Ахада Урыстәыла Афедерациа аспорт аминистр Олег Матыцин дидикылеит

Ахада Урыстәыла Афедерациа аспорт аминистр Олег Матыцин дидикылеит

Аҧсны Аҳәынҭқарра Ахада Аслан Бжьаниа Урыстәыла Афедерациа аспорт аминистр Олег Матыцин дидикылеит.

Аҳәынҭқарра Ахада асасцәа аҧсшәа раҳәо, иҭабуп ҳәа реиҳәеит ҳтәылахь иахьымҩахыҵыз азы, иара убас Урыстәылатәи Афедерациа аспорт аминистрра Аҧсны ианаҭо ацхырааразы, қәҿиарала Аспорт азы Аԥсны аҳәынҭқарратә еилаки дареи қәҿиарала русеицуразы.  

"Сара издыруеит, Шәара хаҭала иҟашәҵо адгылара иабзоураны ҳшьапылампыласҩцәа ҿарацәа астуденттә лига аҽалархәразы аҭагылазаашьа шроуз. Издыруеит иара убас, Аҧсны инхо Урыстәыла атәылауаа егьырҭ аспорттә хкқәа рзы аицлабрақәа рылахәхаразы аусурақәа шымҩаҧыжәго. Шәара ирышәҵаз анапынҵа инақәыршәаны жәабранмзазы Аҧсны иааны иҟан ҳтәылаҿы ажәҩаҵышьратә база аиҭашьақәыргыларазы иҟоу алшарақәа рыҭҵааразы. Ари даара аинтерес зҵоу проектуп. Асоветтә аамҭазгьы Гал иҟаз аолимпиатә базаҿы аӡырҳәыԥи (абаидаркақәеи) аканоеи рыла  ажәҩаҵышьразы Асовет Еидгыла еизгоу акоманда азыҟарҵон",- иҳәеит Ахада.

Аҳәынҭқарра Ахада ахә ҳаракны ишьеит Урыстәыла аспорт аминистрра Аҧсны аҳәынҭспорттә еилакы Урыстәыла Иреиҳау аспорт ҵараиурҭақәа рҭаларазы алимитқәа рзаужьреи, иара убас азыҟаҵаҩцәеи аӡбаҩцәеи рыквалификациа аизырҳаразы Аҧсныҟа аҟазацәа раашьҭреи рзы аус ацура иахьазхиоу.

"Агәра згоит, шәара шәаара ҳаспорттә усбарҭақәа рыбжьара еиҳа мҽхакы ҭбаала аусеицура ишацхраауа",- иҳәеит  Аслан Бжьаниа.

Аиҧылара иалахәын аҧыза-министр ихаҭыҧуаҩ, ақыҭанхамҩа аминистр Беслан Џьапуа, Аҿар русқәеи аспорти рзы аҳәынҭқарратә  еилакы ахантәаҩы Џьамал Гәбаз, Аҧсны иҟоу Урыстәыла Ацҳаражәҳәаҩ Алеқсеи Двинианин, УА  аспорт аминистр ихаҭыҧуаҩ Одес Беисултанов.

Аҧсны Ахадеи асасцәеи агәаларшәагатә ҳамҭақәа еимырдеит.


Возврат к списку