Аҧсны Аҳәынҭқарра Ахада

 

Ахада Гагра араион ахь аусуратә ныҟәара мҩаԥигеит

20.06.2021

Ахада Гагра араион ахь аусуратә ныҟәара мҩаԥигеит

Аԥсны Аҳәынҭқарра Ахада Аслан Бжьаниа Гагра араион ахь аусуратә ныҟәара мҩаԥигеит.

Амҽышаҽны, рашәарамза 20 рзы, Аԥсны Аҳәынҭқарра Ахада Аслан Бжьаниа Гагра араион ахь аусуратә ныҟәара мҩаԥигеит.

Аҳәынҭқарра  Ахада иусура хациркит аҳәаа иаԥну, аӡиас "Ҧсоу" иаҿықәу ақыҭақәа рыла.

Аӡиас аҿықә иахьадсыло х-ҭыҧк рҿы аӡы аԥшаҳәа ҵнаӡәӡәааит азы аӡиас хыҵны амашьынамҩа ианыларазы ашәарҭара ыҟоуп. Аӡхыҵра дуқәа аныҟоу, ақыҭанхамҩатә дгьылқәеи анхарҭатә ҭыҧқәеи аӡы рыҵалоит.

Ашәарҭара ахьыҟоу аҭыҧқәа данрыхәаҧш анаҩс, аҳәынҭқарра Ахада араион администрациеи изҵазкуа амаҵзурақәеи адҵа риҭеит хәҭа-хәҭала иҟоу апроблемақәа рыҭҵааразы, ашәарҭара аҧыхразы иаҭаху аплан аиқәыршәаразы.

Убри инаҷыданы, Ахада иҳәеит, хышықәса раҧхьа аҟәара арӷәӷәаразы аусурақәа мҩаҧызгоз аргыларатә наплакқәа рнапхгаҩцәа ибарц шиҭаху, аӡиас ахыҵра усҟан инагӡаз аусура ахаҭабзиара ишахҟьо.  

Ахада иазгәеиҭеит ламысцқьала русура иахьазымнеиз азы аҭакҧхықәра здыз анаплакқәа  дара рхарџь ала аҭагылазаашьа дырҽеирц шахәҭоу хара имгакәа.      
Анаҩс, Ахада Аслан Бжьаниа аҳәынҭқарратә ҳәааҿы ахылаҧшра-аужьратә пункт иаҧну аҭыҧ гәеиҭеит.

Аҳәынҭқарра Ахада  аҳәааҿы иҟоу ахәаахәҭырҭатәи егьырҭ ахыбрақәеи дырҭааит. Аслан Бжьаниа ахыбрақәа рааигәа иҟоу асанитартә ҭагылазаашьазы ӷәӷәала агәынамӡара ааирԥшит.

Ахада иҳәеит аиҿкаарақәеи ахәаахәҭырҭатә хыбрақәеи рнапхгаҩцәа асанитартә ҭагылазаашьазы хаҭала аҭакҧхықәра шрыду, уи ашьҭахь Гагра араион анапхгаҩцәа рнапы ианиҵеит идҵа анагӡара хылаҧшра арҭарц.  
  
  Иахьа, аҳәынҭқарра Ахада иара убас имҩаҧигеит аҳәаа аус знапы алаку амаҵзурақәа рнапхгаҩцәа злахәыз аусуратә еиҧылара.

Ахада адҵа ҟаиҵеит аҳәаахьчаратә маҵзуреи аҩныҵҟатәи аусқәа русбарҭақәеи русеицура арӷәӷәаразы. "Ари Аҧсны агәашәқәа роуп. Аҧсны асасцәа аҳәааҿы ироуа агәаанагарқәа рылоуп, иааидкыланы атәыла зегьы разыҟазаашьа шышьақәгыло. Аҳәааҿы иҟамлароуп изакәаным ашәахтәқәа. Хымҧада, Аҳәаахьчаратә маҵзуреи Аҩныҵҟатәи аусқәа рминистрреи еидгыланы аус руроуп  аконтрабанда, анаркотикатә маҭәашьарқәа рымҩангара раарԥшразы. Аусзуҩцәа рҭеиҭыҧш аусура аҟазшьа иақәшәозароуп. Азакәан аҳәаақәа ирҭагӡазароуп зегьы",- ҳәа азгәеиҭеит Аҳәынҭқарра Ахада.


Амш аҩбатәи азбжазы Аслан Бжьаниа аилацәажәара мҩаԥигеит Гагра араионтә милициа аҟәшаҟны.

Ахада адырра ирҭеит ҳазҭагылоу аамҭазы акриминогентә ҭагылазаашьазы, Гагра араион ауааԥсыреи атуристцәеи ршәарҭадара алыршаразы азинхьчаратә усбарҭақәа имҩаԥырго ауснагӡатәқәа рзы.  

Аслан Бжьаниа аматериалтә-техникатә еиқәыршәаразы иҟоу аҭагылазаашьа дазҵааит.

Азинхьчаратә усбарҭақәа русзуҩцәа ирҳәеит автомашьына ҿыцқәеи егьырҭ, иҷыдоу ахархәагақәеи рыла иҟаҵоу ахарҭәаарақәа аматериалтә техникатә еиқәыршәара аҩаӡара ашьҭыхра шалдыршаз. Иҳаҩсыз ашықәс азы уажәааны иҟаз акриминогентә статистика иаҳәоит аԥсыҭбарақәа зцыз амҩа-транспорттә хҭысқәа иааизакны ҩынтә ишеиҵахаз.  

Ахада Азинхьчаратә усбарҭақәа русзуҩцәа имҩаԥырго аусуразы иҭабуп ҳәа раҳәаны, иазгәеиҭеит урҭ ауснагӡатәқәа макьана ишазымхо, арбагақәа иҵегьы реиӷьтәра шаҭаху. Амилициа аусзуҩцәа русура шаҟа ҭакԥхықәрала иазнеиуа еиԥш ауп, араионқәеи атәылеи рзы иаҳҭаауа асасцәа ргәаанагарақәа шыҟало ҳәа иаҵшьны иҳәеит Ахада.  

Ахада  амилициа аусзуҩцәа азхьарԥшны иҳәеит ихадоу, азинтә леишәазы аҭакԥхықәра зду мчны иҟоу азинхьчаратә усбарҭақәа шракәу. Акриминалтә хаҿқәа ажәытә иҟазҭгьы, шьҭа азинхьчаратә усбарҭақәа рыцхыраарала алеишәа иахылаԥшлароуп аҳәынҭқарра.  

Иара убас Ахада атуристцәа зыҩноу аобиект дуқәа рыҟны азинтә леишәа ашьақәыргылара атема дазыхынҳәны, иҳәеит апансионатқәеи, асааирҭақәеи, аԥсшьаҩцәа здызкыло егьырҭ аобиект дуқәа рыҟны ашәарҭадаразы апрофессионалтә маҵзурақәа шаԥҵатәу.  

Аҳәынҭқарра Ахада ирабжьигеит ари аусуразы азинхьчаратә усбарҭақәа рыҟнытә тәанчара ицо аофицерцәа адрыԥхьаларц, урҭ рԥышәа азакәанеиламгареи ауаажәларратә зинтә леишәа ақәныҟәареи рыҟны ацхыраара зларылшо ала.  


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org