьы ибжьы шақәимырго. Бжьаниа иазгәеиҭеит, Тамшь ақыҭан иҟоу ҩ-иаҵәак змоу анаплакаҿы, ауалафахәы 34 нызқь рҟынтә ишалаго. "Гагра алаҳәарақәа кыдуп, аӡәӡәаҩцәа ирышьҭоуп, 30 нызқь мааҭ рзыршәоит, аха ирзыҧшаауам. Араҟа 10 нызқь мааҭ ҳәа ирыҧшаауеит ауаа.  Урҭ иабантәааргои? Амц иржьода?  Рыуаажәлар, ртәыла?", - дразҵааит Бжьаниа.

Атуризм аминистр Ҭеимураз Хышба диазҵааит бжьаратәла ауалафахәы иартәо. Хышба иазгәеиҭеит атуризм аминистрра азгәаҭақәа мониторингла ишышьақәырӷәӷәоу, еиҳау инарҭбааны аинформациа ашәахтәқәеи аизгатәқәеи рминистрраҟны ишыҟоу. Хышба  иажәақәа рыла, бжьаратәла асасааирҭақәа рҟны аус зуа 15 нызқь инаркны 25 нызқь мааҭ рҟынӡа роуеит. Иааидкыланы, 25 нызқь мааҭ. "Ари ауалафахәы ашәахтәқәа ахыххома, мамзаргьы даҽкала ирзышәшәо?", - азҵаара ықәиргылеит Ахада, аха аминистр аҭак ҟаимҵаӡеит.
Ахада атуризм аминистри ашәахтәқәа аизгатәқәеи рминистри рнапы ианиҵеит ари аҭагылазаашьа хылаԥшра арҭарц, ахашәалақәа ашәшьыра иҵыхтәуп.  "Иҟоуп азакәан ҳаҭыр ақәызҵо, еилазымго, иҟоуп азакәан ҳаҭыр ақәзымҵо, урҭ шәырхылаԥшлароуп. Сара шәара сшәызҵаалоит", - иҳәеит Ахада.

Ахада иара убас ишьҭихит ареспубликаҟны зегьы еицырдыруа, иахьа игәыгәҭажьу, ахыбгалара иаҿу аобиектқәа рызҵаарагьы.  

«Ауаа аиҭакрақәа рҭахуп. Ҳара ҳкоманда анааи, 2020 шықәсазы убас еиԥш агәыӷрақәа ыҟан. Ҳреспублика ҳанналало, Гагра раԥхьатәи ақалақь аҟны даара ахыбра ԥшӡа гылоуп, иқьаԥҭажәха, уи зхатәтәу ыҟоуп, анаҩс аколоннада аҿаԥхьа ахәаахәҭратә комплекс. Уи ашьҭахь – Аолимпиатә база, Аҟәа  – агәабзиарачаԥарҭақәа жәпакы,  асасааирҭа «Абхазиа», аресторанқәа «Амра», «Ельбрус», ԥасатәи асасааирҭақәа «Тбилиси», «Сухум»,  ЦУМ,  Аҟәа уахьналҵуа, Гәылрыԥшь – Смецкои ихьӡ зху агәабзиарачаԥарҭа, уб.егьырҭ аобиектқәа. Арҭ зегьы еиҭашьақәыргылатәуп.  Хара имгакәа аобиектқәа зтәуи, арендаторцәеи ԥшааны шәрызҵаа ирҭаху. Аԥара ҳамаӡам, аха льготақәак раҳҭар ҳалшоит», – иҳәеит аҳәынҭқарра Ахада.

Ахада иаҵшьны иҳәеит арҭ аобиектқәа зегьы рыҟны 2022 шықәса нҵәаанӡа аргыларатә усурақәа ирылагалароуп, мамзаргьы изымпыҵаку дыԥсаххоит.  
«Арҭ аобиектқәа зны узыршанхоз, ҳтәыла ахаҿра шьақәдыргылон, уажәы ашьшьыҳәа ахыбгалара иаҿуп. Сара арҭ аобиектқәа зхатәтәу сыздырам, аха 2022 шықәсазы аргыларатә усурақәа ирылагароуп, мамазаргьы аԥшәма дыԥсаххоит аҳәынҭқарра ма аинвестор рхаҿала», – иҳәеит Аслан Бжьаниа. «Сара атәылауаа ринтересқәа аԥхьа исыргылоит, аха атәым инвесторцәа ҳзакәанқәа еиҳа ҭакԥхықәрала ирызнеиуазар, еиҳаны иршәозар, урҭ ҳтәылаҟны ҳекономиказы хәарҭара злоу абизнес хацдыркыр ҟалаӡом ҳәа сгәы иаанагаӡом», - иҳәеит Бжьаниа.

