Аҧсны Аҳәынҭқарра Ахада

 

Аԥсны Ахада Аслан Бжьаниа Владикавказ даҭааит

06.08.2021

Аԥсны Ахада Аслан Бжьаниа Владикавказ даҭааит


Иахьа ихацыркхеит Аҧсны Аҳәынқарра Ахада Аслан Бжьаниа Алада Уаҧстәыла Ареспубликахь иофициалтә визит.

Ари авизит мҩаԥысуеит 2008 ш. нанҳәамзазы имҩаҧысыз ахҭысқәа ргәаларшәара инамаданы.

Аԥснытәи аофициалтә делегациа аилазаараҟны иҟоуп: Аԥыза-министр ихаҭыԥуаҩ Владимир Делба, Адәныҟатәи аусқәа рминистр Даур Ақаҩба, Аҭагылазаашьа ҷыдақәа рзы аминистр Лев Кәыҵниа, Аҳәынҭдачақәа рзы аусбарҭа Аиҳабы Беслан Кәыҵниа, Аԥсны Жәлар Реизара адепутат Рауль Лолуа.

Аԥсуа делегациа Цхьынвалҟа амҩа ишықәыз имҩахыҵит иара убас Аҩадатәи Уааԥстәыла –Аланиа Ареспублика ашҟа.

Владикавказ аҳаиртә баӷәазаҟны Аԥсны Ахада иԥылеит Аҩадатәи Уаԥстәыла - Аланиа Ареспублика Аиҳабыра ахантәаҩы Ҭемраз Тускаеви Владикавказ иҟоу Урыстәыла Адәныҟатәи аусқәа рминистрра Ахаҭарнак Алан Хьетагәурови.

Аԥсны Ахада Аслан Бжьаниеи аофициалтә делегациа алахәцәеи 2004 шықәсазы Беслан ақ. ашкол аҟны иҟалаз атеррористтә акт аан иҭахаз ашколхәыҷқәеи, арҵаҩцәеи, аҭаацәеи анышә иахьамадоу амемориалтә ԥсыжырҭа - «амаалықьцәа рықалақь» иаҭааит. Аслан Бжьаниа ара иҭахаз рыхьӡала ашәҭшьыҵәрақәа шьҭеиҵеит.

Аԥсны Ахада иара убас ашәҭшьыҵәрақәа шьҭеиҵеит атеррористцәа ахәыҷқәеи арҵаҩцәеи шасыс инкыланы иахьрымаз Беслан ақ. актәи ашкол аспорт зал аҟны иҭахаз рмемориал аҟынгьы.

«Арҭ абаҟақәа ирну шәҩыла аԥааимбарцәа рыбла разқәа уанырҭаԥшуа, зықь хәыцра ухаҿы иааиуеит. Урҭ ҳара адуқәа абри аҩыза уаҳа иҟамларц азы, ахәыҷқәа ҭамхаларц азы ишәылшо зегьы ҟашәҵалароуп ҳәа ҳарҳәошәа збоит. Иага аамҭа царгьы, 2004 шықәса цәыббрамзазы Беслан иҟалаз ари ахлымӡаах хашҭшьа амаӡам. Схырхәоит ари агыгшәыгратә теракт иалаӡыз рыхьӡала», - иазгәеиҭеит Аслан Бжьаниа алахьеиқәратә ҭыԥқәа рҭаара анаҩс.



Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org