Аҧсны Аҳәынҭқарра Ахада

 

Аԥсны Ахада Аслан Бжьаниеи Апатриарх Антиохиатәи Иоанн X еиԥылеит

19.05.2021

Аԥсны Ахада Аслан Бжьаниеи Апатриарх Антиохиатәи Иоанн X еиԥылеит

Лаҵарамза 19 рзы Аԥсны Аҳәынҭқарра Ахада Шьамтәылатәи Арабтә Республикаҟны официаллатәи ивизит аҳәаақәа ирҭагӡаны Дамаск ақалақь аҟны Аҭыԥҳа Ц Мариа Лныхаҿы Антиохиатәи Апатриарх Иоанн Х диԥылеит.

Аҳәынҭқарра Ахад аиԥылара алахәцәа иҭабуп ҳәа реиҳәеит иҟарҵаз адкыларазы, иагьазгәеиҭеит Аԥсны хыԥхьаӡара рацәала ақьырсиан ҭоурыхтә баҟақәа шыҟоу:

«Аԥсуа қьырсианцәа шәара шәныха ажәытәӡаахыс иадҳәалоуп. Ҳара ҳаҟны ақьырсиантә баҟақәа рацәоуп, саргьы, аҳәынҭқарра Ахада иаҳасабала, Анцәа дхазҵо уаҩуп, агәра шәсыргоит ҳажәлар иахьатәи адунеи аҟны адинхаҵара иамоу аҵакы шеилыркаауа, ҷыдала, аҳәынҭқарраҿы.

Шьамтәыла избаз даара саргәырӷьеит, избанзар шәара шәҳәынҭқарра ҳаҭыр дула аконфессиақәа зегьы ирзыҟоуп, уи лабҿаба иубарҭоуп. Шәара инашәыгӡо амиссиа  аҵак ду амоуп, избанзар ақьырсиан динхаҵара аҭынчреи аизыразреи урыдырҳәалоит», - иҳәеит Аслан Бжьаниа.

Антиохиатәи Апатриарх Иоанн Х иазгәеиҭеит, Ахада Аслан Бжьаниа напхгара ззиуа аԥснытәи аделегациа раара Шьамтәылатәи Арабтә Республиказы даара аҳаҭыр шамоу:

«Ҳара шәара шәвизит ҳацклаԥшуан, аҳәынҭқарра Ахада Башар Асади шәареи шәеиԥылара ҳбеит. Шәара шәаара ҳара ҳзы ҳаҭыруп. Шәҳәынҭқарра , шәныха, иара убас аԥсуа жәлар аҭынчреи, агәырӷьареи, аизыразреи рзеиӷьаҳшьоит. Ҳара ҳазхиоуп шәара шәҳәынҭқарра иарбанзаалак ацхыраара аҭара ақьырсиантә динхаҵара, аныха аганахь ала», - иҳәеит иара.

Аиԥылара ахыркәшамҭазы аганқәа агәаларшәагатә ҳамҭақәа еимырдеит.





Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org