Аҧсны Аҳәынҭқарра Ахада

 

Аҧсны Ахада 2008 ш. нанҳәамзазы имҩаҧысыз ахҭысқәа ирыдҳәалоу агәалашәаратә усмҩаԥгатә аҟны иқәгылара

07.08.2021

Аҧсны Ахада 2008 ш. нанҳәамзазы имҩаҧысыз ахҭысқәа ирыдҳәалоу агәалашәаратә усмҩаԥгатә аҟны иқәгылара

Аҧсны Аҳәынҭқарра Ахада Аслан Бжьаниа 2008 ш.нанҳәамзазы имҩаҧысыз ахҭысқәа ирыдҳәалоу агәалашәаратә хҭысқәа дрылахәын.
Аҳәынҭқарра Ахада иқәгылараҿы иҳәеит:

«Ҳаҭыр зқәу ҳашьцәа-ауаҧсаа!

Исҭахуп шәашьцәа аҧсуа жәлар рыхьӡала салам ду шәысҭарц, адгылара ишәырҭо атәы шәасҳәарц.
Сҩызцәеи сареи ҳзы ихьӡуп ҳәа иҳаԥхьаӡоит иахьа Цхьынвал ҳаҟазаара - 2008ш. нанҳәамзазы иҟалаз атрагедиеи, аха убри аангьы афырхаҵара зцу ахҭысқәеи ргәалашәара ҳахьалахәу.

Арҭ ахҭысқәа ҩаҧхьа иаадырҧшит ауаҧсаа ирымоу ахачҳара, рыдгьыл гәакьа ахақәиҭразы ақәԥараҟны ишхьамҵуа. Нанҳәамза, 2008 ш. адунеи зегьы ианарбеит Урыстәыла ду аҩызцәа арыцҳара ианақәшәа, ахала  ишыннамыжьуа. Урыстәыла анапхгара агәаӷьра аарԥшны, ианаамҭаз имҩаԥыргаз ауснагӡатәқәа ирыбзоураны, аӷа ирхәҭақәа ҧыххааса иқәҵан.

Ҳхырхәоит зыԥсадгьыл ахақәиҭра зхы ахҭнызҵаз афырхацәа ргәалашәара аҿаԥхьа. Урҭ рфырхаҵара еизҳауа абиҧарақәа рзы иҿырҧшыганы иҟоуп. Рыхьӡ кашәара ақәым аибашьцәа-аԥсадгьыл ахьчаҩцәа!  

Иахьа ҳара ҳтәылақәа рхы иақәиҭны аҿиарамҩа иануп. Аха убри аангьы ҳгәы каҳмыршәроуп. Қырҭтәыла макьанагьы аҽазнашәоит Аҧсни Алада -Уаҧстәылеи анапахьы аагара. Уи ус шакәу атәы аҳәоит аҭынчтә еиқәшаҳаҭра анапаҵаҩра мап ахьацәнакуа. Убри аҟнытә, Аҧсни Алада-Уаҧстәылеи рырбџьармчқәа рырӷәӷәара иаҿуп, Урыстәыла аганахьала арра-техникатә усеицзура есааира иазнарҳауеит. Ҳарҭ ахааназы иаҳхашҭуам ари Атәыла ду иаҳнаҭаз адгылара, Аҧсни Алада-Уаҧстәылеи аҳәынҭқаррақәа рхьыҧшымра ахьазханаҵаз, убри алагьы ҳажәларқәа хықәкыс ирымаз - ҭынч анхара, ахьыҧшымра, ашәарҭадареи иҭышәынтәаланы аҿиареи рзы азин ахаьзханаҵаз.

Иахьа ихьыҧшым ҳҳәынҭқаррақәа рыбжьара аизыҟазаашьақәа еиуеиҧшым ахырхарҭақәа рыла аҿиара иаҿуп, урҭ аҧхьаҟагьы ирыцҵахоит. Арҭ аизыҟазаашьақәа шьаҭас ирымоуп шәышықәсала аҧсуааи ауаҧсааи рыжәларқәа ирыбжьоу аиҩызара.

Ҳаҭыр зқәу аҩызцәа, зегьы аӡәаӡәала ишәзеиӷьасшьоит агәабзиара, анасыԥ, аизҳазыӷьара, шәтәыла шьахә, ижәытәӡоу аланқәа ртәыла аҭынчреи абарақьаҭреи агымзааит!»

    



Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org