Аҧсны Аҳәынҭқарра Ахада

 

Аслан Бжьаниеи Беслан Ешбеи аҳҭнықалақь амҩадуқәа рыҟны агәаҭаратә ныҟәарақәа мҩаҧыргеит

05.07.2021

Аслан Бжьаниеи Беслан Ешбеи аҳҭнықалақь амҩадуқәа рыҟны агәаҭаратә ныҟәарақәа мҩаҧыргеит

Аҧсны Аҳəынҭқарра Ахада Аслан Бжьаниеи Аҟәа ақалақь  администрациа ахада Беслан Ешбеи аҳҭнықалақь амҩадуқәа рыҟны агәаҭаратә ныҟәарақәа мҩаҧыргеит.

Иахәаԥшины ирбеит амшцәгьа иҟанаҵаз аҧхасҭа Синоп иара убас, Воронови Ӡиӡариеи рыхьыӡқәа зху амҩадуқәа рҿы.
Беслан Ешба аҳәынҭқарра Ахада адырра ииҭеит аҳҭнықалақь аҟны аҭагылазаашьа зеиҧшроу азы, иҳәеит амш аҩбатәи азбжазы амшцәгьа ахҟьа-ԥҟьақәа, иҟанаҵаз аҧхасҭа иазку ихаҭәаау аинформациа шииҭо атәы.

Ахада аиҭашьақәыргыларатә усурақәа ахьцоз аҭыҧқәа рҿы афымцаусзуҩцәа драцәажәеит. Дара изларҳәаз ала, амш иалагӡаны аҳҭнықалақь аҟны афымцалашара  ҟалоит.

Агәаҭаратә ныҟәарақәа реихшьала ҟаҵо, Ахада ажурналистцәа аниҿцәажәоз иазгәеиҭеит:

"Ҳара, хымҧада, хара имгакәа, амшцәгьа иҟанаҵаз аҧхасҭа арҽеиразы иаҭаху ахарџь ҳаҧшаауеит. Ақалақь анапхгара аԥша бааԥс ахҟьа-ԥҟьақәа раԥыхразы иалшо зегьы ҟанаҵоит.

Абригадақәа иацы ҵхыбжьонынӡа аус руан, иахьагьы шырҧазы ҩаҧхьа русура хацдыркит. Аӡәы мыцхәы дсырҽхәарц сҭахым, аха аусбарҭақәа зегьы   аҭагылазаашьа иаҧшны, ибзианы аус руеит.

Сара иахәҭаны исыԥхьаӡеит аусурақәа шымҩаҧысуа хаҭала ақалақь сналсны избарц. Уажәшьҭа аҳҭнықалақь аҟны аҭагылазаашьа зеиҧшроу здыруеит. Иахьа  араионқәа радминистрациақәа рхадацәа иара убас адырра сырҭоит аҭыҧаҟны иҟоу аҭагылазаашьазы, анаҩс иахәҭоу ауснагӡатәқәа мҩаԥаҳгоит",- иҳәеит Бжьаниа.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org