Аҧсны Аҳәынҭқарра Ахада

 

Ахада Баикалнҭыҵтәи атәылаҿацә Аиҳабыра Ахантәаҩы ихаҭыԥуаҩ Андреи Гурулиов дидикылеит

09.09.2021

Ахада Баикалнҭыҵтәи атәылаҿацә Аиҳабыра Ахантәаҩы ихаҭыԥуаҩ Андреи Гурулиов дидикылеит

Аҧсны Аҳәынҭқарра Ахада Аслан Бжьаниа Баикалнҭыҵтәи аҿацә Аиҳабыра Ахантәаҩы  ихаҭыԥуаҩ Андреи Гурулиов дидикылеит.

Аиԥылара иара убас далахәын Аԥсны Аҳәынҭқарраҟны иҟоу УА Ацҳаражәҳәаҩ Алексеи Двинианин.

Аиԥылараҟны, ҷыдала, иазааҭгылан цәыббрамза 19 рзы имҩаԥысраны иҟоу УА Аҳәынҭқарратә думахь алхрақәа реиҿкаара азҵаара.
Аҳәынҭқарра Ахада Гурулиов аԥсшәа иаҳәо, иазгәеиҭеит иусушьа атәы бзианы ишидыруа, иҭабуп ҳәагьы еиҳәеит Аԥсни Алада Уаԥстәылеи ажәларқәа рыхьӡала имҩаԥиго амаҵзуразы.

  «Аԥсназы 2008 шықәсазтәи ахҭысқәа аҵак ду рымоуп. Шәара арҭ ахҭысқәа амҩа иаша иқәызҵоз шәыруаӡәкын. Ҳәарада, имҩаԥысраны иҟоу Аҳәынҭқарратә думахь алхрақәа аҵак ду рымоуп. Уи ҳацклаԥшлоит, иҳалшо алагьы ҳҽалаҳархәуеит.  Адума аилазаара иаӡбо рацәоуп. Ҳаргьы иҳалшо акы агҳархом ҳреспубликаҟны алхрақәа аиҿкаара бзиа рыманы имҩаԥысырц азы»,- иҳәеит Ахада.

Аҳәынҭқарра Ахада иҳәеит Аҳәынҭдумаҟны "Иаку Урыстәыла» ԥыжәара зуа партианы иаанхоит ҳәа агәра шиго.
  
Андреи Гурулиов Аслан Бжьаниа иҭабуп ҳәа еиҳәеит аиԥыларазы. «Аԥсны сара исыцәтәыму тәылаӡам, сара еиуеиԥшым аамҭақәа рзы Абжьбатәи арратә базаҟны аус зуан. Сара ареспубликазы, аԥсуа жәлар рзы даара агәаанагара бзиа сымоуп», - иҳәеит иара.

Гурулиов иаҵшьны иҳәеит иалырхраны иҟоу Аҳәынҭдума адепутат абжьаҟазаҩ ила акәымкәа, ишиашоу,алхҩцәа аус шрыдиулаларакәу.  «Раԥхьа иргыланы, ареспублика иқәынхо ауааԥсыра рыԥсҭазаара аиӷьтәра иазкызароуп уи иусура»,- иҳәеит иара.

Аслан Бжьаниа дрылацәажәеит аԥсны-урыстәылатәи аҳәааҟны иҟоу апроблемақәа жәпакы.

  «Ҳара ҳуааԥсыра рахьтә 80% Урыстәылатәи Афедерациа атәылауаҩра рымоуп. Ари ҳәарада, имаҷӡам аҳәынҭқарратә ҳәааҟны аусура арежим аԥсахразы. Уа иҟоу аҭагылазаашьа ҳтәылауаа даара иаргәамҵуеит, еиҳаракгьы, аԥхын, акурорттә аамҭазы. Ари ҳаизыҟазаашьақәа рырӷәӷәара иацхрааӡом»,- иҳәеит аҳәынҭқарра Ахада, убри аан иазгәеиҭеит алхҩцәа абас еиԥш иҟоу азҵаарақәа ықәдыргылараны ишыҟоу Аҳәынҭдума адепутат иҿаԥхьа.

Аиԥылараан ирылацәажәан иара убас аԥсны-урыстәылатәи аусеицура иазку актуалра зҵоу егьырҭ азҵаарақәагьы.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org