Ахада аиҳабыра рнапы ианиҵеит хара имгакәа еиқәиԥхьаӡаз аобиектқәа нап рыларкырц, есымза Ахада иадминистрациахь имҩаԥгоу аусуразы ҩрала аҳасабырба наргаларц. «Ари ус мариаӡам, аха уи аӡбара аамҭа ааит. Шаҟа ацәыӡи аҳәынҭқарра арҭ аобиектқәа баша иахьгылоу азы?  Шаҟа усурҭа ҭыԥ аԥҵамкәа иҟои? Ари зегьы аӡәы феида алигарц даҿуп азоуп. Ҳара уи ҳачҳароума? Ҳара 2022 – 2025 шш. ареспублика асоциалтә-економикатә ҿиара апрограмма ашьақәыргылара ҳаҿуп хықәкылатәи арбагақәа ацҵаны. Урҭ рышҟа ҳнеираны ҳазлаҟои ас еиԥш ихадароу азҵаарақәа ҳмыӡбар? Аус заҳуеи аекономикаҟны, уи инацҵаны асоциалтә усхк, аҵара аусхк, акультура аусхк аҟны ԥхьаҟа аиҭаҵра ҳалымшар? Ҳара ҳактивқәа рылша ааҳарԥшыроуп», – иҳәеит Ахада.

Бжьаниа иаҵшьны иҳәеит аекономика аҿиара ҟамлакәа аҳәынҭқарра ахьыԥшымра аиқәырхара залыршахаӡом. «Сара ауааԥсыра зегьы рзы аус зуеит, салысхызгьы, салзымхызгьы рзы. Сара ҳауаажәлар аԥсҭазаара бзиа рымазар сҭахуп, уаҵәтәи амш агәра рго иҟазар сҭахуп. Ҳара ҳәынҭқарра ахьыԥшымра иазку ацәажәарақәа ракәӡам, ҳара економикала ишьақәгылоу ахьыԥшымра иаша ҳамазароуп», – иҳәеит аҳәынҭқарра Ахада.
Ахада игәаанагарала, шамахамзар, ихыркәшоу Аԥсны асоциалтә-економикатә ҿиара апрограмма 2025 шықәсанӡа инагӡахоит.  «Ахықәкы ықәыргыланы, уи анагӡара ҳҽазаҳкроуп», – иҳәеит иара.

Бжьаниа аминистрцәа ирылеиҳәеит лассы-лассы аиҳабыра аилатәарақәа дшырҭаало, аҳәарагьы ҟаиҵеит аҟәшақәа ирзыку азҵаарақәа рҭакқәа рыҟаҵара иазхиазарц азы. Уи иргәалаиршәеит аиҳабыра аилазаара ҿыц аусура иалагеижьҭеи шықәсык шҵыз, уи алҵшәақәа рылацәажәаразы аамҭагьы шааиз. Бжьаниа иара убас иазгәеиҭеит имҩаԥгоу аусуразы атәылауаа рҿаԥхьа аҳасабырба аҟаҵара шаҭаху, аминистрцәа зегьы рнапы ианиҵеит русуразы аинформациа ауааԥсыра рҟынӡа инаргаларц, телехәаԥшрала ақәгылара, аполитикатә оппонентцәа злахәу адискуссиақәа рымҩаԥгара.

Аҳәынҭқарра Ахада иара убас иазгәеиҭеит аҭакзыԥхықәу амаҵзурақәа рыҟны аусурақәа еиԥырымҟьаларц. «Аусура еиԥымҟьароуп! Аминистрра ҭакԥхықәра дуӡӡоуп. Аминистр х-ҭацәыха имамзароуп. Зегьы русура алҵшәа аиура иазкызароуп!» – иажәа хиркәшеит Ахада.


Возврат к списку