Аҧсны Аҳәынҭқарра Ахада

 

Ахада Аԥсны иҟоу Аерман уаажәларра ахаҭарнакцәа идикылеит

09.07.2021

Ахада Аԥсны иҟоу Аерман уаажәларра ахаҭарнакцәа идикылеит

Аԥсны Аҳәынҭқарра Ахада Аслан Бжьаниа Аԥсны иҟоу Аерман уаажәларра ахаҭарнакцәа идикылеит.


«Бзиала шәаабеит ҳәа шәаҳҳәоит Ахада Иадминистрациаҟны. Ааигәа ҳаибамбаӡац. Ари аамҭа аҩныҵҟала азҵаарақәа жәпакы еизеит, сара урҭ рылацәажәара сазхиоуп», - иҳәеит аҳәынҭқарра Ахада.

Аерман жәлар реидгыла ахантәаҩы Галуст Трапизониан иазгәеиҭеит Аԥсны иқәынхо аерманцәа аҳәынҭқарратә ԥсҭазаара апроцессқәа ирылахәу аиҩызаратә еидгылара анаӡааӡара иахәҭакны рхы шырыԥхьаӡо. «Ари аспорт, акультура, аполитика, аҵараиура уҳәа аусхкқәа рыҟны. Аиҩызареи аидгылареи аԥхьаҟагьы Аԥсны иқәынхо ажәларқәа зегьы еидызкыло шьаҭас ирыманы иҟазар ҳҭахуп»,- иҳәеит иара.

Аерман интеллигенциа ахаҭарнакцәа алацәажәеит азеиԥш ҵараиуратә процесс рацәак иақәымшәо, зхатә ҷыдарақәа змоу аԥснытәи аерман школқәа рыҟны аусуратә процесс; еиҳа мҽхакы ҭбаала зыларҵәара аҭахны иҟоу аԥсуа бызшәеи иақәнагоу алитературеи рызҵаарақәа.

Ахада иазгәаиҭеит аерман школқәа рыҟны аԥсуа бызшәа арҵара иамоу аҵак ду, иагьиҳәеит аԥсуа бызшәа арҵаразы арҵаҩцәеи аспециалистцәеи рыла реиқәыршәара дшазхиоу аҳәынҭқарратә ҩаӡараҟынӡа ишьҭыхны.

Иара убас Ахада Аԥсны Аҳәынҭқарра Аерман уаажәларра актив иҭабуп ҳәа реиҳәеит изныкымкәа Гәдоуҭатәи аковидтә хәышәтәырҭеи егьырҭ амедицинатә усҳәарҭақәеи апандемиа аҿагылараҟны афинанстә цхыраара иҟарҵахьо азы.

Аиԥылараан ирылацәажәан иара убас егьырҭ, иактуалтәу азҵаарақәа жәпакы.

Аиԥылара иалахәын Аԥсны Ахада Иадминистрациа Анапхгаҩы Алхас Кәыҵниа, Аексперттә Усбарҭа Аиҳабы Инал Хышба.

  

--


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org