Аҧсны Аҳәынҭқарра Ахада

 

Ахада Иадминистрациа Анапхгаҩы А. Кәыҵниа Гал араион аҟны аилацәажәара мҩаԥигеит

14.07.2021

Ахада Иадминистрациа Анапхгаҩы А. Кәыҵниа Гал араион аҟны аилацәажәара мҩаԥигеит

Аԥсны Аҳәынҭқарра Ахада Аслан Бжьаниа идҵала Администрациа Анапхгаҩы Алхас Кәыҵниа Гал араион аҟны аилацәажәара мҩаԥигеит.

Амшхәаԥштә аҟны иқәгылан аепидемиологиатә ҭагылазаашьеиԥш, афымцамч ахархәара, изакәанымкәа аус зуа акриптофермақәа, урҭ ирҿагыланы ақәԥара, ашәахтәқәа реизгара ҳәа ирызкыз азҵаарақәа жәпакы.  

Гал араион Администрациа ахада Константин Ԥлиа иҳәеит араион аҟны иҟоу аҭагылазаашьа атәы, 2022 шықәсазтәи абиуџьет апроект азырхиара ишаҿу азгәаҭаны.    

Галтәи Араионтә фымцастанциа адиректор Ниаз Џьгьеренаиа аилацәажәара иалахәыз адырра риҭеит араион аҟны афымцамч акаҭақәеи афымцамч ахәԥса ашәаразы аизгатәқәа рҭагылазаашьеи рзы.  
Аԥыза-министр ихаҭыԥуаҩ, аекономика аминистр Кристина Озган аҳәара ҟалҵеит қыҭацыԥхьаӡа ауал ирықәуи аҵыхәтәантәи ашықәсқәа рзы азеиԥш цифрақәеи ртәы рҳәарц.  

Ахада Иадминистрациа Анапхгаҩы Алхас Кәыҵниа дазҵааит акриптофермақәа раанкылара анаҩс еиҭа иаҿазкуа дызусҭоу.

Араион ахада Константин Ԥлиа иҳәеит ара ари аҩыза шыҟам. «Иаарԥшыз, афымцакаҭа иаҿыхыз амаининг-ферма дуқәа хәба еиҭа иаҿакӡам. Урҭ аус руӡом»,- иҳәеит  иара. Убри аан Ԥлиа иҳәеит ахатәы ҩнқәа рыҟны уи аҟаҵара шымариоу атәы.  
«Ари зегьы ирылшоит, маҷк акәзаргьы, афымца атәы здыруа. Аферма ду атәы ҳҳәозар, ара аспециалистцәа рыда ԥсыхәа ыҟаӡам. Аха ус еиԥш аферма дуқәа ҳамбаӡац», - иҳәеит Ԥлиа.
Алхас Кәыҵниа иаҵшьны иҳәеит аиҳабыра ари аусура хкы ахацыркразы раԥхьа азин ҟанаҵеит, нас ари азыӡба ааннакылеит ҳәа иҟоу агәаанагара шиашам. «Сара абас зҳәо ауаа Аминистрцәа реилазаара ақәҵарақәа рыхшыҩ азышьҭны иаԥхьарц, аҵакы еилыркаарц сҭахуп», - иҳәеит Кәыҵниа.

Аԥыза-министр ихаҭыԥуаҩ Кристина Озган адырра ҟалҵеит 2020 шықәса цәыббрамзазы аиҳабыра абри аусура хкы азы ақәҵарақәа жәпакы шаднакылаз.  
«Акриптовалиута арҳаразы официалла аӡәгьы азин иҭаӡамызт»,- лҳәеит лара.

Анаҩс, Гал араионтә хәышәтәырҭа аҳақьым хада Асҭамыр Гамгьиа ирылеиҳәеит араион аҟны иҟоу аепидемиологиатә ҭагылазаашьа атәы, уи егьырҭ араионқәа ирҿырԥшны ҳахәаԥшуазар, иҭышәынтәалоуп ҳәа дахцәажәеит.  

Аилацәажәараҟны иара убас ирзааҭгылан араион аҟны иҟоу егьырҭ апроблемақәагьы.  

Ахада Иадминистрациа Анапхгаҩы Алхас  Кәыҵниа араион аҿы имҩаԥигаз аилацәажәараҟны ицын аԥыза-министр ихаҭыԥуаҩ, ақыҭанхамҩа аминистр Беслан Џьапуа, аԥыза-министр, аекономика аминистр Кристина Озган, ашәахтәқәеи аизгатәқәеи рзы аминистр Џьансыхә Нанба.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org