Аҧсны Аҳәынҭқарра Ахада

 

Аԥсны Ахада Аслан Бжьаниа Шьамтәыла ахьчаҩцәа Рмемориалтә комплекс аҟны ашәҭшьыҵәрақәа шьҭеиҵеит

17.05.2021

Аԥсны Ахада Аслан Бжьаниа Шьамтәыла ахьчаҩцәа Рмемориалтә комплекс аҟны ашәҭшьыҵәрақәа шьҭеиҵеит

Иахьа, лаҵарамза 17 рзы Аԥсны Аҳәынҭқарра Ахада Аслан Бжьаниа Шьамтәылатәи Арабтә Республикаҟны иофициалтә визит апрограмма хацыркын Шьамтәыла ахьчаразы ақәԥараҟны иҭахаз Афырхацәа ргәаларшәара ахьӡала Амемориалтә комплекс аҟны Идырым асолдаҭ иҳаҭгәын аҿы ашәҭқәа рышьҭаҵарала.

Аҳәынҭқарра Ахадеи аԥсуа делегациа алахәцәеи еиуеиԥшым аамҭақәа рзы Аԥсадгьыл ахьчара зхы ақәызҵаз шьамтәылатәи аибашьцәа ҳаҭырла иргәаладыршәеит.

Аԥсны Аҳәынҭқарра Ахада Шьамтәыла официалтә визитла иаҭаара ахьӡала Амемориал аԥхьа иқәыргылан Шьамтәыла Арбџьар Мчқәа аладатәи арратә округ адҵаҟаҵаҩ напхгара ззиуаз Шьамтәыла Арбџьар Мчқәа раҳаҭыртә ҟарул. Иара абраҟа иҟоуп аибашьратә-ҭоурыхтә музеи. Аԥснытәи аделегациазы амузеи аҩныҵҟа имҩаԥган аекскурсиа. Аԥсны Аҳәынҭкарра Ахада Аслан Бжьаниа ҳаҭыр зқәу асасцәа рышәҟәаҟны анҵамҭа нижьит.    

«Ҳаҭыр ду зқәу Шьамтәыла ажәлар. Џьашьатәыс исымоуп Аԥсадгьыл ахьчаразы ақәԥараҟны иаашәырԥшыз афырхаҵара. Ишәзеиӷьасшьоит аҭынчреи аҭышәынтәалареи. Ишьақәгылааит шәтәылаҟны насыԥла иҭәу аԥсҭазаара. Иҭабуп ҳәа шәасҳәоит», - ҳәа аниҵеит асасцәа рышәҟәы Аԥсны Ахада.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org