Аҧсны Аҳәынҭқарра Ахада

 

Ахада Жәларбжьаратәи атуристтә форум асасцәеи алахәцәеи аԥсшәа реиҳәеит

13.05.2021

Ахада Жәларбжьаратәи атуристтә форум асасцәеи алахәцәеи аԥсшәа реиҳәеит

Аԥсны Аҳәынҭқарра Ахада Аслан Бжьаниа Жәларбжьаратәи атуристтә форум асасцәеи алахәцәеи ьзиала шәаабеит ҳәа раҳәо, иазгәеиҭеит:

«Абзиара шәымаз, ҳаҭыр зқәу аколлегацәа, акыр иаԥсоу аҩызцәа, ҳасасцәа!  

Раԥхьа инаргыланы, иҭабуп ҳәа шәасҳәарц сҭахуп Афорум «Аԥсны – аԥсы атәыла 2021» еиҿызкааз, уи иалахәу зегьы.

Атуризм ҳреспублика аекономика аҿиара ахырхарҭа хадақәа ируакуп аҟнытә абас еиԥш иҟоу аусмҩаԥгатәқәа реиҿкаара акраҵанакуеит ҳәа исыԥхьаӡоит.  
Аԥсны адунеи аҟны еицырдыруеит традициа бзианы иамоу асасдкыларала, иаҳҭаауа асасцәа гәахәарала иҳадаҳкылоит, конструктивла аусеицурагьы ҳазхиоуп.

Агәра ганы сыҟоуп Афорум аҩныҵҟа иактуалтәу азҵаарақәа шышьҭыххо. Ихадараны исыԥхьаӡоит Аԥсны иаҭаауа зегьы ирыднагало атуристтә маҵзурақәа рхаҭабзиара ашьҭыхра иазку  ауснагӡатәқәеи ҳазҭагылоу аамҭа иақәшәо азнеишьақәеи разырхиареи анаплакратә аԥшьгарақәеи рырҿиареи.
Иара убас аҵак ду амоуп ҳасасцәа ршәарҭадара ахылаԥшра. Абри инамаданы Аҩныҵҟатәи аусқәа рминистрреи иҷыдоу амаҵзурақәеи зыда ԥсыхәа ыҟам аусмҩаԥгатәқәа рынагӡара иаҿуп. Хаҭалатәи аилазаара аусура иӷәӷәоу арежим ашҟа ииагоуп.  

Ишдыру еиԥш, коронавирустә ҿкы ҳаргьы иҳаҩсны имцеит. Иаҳхысыз ашықәс азы атуристтә аамҭа ркьаҿын. Ианалагаз нанҳәамза 1 азоуп, уи, ҳәарада, аекономикатә рбагақәа ианымԥшыр амуит. Аха Урыстәылатәи Афедерациаҟнытә иааз аколлегацәеи ҳареи ҳусеицурала ари ачымазара аҿагылара ҳалшеит. Асанитартә-епидемиологиатә ҭахрақәа рықәныҟәаралоуп короновирустә ҿкы алаҵәара аҿагылара шалыршахо.  

Аԥсны атранспорттә инфраструктура арҿиаразы алшарақәа маҷӡам. Ишәылаҳәатәуп ҳәа исыԥхьаӡоит аҟәатәи Аҳаиртә баӷәаза ашьақәыргылара инамаданы Урыстәылатәи Афедерациаҟнытә иақәнагоу аусбарҭақәеи ҳареи ҳабжьара гәацԥыҳәарала аусеицура шымҩаԥысуа атәы. Даара ҳақәгәыӷуеит 2024 шықәса ажьырныҳәамзазы раԥхьатәи ареисқәа аднакыло иалагоит ҳәа.  

Аԥсны анапхгара ҷыдала хшыҩзышьҭра анаҭоит аекономика атуристтә сектор аинвестициа алагаларазы аҭагылазаашьақәа раԥҵара. Абизнес азы амҩа аартуп, аԥышәа бзиагьы ҳамоуп уи азы. Анагӡаратәи азакәанԥҵаратәи мчхарақәа русбарҭақәа анаплакҩцәа рыхьчареи еиуеиԥшым азинҷыдақәа рыҭареи алдыршароуп аҳәынҭқарреи абизнеси ринтересқәа разгәаҭарала.

Сгәы иаанагоит, афорум қәҿиарала имҩаԥысуеит, уи Аԥсны амҩаԥгарагьы традицианы иҟалоит ҳәа.

Ишәзеиӷьасшьоит алҵшәа змоу аусура».


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org